Alkitab Mobile SABDA
[VER] : [SIMALUNGUN]     [PL]  [PB] 
 <<  Ratapan 3 >> 

Adong do Haluahon humbani Jahowa halani Hinabuei ni Idop ni Uhur-Ni

1Ahu ma sada halak na dihut mangahapkon na maborit marhitei pukul-pukul ni ringisni.

2Ialai anjaha itogu do ahu bani na golap, na so dong sinalsal.

3Tongon sai dompak ahu do itujuhon tanganni, marnunut-nunut layur ari.

4Royut do ibahen angkulangku pakon hulingkulingku, anjaha iparponggol holi-holingku.

5Ipajunjun do dompak ahu inggot na mapaet ampa hasunsahan.

6Ibahen do ahu marianan ibagas hagolapan songon halak na dob dokah matei.

7Ibahen do tembok inggot bangku, seng tarbahen maluah ahu; inahkon do bangku gari na borat.

8Porini pe dilo-dilo anjaha mangelek-elek ahu, seng hona tangihon tonggongku.

9Irungga do dalanku marhitei batu na niongkal, marlegot-legot do ibahen dalanku.

10Songon gipul na manggompangi do Ia bangku, songon singa na marponop.

11Itogu do ahu dompak dalan na kahou, iparsilbak ahu, ibahen do ahu tarpunjung.

12Isintak do siorni, anjaha ipajongjong do ahu songon sasaran ni panahni.

13Ibahen do tolpus ronsi piah-piahku, lingkit ni parlingkitanni.

14Gabe sipartatawaan do ahu bani ganup bangsangku, gabe sidoding-dodingkonon ni sidea ganup ari.

15Ibosuri do ahu bani na mapaet, ipainum do bangku raru.

16Ipaharatkon do bangku batu loting, ipaksahon do ahu masuk hubagas orbuk.

17Ipadaoh do tonduyhu humbani hadameion, gabe lupa ahu bani na madear.

18Jadi ningku ma: Salpu do hamuliaonku, pangarapanku bani Jahowa.

19Mardingat bani sitaronon ampa hasunsahanku, pogu ampa rasun do ai bangku.

20Tongtong mardingat hujai, gabe unduk do tonduyhu ibagas.

21On do tong huparimbagaskon, halani ai do ase marpangarapan ahu:

22Idop ni uhur ni Jahowa do na so ra marpunsa, seng marnarotap holong ni atei-Ni.

23Mulak ratah do ai siap sogod, banggal do habonaron-Mu.

24Jahowa do rupeihu, nini tonduyhu, halani ai Bani do ahu marpangarapan.

25Pardear layak do Jahowa bani halak na martenger ni uhur Bani, bani tonduy na mangindahisi.

26Dear do sipsip marpangarapan bani hatuahon na humbani Jahowa.

27Dear do sada halak anggo mangusung pasangan ia sanggah poso.

28Punjung ma ia hundul anjaha sip, anggo itampeihon Tuhan ai bani.

29Ipadohor ma bani orbuk pamanganni, andohar dong ope pangarapan.

30Itarehon ma huyumni bani halak sipanompas, ronsi bosur ia bani pandorunion.

31Ai seng ra Tuhan in mangambukkon halak ronsi sadokah ni dokahni.

32Ai age pe domma marhoru ibahen, holong do use uhur-Ni romban hubani hinabuei ni idop ni uhur-Ni,

33ai sedo halani rosuh-Ni, ase iarsik anjaha ipusoki uhur ni anak ni jolma.

34Mandogei-dogei halak na tartutup i tanoh on,

35papeletkon hak ni halak i lobei ni Sitimbulan in,

36mangodoh halak bani parkarani, ai seng kawahkonon ni Tuhan ai?

37Ise ma, na marsahap gabe jadi ai, anggo sedo Tuhan na mamarentahkon?

38Ai lang humbani pamangan ni Sitimbulan in do luar hamagouan ampa hatuahon?

39Mase marungut-ungut jolma na manggoluh in? Dompak dousani ma ia marungut-ungut.

40Uji anjaha pareksa hita ma parlahouta, mulak ma hita bani Jahowa.

41Dear ma angkat hita uhurta ampa tanganta bani Naibata na i surga.

42Domma marbalik hanami anjaha manlawan, seng iampuni Ham hanami.

43Ringis do irungkubkon Ham Bamu, anjaha ipardakdak Ham do hanami; ibunuh Ham do hanami, seng maralang-alang.

44Irungkub Ham do diri-Mu bani hombun, gabe seng boi tolpus tonggo.

45Ibahen Ham do hanami gabe tompoh-tompoh ampa sihagigihonon i tongah-tongah ni bangsa-bangsa.

46Sagala munsuhnami pangangang babahni dompak hanami;

47hasonggotan pakon godung do mandorab hanami, hasedaon ampa hamagouan.

48Marabur-abur iluh do matangku songon binanga halani hasedaon ni boruni bangsangku.

49Seng marnamangadi iluhku mabaor, seng marnasoh,

50paima manatap anjaha mangkawah Jahowa hun surga;

51matangku mambahen pusok ni uhurhu halani pangahapan ni haganup boru ni hutangku.

52Hona ayak-ayak do ahu songon manuk-manuk, ibahen munsuhku seng marhala.

53Manggoluh do ahu iunjomkon hubagas godung, anjaha ipargijig ahu bani batu.

54Isalpui bah do ulungku, gabe huhatahon, ʻMagou ma ahu!ʼ

55Dilo-dilo do ahu bani goran-Mu, Ham Jahowa, humbani parbagasan ni godung ai;

56itangihon Ham do sorangku. Ulang ma tutup Ham pinggol-Mu dompak dilo-dilongku ampa elek-elekku!

57Roh do Ham hun dohor sanggah na dilo-dilo ahu Bamu, nimu, ʻUlang mabiar!ʼ

58Ham do, ale Tuhan, na mantinggilhon partinggilanku, ipaluah Ham do hosahku.

59Iidah Ham do, ale Jahowa, odoh-odoh bangku, pintori Ham ma ahu.

60Iidah Ham do sagala sura-sura pambalason ni sidea, haganup tahi-tahini sidea dompak ahu.

61Ibogei Ham do, ale Jahowa, pandorunionni sidea, pakon haganup tahi-tahini sidea dompak ahu.

62Sahap-sahap ni imbangku ampa pingkiran ni sidea roh mandorab ahu ari-ari.

63Sanggah na hundul sidea atap jongjong, tonggor Ham ma, ahu do gabe doding-doding bani sidea.

64Ham ma na mambalaskon bani sidea, ale Jahowa, romban hubani pambahenan ni tanganni.

65Ham ma na pahengkeng uhur ni sidea, papa-Mu ma mangonai bani sidea.

66Ham ma na mardakdak sidea ibagas gila-Mu, anjaha Ham ma na mamboiskon sidea hun toruh ni langit-Mu, ale Jahowa!”



 <<  Ratapan 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel