Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 31 >> 

Tonggo Ibagas Hasosakan

1Bani pambobai koor. Psalm ni si Daud. (31-2) Hu Bamu do ahu, alo Jahowa, marhatengeran, ulang ma lopas Ham ahu lalab bador; paluah Ham ma ahu marhitei hapintoron-Mu!

2(31-3) Paeleng Ham ma pinggol-Mu hu bangku, tarolos ma Ham paluahkon ahu. Ham ma bangku dolog-batu paronding-ondingan, gabe benteng na toguh laho paluahkon ahu;

3(31-4) ai Ham do tongon dolog batungku pakon bentengku, halani goran-Mu iring-iring anjaha togu Ham ma ahu.

4(31-5) Sai paluah Ham ma ahu humbani siding, na ponop itaon halak laho manangkap ahu, ai Ham do haporusanku.

5(31-6) Hubagas tangan-Mu do huondoskon tonduyhu, ai domma itobus Ham ahu, ale Jahowa, Ham Naibata hatengeran ni uhur.

6(31-7) Ihagigihon Ham do na manombah sisombahon na so margagan, tapi anggo ahu tenger do uhur hubani Jahowa.

7(31-8) Marolob-olob anjaha marmalas ni uhur do ahu bani idop ni uhur-Mu, ai ikawahkon Ham do hadoyukonku, anjaha ibotoh Ham do hasosakan ni tonduyhu.

8(31-9) Seng iondoskon Ham ahu hubagas tangan ni munsuh, ipajongjong Ham do nahei hubani na lumbang.

9(31-10) Maidop ma uhurmu bangku, ale Jahowa, ai tarsosak do ahu; halani pusok ni uhur holok do matangku, galek do tonduyhu pakon pamatangku.

10(31-11) Bois do gogohku ibahen horu ni uhur, ampa ari-ari ni goluhku ibahen holsohku; surut do gogohku ibahen panlanggaronku, seng margolle be holi-holingku.

11(31-12) Parbileian do ahu i lobei ni na manosak ahu, ampa bani halak romban rumahku; tarsonggot do na mananda ahu, manimbil bei do na mangidah ahu i dalan.

12(31-13) Ihalupahon ahu songon halak na matei, marosak do ahu songon sanga-sanga.

13(31-14) Hubogei do husip-husip ni buei halak, “Habiaran inggot!” Rap manriah do sidea manguhurhon ahu, mambahen ranggian do sidea laho mambuat goluhku.

14(31-15) Tapi anggo ahu, Bamu do ahu martenger ni uhur, ale Jahowa, ningku do, “Ham do Naibatangku.

15(31-16) Marguru Bamu do goluhku, paluah Ham ma ahu humbani tangan ni munsuhku pakon humbani na mangayak-ayak ahu.

16(31-17) Sondangkon Ham ma bohi-Mu bani juakjuak-Mu, paluah Ham ma ahu marhitei idop ni uhur-Mu.

17(31-18) Ham Jahowa, ulang lopas Ham ahu bador, hu Bamu do ahu dilo-dilo; tarbador ma namin halak parjahat, anjaha masip tuad hu nagori toruh.

18(31-19) Sai sip ma sagala bibir parladung, na jungkat marsahap dompak halak parpintor, gok hatoalon ampa pangapasion.

19(31-20) Banggalni in dear ni layak-Mu, na pinasirsir bani halak na mangkabiari Ham, na binahen-Mu bani halak na martenger ni uhur Bamu, i lobei ni anak ni jolma.

20(31-21) Iondingi Ham do sidea marhitei pangondingion ni bohi-Mu dompak tahi-tahi ni jolma, iponopkon Ham do sidea bani lampolampo dompak sorgang-sorgang ni dilah.

21(31-22) Napuji ma Jahowa, ai tarlobih do idop ni uhur-Ni bangku bani panorang hasosakan.

22(31-23) Tapi anggo ahu, hupingkir hinan do ibagas biarhu: Domma tarbuang ahu humbani panonggor-Mu. Hape itangihon Ham do elek-elekku, sanggah dilo-dilo ahu Bamu.

23(31-24) Sai haholongi nasiam ma Jahowa, nasiam sagala na hinaholongan-Ni! Jahowa do manramotkon sagala halak na bujur, tapi mardapot-dapot do ibalaskon dompak sigijang uhur.

24(31-25) Sai margogoh anjaha totap ma uhur nasiam, sagala na marpangarapan bani Jahowa.”



 <<  Mazmur 31 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel