Panratahion bani Panaktakkon ni Naibata bani Titah na Sapuluh in
1Dob ai ipatumpu si Musa ma haganup halak Israel, nini ma dompak sidea, “Tangihon ma alo Israel, aturan pakon uhum, sihatahononku hubani pinggol nasiam sadari on, ase iguruhon nasiam ma in anjaha iparimbagaskon, laho mangkorjahonsi.
2Domma ibahen Jahowa, Naibatanta in padan hu banta i Dolog Horeb.
3Seng hubani bapanta Jahowa mambahen padan on, tapi hu banta do, hu banta on, na manggoluh ganup nuan ijon.
4Padumpar bohi do Jahowa, mangkatahon hata-Ni hu banta i atas ni dolog, hun tongah-tongah ni apuy.
5Ahu do ijia jongjong i tongah-tongah, laho patugahkon bani nasiam hata ni Jahowa; mabiar do nasiam mangidah apuy ai, anjaha seng tangkog nasiam hu atas dolog ai, jadi nini ma,
6Ahu do Jahowa, Naibatamu, na paluarhon ho hun tanoh Masir, hun rumah parjabolonanmu.
7Lang malo ho marnaibata na legan i lobei ni bohing-Ku.
8Lang malo bahenonmu bam gana-gana barang suman-suman ni atap aha pe na i babou i nagori atas, age na i toruh ibagas tanoh on, ronsi na ibagas bah i toruh ni tanoh.
9Lang malo sombahonmu in atap balosanmu, ai Ahu do Jahowa Naibatamu, Naibata parsimburu, na mambalaskon hajahaton ni bapa hubani anakni ronsi sundut patoluhon pakon paompatkon, sagala na marsogam ni uhur Bangku.
10Tapi maidop do uhur-Hu bani na maribu-ribu, na mangkaholongi Ahu, na manramotkon sagala titah-Ku.
11Lang malo sobutonmu goran ni Jahowa Naibatamu ibagas hampung ni uhur, ai seng apitan ni Jahowa barang ise na manobut goran-Ni ibagas hampung ni uhur.
12Ramotkon ma ari Sabat in laho papansingkonsi, songon na tinonahkon ni Jahowa Naibatamu bam.
13Onom ari ma ho marhorja anjaha mangkorjahon sagala horjamu,
14tapi anggo ari papituhon in ari parsaranan ni Jahowa Naibatamu do in: Lang malo bahenonmu ijin age horja aha pe, ho atap anakmu atap borumu atap jabolonmu dalahi atap jabolonmu naboru atap lombumu atap halodemu atap pinahanmu na ijahanin pe atap na tondok ibagas hutamu, ase marsaran jabolonmu dalahi pakon jabolonmu naboru usih songon ho.
15Maningon ingatonmu do, jabolon do ho na ijia i tanoh Masir, gabe iarahkon Jahowa Naibatamu ho luar hunjai marhitei tangan na gogoh pakon botokon na toltol, halani ai do ase iparentahkon Jahowa Naibatamu ho papansingkon ari Sabat in.
16Maningon pasangaponmu ma bapamu pakon inangmu songon na tinonahkon ni Jahowa Naibatamu bam, ase dokah ho manggoluh anjaha marhasonangan ho i tanoh, na binere ni Jahowa Naibatamu bam.
17Ulang ho mamunuh.
18Ulang ho marbangkis.
19Ulang ho manangko.
20Ulang ho ra manaksihon ladung dompak hasomanmu.
21Lang malo uhur-uhuranmu rumah ni hasomanmu, anjaha lang malo uhur-uhuranmu urang rumah ni hasomanmu, jumani barang jabolonni dalahi barang jabolonni naboru barang lombuni barang halodeni atap aha pe ugas ni hasomanmu.”
22In ma hata in, na hinahaton ni Jahowa bani ganup tumpuan nasiam i atas dolog hun tongah-tongah ni apuy, hombun pakon na golap marimpot-impot marhasoman sora na gogoh, anjaha seng itambahi be. Anjaha isuratkon ma ai bani dua batu panuratan, anjaha ibere ma in bangku.
23Tapi dob ibogei nasiam sora hun tongah-tongah ni hagolapan ai, anjaha gara dolog ai ibagas apuy, roh ma nasiam hun dohor hu bangku, ganup kopala nasiam mar sasamarga pakon sintua nasiam,
24anjaha ihatahon nasiam, “Tonggor ma, domma ipataridahkon Jahowa, Naibatanta in, hu banta hamuliaon-Ni pakon hatimbulon-Ni, anjaha ipabogeihon hu banta sora-Ni hun tongah-tongah ni apuy, anjaha domma ididah hanami sadari on, Naibata marsahap pakon jolma, hape tong do manggoluh.
25Sonari pe, mase ma rahanan maningon matei hanami? Ai siap ma hanami panganon ni apuy na bolon on; anggo ipabogei-bogei hanami ope sora ni Jahowa, Naibatanta in, maningon matei do hanami.
26Ai ise ma humbani sagala na manggoluh, na mambogei hata ni Jahowa, marsahap hun tongah-tongah ni apuy, songon hita na mambogei ai, anjaha tong manggoluh?
27Ham ma laho hun dohor, anjaha bogei ham ma ganup, na sihol hatahonon ni Jahowa, Naibatanta in; anjaha patugah ham ma bennami ganup na hinatahon ni Jahowa Naibatanta in bamu; sai tangihononnami anjaha horjahononnami do in.”
28Jadi dob ibogei sora ni hata nasiam ai, na hinatahon nasiam ai bangku, gabe ihatahon Jahowa ma hu bangku, “Domma hubogei hata ni bangsa on, ai ma na hinatahon ni sidea bam; dear do ganup na hinatahon ni sidea ai.
29Ambit sonin ma tong paruhuron ni sidea, marhabiaran hu Bangku anjaha iramotkon ganup tonah-Ku, sadokah manggoluh sidea, gabe marhasonangan ma sidea pakon ginompar ni sidea ronsi sadokah ni dokahni.
30Laho ma ho, patugah ma hubani sidea, ʻMulak ma hanima hu lampolamponima bei!ʼ
31Tapi anggo ho, jongjong ma ho ijon, i lambungkon, ase Hupatugah bam ganup tonah, aturan pakon uhum, sagala sipodahkonon-Ku bani sidea, ase ibahen sidea ai i tanoh sibereon-Ku bani sidea bahen parbagiananni.
32Antong haporluhon nasiam ma mangkorjahon, songon na tinonahkon ni Jahowa, Naibata nasiam in bani nasiam, ulang manlembang nasiam hu siamun barang hu sambilou.
33Marparlahou ma nasiam ibagas haganup dalan, na dob tinonahkon ni Jahowa, Naibata nasiam in bani nasiam, ase manggoluh nasiam, anjaha marhasonangan nasiam, anjaha dokah nasiam manggoluh i tanoh siteanon nasiam in.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel