Martoruh ni Uhur songon Dakdanak
1Bani panorang ai, roh ma susian ai manjumpahkon Jesus, nini sidea ma, “Ai ise do sibanggalan ibagas Harajaon nagori atas?”
2Jadi idilo Jesus ma sada dakdanak, ipajongjong ma ia i tongah-tongah ni sidea, lanjar nini ma,
3“Sintong do na Huhatahon on bennima: Anggo lang mulak uhurnima songon sada dakdanak, sabonar na so boi do hanima masuk hubagas Harajaon nagori atas ai.
4Barang ise na patoruh uhurni songon dakdanak on, ai do sibanggalan ibagas Harajaon nagori atas in.
5Anjaha na manjalo dakdanak na sonon, halani goran-Ku, Ahu do na jinaloni ijai.”
Pasal na Mambahen Parsangsian
6“Tapi barang ise na mambahen sangsi sada humbani na etek-etek on, na porsaya hu Bangku, dearan ma igantungkon losung batu bani borgokni, laho mannongnongkonsi hubagas laut sibagasan.
7Bursik ma dunia on pangkorhon ni parsangsian! Seng tarbahen lang roh namin parsangsian, tapi bursik ma jolma na parohkonsi!
8Halani ai, anggo tanganmin atap naheimin do na mambahen mardousa ho, rotap anjaha ambukkon ma in, ai dearan do martangan salopah atap tempang ho masuk hu hagoluhan, humbani na mardua tangan atap mardua nahei iambukkon hubagas apuy sisadokah ni dokahni.
9Anjaha anggo matamu do na mambahen mardousa ho, pulsitkon ma in anjaha ambukkon, ai dearan do marmata sada ho masuk hu hagoluhan, humbani na marmata dua iambukon hubagas naraka.
10Jaga ma hanima, ase ulang mapas uhurnima mangidah sada humbani na etek-etek on. Ai Huhatahon ma bennima, “Ididah malekat ni sidea do tongtong bohi ni Bapang-Ku na i nagori atas ai.
11(Ai na roh do Anak ni Jolma in paluahkon na magou).”
Limbaga Pasal Biribiri na Magou
12“Sonaha do ninuhurnima? Anggo adong biribiri ni sada halak saratus, anjaha kahou sada hunjai, ai lang tadingkononni ma na siah puluh siah ai i dolog, laho mangindahi na magou ai?
13Anjaha anggo jumpahsi ma ai, tongon Huhatahon ma bennima, malasan do uhurni mangidah na sada ai marimbang na siah puluh siah, na so ongga kahou.
14Sonai ma homa seng marosuh uhur ni Bapanima na i nagori atas ai, anggo magou sada humbani na etek-etek on.”
Ruhut Paminsangon
15“Anggo mardousa saninamu, parayak anjaha ajari ma ia, hanima padua-dua. Anggo itangihon ho, gabe hasomanmu ma ia use.
16Tapi anggo seng itangihon ho, arahkon ma hasomanmu sada barang dua halak, ase sinaksihon ni dua atap tolu halak ma parsahapan ai.
17Tapi anggo seng itangihon age sidea, patugah ma ai bani kuria; anjaha anggo seng itangihon homa kuria ai, hira ma ia parbegu barang sijalo sohei.
18Na sintong do hatang-Kon bennima, ʻSagala na sinangkutnima i atas tanoh on, tarsangkut do homa ai i nagori atas, anjaha sagala na pinaluahnima i tanoh on, maluah do ai homa i nagori atas.ʼ
19Ambahni ai Huhatahon ma bennima, ʻAnggo adong dua hun bannima i tanoh on, na mardos ni uhur manonggohon atap aha pe, sai na bereon ni Bapang-Ku na i nagori atas ai do ai bani sidea.
20Ai atap ija pe martumpu dua atap tolu halak marhitei goran-Ku, i tongah-tongah ni sidea do Ahu.ʼ”
Pasal na Manasap Dousa ni Hasoman
21Dob ai roh ma si Petrus, nini ma hu Bani, “Tuhan, sibar piga hali do sasaponku salah ni hasomanku na mardousa dompak ahu? Pala do pitu hali?”
22Nini Jesus ma dompaksi, “Seng Huhatahon bam pitu hali, tapi pitu puluh hali pitu do.
23Halani ai tarpausih do Harajaon nagori atas ai hubani sada raja na mambahen parhiraan ampa juakjuakni.
24Jadi dob ipungkah mambahen parhiraan, tarboan ma hu lobeini sada halak, na marutang sapuluh ribu talenta.
25Tapi halani seng dong panggalarni, ihatahon tuanni ai ma jualon ia, parinangonni ampa dakdanakni ronsi ganup na dong bani, bahen galar ni utangni.
26Manrogop ma juakjuak ai i lobeini, nini ma, ʻPalumbang ham ma uhurmu, hugalar pe ganupan ai bamu!ʼ
27Jadi maidop ma uhur ni tuanni ai mangidah juakjuak ai, ipaluah ma ia anjaha ibalihon ma haganup utangni ai.
28Tapi sanggah na luar juakjuak ai, jumpahsi ma hasomanni juakjuak sahalak, na marutang hubani saratus dinar, gabe itangkap ma ia anjaha isongkik, nini ma, ʻGalar utangmu ondi!ʼ
29Jadi manrogop ma hasomanni juakjuak ai, nini ma, ʻPalumbang ham ma uhurmu, hugalar pe ai bamu!ʼ
30Tapi seng ra ia, laho ma ia anjaha ipatutupkon ma hasomanni ai, paima igalar utangni ai.
31Jadi dob ididah hasomanni juakjuak na masa ai, pusok ma uhur ni sidea, laho ma sidea, anjaha ipatugah ma bani tuan ni sidea ai haganup pasal na masa ai.
32Gabe idilo tuanni ai ma ia, nini ma dompaksi, ʻHo juakjuak na jahat! Hubalihon do haganup utangmu, halani ielek-elek ho ahu.
33Ai lang patut maridop ni uhur age ho hubani hasomanmu juakjuak songon ahu, na dob maridop ni uhur bam?ʼ
34Jadi manringis ma tuanni ai hubani, gabe iondoskon ma ia hubani sipangarsik-arsik, paima igalar haganup utangni ai.
35Sonai do bahenon ni Bapang-Ku na i nagori atas ai bennima, anggo lang isasap hanima bei humbagas uhurnima salah ni hasoman.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel