Haganup na i Tanoh on Sisoya-soya do
1Hata ni Parambilan ai, anak ni si Daud, raja i Jerusalem.
2Sisoya-soya do tongon, nini Parambilan ai, sisoya-soya do haganup.
3Aha ma gunani bani jolma haganup halojaonni, na hinangalutkonni i toruh ni langit?
4Salpu sada sundut, roh sundut na legan, tapi tanoh on lalab do totap.
5Poltak do mata ni ari, dob ai sundut use, anjaha mangolos mulak bani ianan hapoltakonni.
6Mangombus do logou ai dompak dangsina, dob ai mulak dompak utara; marputor-putor do laho logou ai, anjaha mulak use bani habingkatonni.
7Haganup binanga ai mabaor dompak laut, tapi laut ai lanjar do lang ra gok. Bani ianan habaoranni, hujai do binanga ai mangulaki mabaor.
8Haganup do gok halojaon, seng tarpatugah jolma haganupan ai; seng marnasombuh mata mangidah, anjaha seng marnabosur pinggol manangar.
9Aha na dob ongga masa, ai do masa use, anjaha aha na dob ongga ibahen halak, ai do ibahen use, seng dong na baru i toruh ni langit.
10Ai adong, atap aha pe ai, na boi hatahonon ni halak pasal ai, “Tonggor ma, na baru do on?” Domma adong hinan ai sapari, bani panorang na i lobeita.
11Seng dong be na mardingat bani sisapari ai, sonai homa pasal na sihol masa ope, seng dong be na mardingat pasal ai bani na i pudi ni ai.
Na Mangindahi Hapentaran pe Sisoya-soya do
12Ahu, Parambilan ai, ongga do raja bani Israel i Jerusalem.
13Iporluhon uhurhu do marhasoman hapentaran, mamareksa ampa manulimati sagala na tarjadi i toruh ni langit. Horja hangaluton do ai, na tinotapkon ni Naibata bani jolma manisia, ase marhangaluton marhitei ai.
14Domma huidah sagala horja, na hinorjahon i toruh ni langit; tonggor ma, haganupan ai sisoya-soya do, anjaha songon na manangkap logou do.
15Na geduk seng tarpapintor, anjaha na so ijin seng tarbilangi.
16Ningku ma ibagas uhurhu, “Domma hupabuei anjaha hutambahi namin bangku hapentaran lobih humbani sagala sipanrajai na i Jerusalem, anjaha buei do hapentaran pakon habotohon i idah uhurhu.
17Anjaha iporluhon uhurhu do mangarusi hapentaran ampa habotohon, mangarusi haotoon ampa halontongon.” Dapot uhurhu ma, on pe na manangkap logou do hansa.
18Ai lambin buei hapentaran lambin buei do sitaronon, anjaha barang ise na patambah habotohon, patambah hasunsahanni do.
<< Pengkhotbah 1 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel