Alkitab Mobile SABDA
[VER] : [SIMALUNGUN]     [PL]  [PB] 
 <<  Roma 7 >> 

Seng be Titah Simada na Porsaya, Tapi Kristus do

1Ai lang ibotoh nasiam, nasiam sanina (hubani na mambotoh titah do hatangkon), na igomgomi titah do jolma, sadokah manggoluh ia?

2Sada naboru, na dob tarsangkut do ia marhitei titah bani paramangonni, sadokah manggoluh dalahi ai, tapi anggo domma matei dalahi ai, bebas ma naboru ai humbani titah dompak dalahi ai.

3Halani ai parbangkis do ia goranon, anggo laho ia bani dalahi na legan, sanggah manggoluh ope paramangonni. Tapi, anggo domma matei dalahi ai, bebas ma ia humbani titah, seng be parbangkis ia goranon, anggo laho ia bani dalahi na legan.

4Sonai ma nasiam, ale hasoman, domma matei nasiam bani titah in marhitei daging ni Kristus, ase na legan simada nasiam, ai ma na dob puho humbani na matei in, ase marbuah hita bani Naibata.

5Ai, sanggah ibagas daging hita, margogoh do hisap pardousaon in ibagas pagorinta halani titah in, gabe naparbuahkon hamatean.

6Tapi sonari domma sirang hita humbani titah in, matei bani sipanjolomi hita hinan, ase pambalosi hita ibagas habayuon ni Tonduy in, ulang be ibagas haburukon ni surat ni titah in.

Titah na Dear in Gabe Sihorhon Dousa

7Ase sonaha ma hatahononta? Dousa do titah in? Seng sonai! Tapi seng na hutanda dousa, anggo seng marhitei titah in. Ai seng na hubotoh hisap-hisap in, ambit lang ihatahon titah in, “Ulang ho marhahisapon.”

8Marbona humbani titah in, ipuhoi dousa in do ibagas ahu bagei ni hisap-hisap; ai matei do dousa, anggo seng adong titah.

9Manggoluh do ahu hinan, seng martitah. Tapi roh ma titah in, gabe manggoluh ma dousa in.

10Tapi anggo ahu matei do, ase gabe hamatean do bangku titah in, sihorhon hagoluhan namin.

11Ai marbona hunjai, ipaoto-oto anjaha ipamatei dousa in do ahu marhitei titah in.

12Ase na pansing do titah in, pansing do tonah ni Naibata, pintor anjaha dear.

13Ai gabe hamatean do bangku na madear in? Seng sonai! Tapi dousa in do paroh hamatean bangku marhitei na madear, ase talar dousa in, anjaha tidak jahatni na tarlobih in marhitei titah in.

Kuasa ni Dousa Ibagas Diri ni Jolma

14Ai ibotoh hita, partonduyon do titah in; tapi paruhur daging do ahu, na dob tarjual bani dousa.

15Ai seng huarusi na hubahen in; ai seng na huharosuhkon ai huhorjahon, tapi na huhagigihon ai do hulahoi.

16Tapi anggo huhorjahon na so huharosuhkon, na husatujui ma hadearon ni titah in.

17Ase sedo ahu na mangkorjahon ai, tapi dousa ai do na marianan ibagas ahu.

18Ai hubotoh do, seng dong na madear marianan ibagas ahu, ai ma ibagas dagingku. Ia sihol ni uhur jumpah do namin bangku, tapi na mandalankon na madear seng dong jumpah.

19Ai seng huhorjahon na madear, na hinarosuhkonkai, tapi na sambor, na so huharosuhkon do hubahen.

20Jadi anggo hubahen na so huharosuhkon, seng ahu na mangkorjahon ai, tapi dousa ai do na marianan ibagas ahu.

21Ase on ma titah na jumpah ahu ibagas diringku: Na madear do husurahon sihol bahenonku, tapi na masambor do huhorjahon.

22Ai ihamalaskon jolma parbagas na bangku ai do namin titah ni Naibata,

23tapi huidah do titah na legan ibagas pagori ni dagingku, na marmunsuh dompak titah na ibagas uhurhu, gabe ipatunduk do ahu bani titah ni dousa, na adong ibagas pagoringku.

24Aih, ahu jolma na masombuh on. Ise ma na paluahkon ahu hun bani angkula hamatean on?

25Tarima kasih ma bani Naibata marhitei Jesus Kristus Tuhanta in. Ase, sonai ma nuan: Ahu sandiri mambalosi titah ni Naibata marhitei uhurhu ibagas, tapi marhitei daging, titah ni dousa do.



 <<  Roma 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel