Na Dua Batu na Baru Panuratan ni Titah ai. Parpulig ni Marga Levi
1Ijia nini Jahowa ma hu bangku, “Lala ma bam panuratan batu songon na parlobei ai, anjaha tangkog ma ho marayak Ahu hu atas dolog on, ambah ni ai bahen ma bam sada poti-poti humbani hayu,
2ase Husuratkon hubani panuratan batu ai hata na bani panuratan batu na parlobei ai, na dob binolahkonmai, dob ai nahkon ma ai hubagas poti-poti ai.”
3Jadi hubahen ma sada poti humbani hayu maranti anjaha hulala ma dua panuratan batu songon na parlobei ai; dob ai tangkog ma ahu hu dolog ai; anjaha panuratan batu na dua ai ibagas tanganku.
4Dob ai isuratkon ma hubani panuratan ai, songon panuratkonni bani na parlobei ai, titah na sapuluh in, na hinatahon ni Jahowa hubani nasiam i atas dolog ai hun tongah-tongah ni apuy, sanggah ari partumpuan ondi, dob ai ibere Jahowa ma ai bangku.
5Dob ai marhusor ma ahu anjaha tuad hun dolog ai, anjaha hunahkon ma panuratan ai hubagas poti na dob hupauli ai; anjaha lanjar ijai ma ai, songon na pinarentahkon ni Jahowa bangku.
6Bingkat ma halak Israel hun Beerot-Bene-Jaakan hu Mosera; ijai do matei si Aron, lanjar tartanom ijai, jadi anakni, si Eleasar ma bangkit malim gantihni.
7Bingkat ma use sidea hunjai hu Gudgodah, anjaha hun Gudgodah hu Jobata, ai ma tanoh na marbah bolon.
8Ijia ma ipapulig Jahowa marga Levi, gabe siusung poti parpadanan ni Jahowa, anjaha jongjong i lobei ni Jahowa, marugas Bani, pakon mamasu-masu marhitei goran-Ni, ronsi sadari on.
9Halani ai seng dapotan parbagianan barang tean-teanan halak Levi rap pakon saninani, Jahowa do tean-teananni songon na hinatahon ni Jahowa Naibatamu hu bani.
10Jongjong ma ahu i atas dolog ai, songon na bani ari parlobei ai, ompat puluh ari ompat puluh borngin dokahni, anjaha itangihon Jahowa do ahu age sahali on; seng marosuh Ia magou ham.
11Anjaha nini Jahowa ma hu bangku, “Jongjong ma ho, bingkat ma mambobahon bangsa in, ase masuk sidea anjaha isoluk tanoh ai, na dob Hubulawankon hinan hubani ompung ni sidea, laho mamberehon ai bani sidea.”
Sipaingat Mangkatahon Maruhur Biar Mangidah Naibata
12Sonari pe, alo Israel, aha do na pinindo ni Jahowa Naibatamu hun bamu, ai lang ase marhabiaran ham bani Jahowa Naibatamu, mardalan ham bani ganup dalanni, haholonganmu Ia, balosanmu Jahowa Naibatamu humbani ganup uhurmu pakon ganup hosahmu,
13anjaha ramotanmu tonah pakon aturan ni Jahowa, na hutonahkon bamu sadari on bahen hasonanganmu?
14Tonggor ma, guru bani Jahowa Naibatamu do langit ni langitan, tanoh pakon ganup isini.
15Hape pitah hubani ompungmu do Jahowa marosuh ni uhur, ihaholongi do sidea anjaha ipilih do ginompar ni sidea i pudi ni sidea, ai ma nasiam humbani sagala bangsa, songon sadari on.
16Antong sunat nasiam ma sibur-sibur ni uhur nasiam, anjaha ulang be hengkeng uhur nasiam.
17Ai Jahowa Naibata nasiam, Ia do Naibata ni sagala naibata, anjaha Tuhan ni sagala tuan, Naibata na timbul, na gogoh anjaha na jombut, na so sitonggor jumbak anjaha na so ra manjalo sisip.
18Ia do pasintong uhum hubani na tading maetek pakon hubani puang-puang na mabalu, holong do uhur-Ni bani halak dagang, anjaha ibere do ia sipanganon pakon parhiouon.
19Halani ai haholongi nasiam ma halak dagang, ai halak dagang do age nasiam na ijia i tanoh Masir.
20Maningon marhabiaran do ham bani Jahowa Naibatamu, maningon Ia do balosanmu, anjaha marsijoloman uhurmu Bani, anjaha hubani goran-Ni ham marbija.
21Ia do puji-pujionmu, anjaha Ia do Naibatamu na dob mambahen bamu habanggalon pakon halongangan on, na dob nididah ni matamu.
22Pitu puluh do ompungmu tuad hu Masir, hape nuan domma itumpak Jahowa Naibatamu ham, songon bintang na i langit bueini.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel