Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 11 >> 

Sungkun-sungkun ni si Johannes Pandidi Pasal Tuhan Jesus

1Ase dob siap ipodahi Tuhan Jesus susian-Ni na sapuluh dua ai, misir ma Ia hunjai, laho mangajari pakon marambilan i huta ni sidea.

2Jadi dob ibogei si Johannes ibagas tutupan pasal pambahenan ni Kristus, isuruh ma na manungkun-Si marhitei susianni,

3“Ham do na sihol roh ia, atap na legan ope sipaimaonnami?”

4Nini Jesus ma mambalosi sidea, “Mulak ma, anjaha patugah nasiam ma bani si Johannes, aha na binogei ampa na nididah nasiam:

5Gabe marpangidah do na mapitung, mardalan na repat, malum na gadamon, marpanangar na nengel, mulak manggoluh na matei, anjaha bani halak na masombuh iambilankon do Ambilan Na Madear.

6Martuah ma halak na so sangsi pasal Ahu.”

Hasaksian ni Tuhan Jesus Pasal si Johannes Pandidi

7Dob mulak sidea, ipungkah Jesus ma mansahapkon pasal si Johannes hubani halak na mabuei ai, “Aha do na sihol idahon nasiam, ase laho nasiam hu halimisan? Arung-arung na meol-eol do ibahen pangombus ni logou?

8Aha do na sihol idahon nasiam? Sada halak parhiou na lampot do? Tonggor ma, i rumah ni raja do parhiou na lampot.

9Aha do na sihol idahon nasiam? Sihol mangidah nabi? Tongon do na Huhatahon on bani nasiam, lobih do Ia humbani sada nabi.

10Pasalsi do na tarsurat on, ?Tonggor ma, suruhon-Ku do suruhan-Ku i lobeimu, ase ipasirsir dalan i lobeimu.?

11Sintong do na Huhatahon on bennima, humbani jolma, na itubuhkon humbani naboru, seng dong na bangkit banggalan marimbang si Johannes Pandidi, tapi halak sietekan pe ibagas Harajaon nagori atas, banggalan do ai hun bani.

12Hun bani panorang ni si Johannes nari sigogohan do Harajaon nagori atas ai, anjaha halak na manggogohi do na dapotan ai.

13Ai singgan si Johannes do panjahaion ni sagala nabi ampa titah;

14anjaha anggo ijalo nasiam do in, ia do si Elias na sihol roh in.

15Barang ise siparpinggol, itangar ma in!

16Tapi hubani ise ma pausihon-Ku bangsa on? Usih do sidea hubani sakdanak na hundul i tiga, mardilo-dilo bani hasomanni,

17?Isompul hanami do sulim bennima tapi seng ra hanima manortor, ipabogeihon hanami do tangis-tangis, tapi seng ra hanima tangis.?

18Ai roh do si Johannes, seng parmangan, seng parminum, hape ihatahon sidea, ?Na setanon do ia.?

19Na roh do Anak ni Jolma in, ra do Ia mangan anjaha ra minum, hape ihatahon sidea, ?Tonggor ma, halak sipapangan magou ampa sisobur anggur, huan-huan ni sijalo sohei ampa pardousa!? Tapi gabe pintor do Hapentaran in marhitei pambahenan-Ni.”

Papa bani Huta-huta na So Ra Porsaya anjaha Paubahkon Uhurni

20Dob ai ipapai Jesus ma huta, ianan-Ni sibuenan mangkorjahon hagogohon-Ni ai, halani seng mubah uhur ni sidea, nini ma,

21“Bursik ma ho Korasin! Bursik ma ho Betsaida! Ai ambit i huta Tirus pakon Sidon ipamasa hagogohon songon na masa bannima, seng tarbahen lang mubah do uhur ni sidea, marhiou guni anjaha hundul bani abuan.

22Tapi Huhatahon ma bennima, hampungan do sitaronon ni Tirus ampa Sidon marimbang sitarononnima bani ari paruhuman ai.

23Anjaha ho, ale Kapernaum, ai sipagijangon do ho ronsi langit? Sidabuhkononkon do ho ronsi apuy naraka. Ai ambit i huta Sodom ipamasa hagogohon songon na masa ibagas ho, seng tarbahen lang totap ope huta ai ronsi sadari on.

24Tapi Huhatahon ma bennima, hampungan do sitaronon ni huta Sodom bani ari uhum ai marimbang sitarononnima!”

Dilo-dilo ni Tuhan Jesus bani Halak na Loja anjaha na Boratan

25Bani panorang ai ma ihatahon Tuhan Jesus, “Hupuji Ham Bapa, Tuhan sigomgom langit ampa tanoh on, halani iponopkon Ham do in humbani halak na maruhur ampa na pentar, tapi ipatalar Ham do in bani dakdanak.

26Eak, Bapa, ai sonin do rosuh ni uhur-Mu.

27Haganupan in, domma iondoskon Bapa Bangku, seng dong, na mananda Anak in, sobali Bapa in, anjaha Bapa in pe, seng dong na mananda-Si, sobali Anak in, ampa na pinodahan ni Anak in, domu hubani rosuh ni uhur-Ni.

28Roh ma nasiam hu Bangku, nasiam na loja anjaha na boratan, ase Hupasonang nasiam.

29Jalo nasiam ma pasangan-Ku anjaha marguru ma nasiam hun Bangku, ai na lamlam do Ahu anjaha na toruh maruhur, ase dapotan hasonangan tonduy nasiam.

30Ai lamlam do pasangan-Ku, anjaha hampung do na Hupaporsankon.”



 <<  Matius 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran