Jerusalem Ipausih bani Sada Naboru na So Bujur bani Paramangonni
1Dob ai roh ma hata ni Jahowa hu bangku, mangkatahon,
2“Ale anak ni jolma, pabotohkon ma bani Jerusalem sagala hasamboronni,
3anjaha hatahon ma, sonon do hata ni Tuhan Jahowa bani Jerusalem, ʻHarohanmu ampa hatubuhanmu tanoh ni halak Kanaan do, bapamu halak Amori do anjaha inangmu boru Het.
4Anjaha partubuhmu sonon do: Bani ari partubuhmu seng irotap pusogmu, anjaha seng iparidi ho bani bah laho paborsihkon ho; seng ilapuhon bam garam, barang ibalutkon bam ampan.
5Ise pe lang dong na maridop ni uhur bam laho mambahen na sonai ai bam, halani holong ni uhurni bam, tapi iambungkon do ho hu darat, halani magigi do halak mangidah ho bani partubuhmu.ʼ
6Anjaha sanggah na montas Ahu hun lambungmu, anjaha huidah ho margulu-gulu ibagas darohmu, jadi ningku ma dompak ho na margulu-gulu daroh ai, ʻManggoluh ma ho!ʼ tongon, Huhatahon do bam, ho na margulu-gulu daroh, ʻManggoluh ma ho!
7Anjaha marbanggal ma ho songon suan-suanan na i ladang. Jadi magodang ma ho, matoras anjaha jenges, punar bagod-bagodmu anjaha marganjang jambulanmu, tapi seng marhiou anjaha talanjang do ho.
8Jadi sanggah na montas Ahu hu lambungmu use, anjaha mangkawah Ahu bam, tonggor ma, jumpah ma panorangni boi ma riridon ho. Jadi Hupaherbang ma hiou-Hu bam, laho manrungkub hatalanjangonmu, marbulawan ma Ahu bam, anjaha marpadan ma Ahu pakon ho,ʼ nini Tuhan Jahowa, ʻJadi Ahu ma simada ho.
9Jadi Huparidi ma ho bani bah, anjaha Huusah ganup daroh ai hun bam, Huminaki ma ho bani minak.
10Huparhioui ma ho marhitei pakeian na marbagei rupani, anjaha Hubahen ho marsipatu kulit na maharga; Hubahen ma ho marsabing-sabing na alus ampa martudung-tudung sitora.
11Hubahen ma ugasmu buei; golang Hubahen bani tanganmu anjaha sinongkok bani borgokmu.
12Hubahen ma tintin bani igungmu, anting-anting bani pinggolmu, ampa sortali na majenges bani ulumu.
13Jadi jenges ma ho halani omas ampa pirak ai; pakeianmu humbani hiou na alus, humbani sitora ampa hiou na marbagei rupani. Mangan topung na alus ma ho, manisan ampa minak. Gabe jenges tumang ma ho, talup tongon gabe raja.
14Jadi sar ma baritamu hu tongah-tongah ni bangsa-bangsa halani hinajengesmu, panjagar na Hubahen bam,ʼ nini Tuhan Jahowa.
15ʻTapi martenger ni uhur do ho bani hinajengesmu, anjaha mambahen parriah-riahan do ho halani tarmurmur ipabangkiskon ho do dirimu bani ganup halak na mamontas.
16Ibuat ho do deba humbani pakeianmu, laho paulihon bam panumbahan bani buntu-buntu, anjaha ijai idalankon ho do parbangkison; na sonai ai seng ongga anjaha seng anjai masa be.
17Ibuat ho do homa ugasmu na jenges in, na pinauli humbani omas ampa pirakku, na Hubere bam; ipauli ho do hunjai gana-gana dalahi anjaha marbangkis do ho pakonsi.
18Ibuat ho do pakeianmu sibagei rupa ai, laho mangkioui ai, anjaha inahkon ho do minak-Ku ampa dahupang-Ku i lobeini.
19Anjaha sipanganon, na Hubere bam, ai ma topung na alus, minak ampa manisan, na Hubere bam bahen sipanganonmu, inahkon ho do ai hu lobeini gabe galangan na misbou,ʼ nini Tuhan Jahowa.
20ʻAmbah ni ai ibuat ho do anakmu pakon borumu, na tinubuhkonmu Bangku, anjaha igalangkon ho do sidea bani sidea, gabe sipanganonni. Ai hurang ope parbangkisonmai,
21ase isayati ho ope anak-Ku, anjaha iondoskon ho sidea tutungon ibagas apuy laho manombah sidea?
22Anjaha bani haganup hasamboronmu ampa parbangkisonmai seng idingat ho panorang haposoonmu, ai ma sanggah na so marhiou ampa na talanjang ai ho, na margulu-gulu daroh ai ho.
23Anjaha dob ibahen ho sagala hajahaton ai - ʻbursik, bursik ma ho,ʼ nini Tuhan Jahowa -
24ipauli ho do bam anjapanjap ianan marbangkis, anjaha ibahen ho do bam ianan na pinagijang bani ganup alaman.
25Tongon, bani ganup sirpang ni dalan ipauli ho do ianan na pinagijang, anjaha ibere ho do maseda hajengesonmu, iondoskon ho do dirimu bani ganup pamontas anjaha buei do parriah-riahan idalankon ho.
26Marriah-riah do ho homa pakon halak Masir, simbalogmu na garang ai; buei do parriah-riahan idalankon ho, mambahen manringis Ahu.
27Halani ai tonggor ma, Hupagostong do tangan-Ku manlawan ho, anjaha Huorui tanoh parbagiananmu, huondoskon do ho bani munsuhmu paruhur haut, ai ma boru Palistim, na maila mangidah parlahou hasamboronmu.
28Marriah-riah do homa ho pakon halak Assur, halani lape sombuh uhurmu, marriah-riah do ho tene pakon sidea, hape lanjar do seng sombuh uhurmu.
29Lambin itambahi ho do parriah-riahonmu pakon nagori partiga-tiga ai, ai ma Kasdim, tapi age marhitei ai lanjar do seng sombuh uhurmu.
30Garang ni ai uhurmu,ʼ nini Tuhan Jahowa, ʻgabe ihorjahon ho haganupan ulah ni boru jalang na bolon,
31ipauli ho do anjapanjap ianan marbangkis bani sirpang ni ganup dalan, anjaha ibahen ho do bam ianan na pinagijang bani ganup alaman; tapi sedo boru jalang na somal ho, ai itulak ho do upah.
32Ale parinangon siparbangkis na manrohop halak na legan gantih ni paramangonni sandiri.
33Ibere halak do upah bani boru jalang, tapi anggo ho, ho use marsibere-bere bani hasomanmu marriah-riah, mambere sisip do ho ase roh sidea hunja-hunja mangayaki ho, laho marriah-riah pakon ho.
34Ase legan do parriah-riahonmu marimbang naboru na legan, sedo halak na mangirik-irik ho, sedo halak na mambere upah bam, tapi ho do na marsibere-bere; halani ai do, ase na legan do ho.ʼ
35Halani ai, ale boru jalang, tangihon ma hata ni Jahowa.
36Sonon do hata ni Tuhan Jahowa, ʻHalani na dob ipatalar ho hailaonmu anjaha ipatidak ho hatalanjangonmu sanggah na marriah-riah ho pakon hasomanmu marriah-riah, ampa pangkorhon ni haganup gana-ganamu hagigi in ampa pangkorhon ni daroh ni anakmu, na ginalangkonmu bani sidea,
37halani ai, tonggor ma, pahumpulon-Ku ma haganup sihaholongi ho, hasomanmu marmalas-malas ni uhur, haganup sidea na hinaholonganmu ampa haganup sidea na hinagigihonmu. Patumpuon-Ku do sidea humbani ganup ianan, anjaha patidakon-Ku do hailaonmu bani sidea, ase ididah sidea ganup hailaonmu.
38Dabuhon-Ku do uhum bam songon na bani boru jalang ampa bani naboru siduruskon daroh; parohon-Ku do bam ringis ampa parsimburuon
39Anjaha ondoskonon-Ku do ho hubagas tangan ni sidea, parsedaon ni sidea do anjapanjap parriah-riahanmu, reongkonon ni sidea do iananmu na pinagijang ai; tanggalon ni sidea do pakeianmu, buaton ni sidea do ugasmu na majenges in, anjaha paturuton ni sidea do ho talanjang, seng marhiou.
40Suruhon ni sidea do ho dompak sada humpulan, pargijigon ni sidea ma ho bani batu, anjaha tampulonni do ho bani podang ni sidea.
41Tutungon ni sidea ma rumahmu, anjaha dalankonon ni sidea ma uhum bam, i lobei ni buei naboru; parontihonon-Ku ma parriah-riahonmai, gabe seng be padalan sibere-bere ho.
42Jadi sombuh ma ringis-Ku dompak ho, anjaha seng be marsimburu Ahu bam, sonang ma Ahu, seng be manringis.
43Halani seng idingat ho panorang haposoonmu, tapi ipuhoi ho do ringis-Ku marhitei ai haganup, halani ai, tonggor ma, balaskonon-Ku do pambahenanmu bani ulumu,ʼ nini Tuhan Jahowa. ʻAi lang habutakon do ihorjahon ho tambah ni hasamboronmai?ʼ”
Ipatotap Jahowa do Padan-Ni bani Jerusalem
44“Tonggor ma, haganup halak na marumpamahon ho, mangkatahon, ʻSonai inangni, sonai do boruni.ʼ
45Boru ni inangmu do ho, ai ma na soganan ai bani paramangonni ampa bani anakni; sanina ni saninamu do ho, ai ma sidea na mangambukkon paramangonni ampa anak ni sidea, halani magigi. Boru Het do inangnima anjaha bapanima halak Amori.
46Abangmu do Samaria, ai ma na marianan pakon boruni hampit sambiloumu; anjaha anggimu, na marianan pakon boruni hampit siamunmu, ai ma Sodom.
47Tapi bani mungkahni seng songon parlahou ni sidea parlahoumu, seng ihorjahon ho romban hubani hagigi na hinorjahon ni sidea; tapi lang pala piga dokah, gabe samboran do ho marimbang sidea bani sagala pambahenanmu.
48Songon sintongni manggoluh Ahu,ʼ nini Tuhan Jahowa, ʻseng dong ihorjahon Sodom, anggimai pakon boruni songon hasamboron na hinorjahonmai ampa borumu.
49Tonggor ma, on do salah ni Sodom ampa boruni: Margijang ni uhur, marmewah-mewah ampa pasonang-sonangkon diri do ia ampa boruni, tapi halak na miskin ampa na masombuh, seng iurupi sidea.
50Margijang ni uhur do sidea, anjaha ihorjahon hasamboron i lobei-Hu, halani ai do ase Huambukkon sidea songon na ididah ho.
51Seng ihorjahon Samaria satongah ni dousamu; bahatan do hasamboron ihorjahon ho ase ia; gabe songon na pintor do abangmai pangkorhon ni sagala hasamboron na hinorjahonmai.
52Ho pe, porsan ma habadoronmai, ho na mambahen moru uhum na bani saninamai; halani bajanan do pambahenanmu ase sidea, gabe pintoran do sidea marimbang ho. Patut ma maila ho, anjaha porsan ma habadoronmin, ai gabe songon na pintor do saninamu halani pambahenanmai.
53Tapi pasuangon-Ku do sidea, ai ma Sodom pakon boruni, sonai Samaria pakon boruni, anjaha pasuangon-Ku do age ho rap pakon sidea,
54ase iporsan ho habadoronmu anjaha maila ho mardingat sagala pambahenanmu, anjaha marhiteihon ni ai do sabou pangahap ni sidea ibahen ho.
55Ia abangmu Sodom ampa boruni mulak suang do, Samaria pe pakon boruni mulak suang do; ho pe ampa borumu mulak suang do songon sapari.
56Ai lang gabe umpama do abangmu Sodom ibagas pamanganmu, bani panorang hagijangon ni uhurmu,
57sanggah lape ipatalar hajahatonmu? Sonari gabe doskonsi do ho, gabe sirisa-risaon bani boru Sodom ampa simbalogni inggot, bani boru Palistim, na inggot mapas mangidah ho.
58Habutakonmai ampa hasamboronmai, maningon porsanonmu do ai,ʼ nini Jahowa.
59Tongon, sonon do nini Tuhan Jahowa, ʻBahenon-Ku do hu bam domu songon na binahenmai, ai ma na mapas ai ho bani bulawan, anjaha iosei ho padan.
60Age pe sonai, ingaton-Ku do padan-Ku bam bani panorang haposoonmu, anjaha pajongjongon-Ku do padan sisadokah ni dokahni pakon ho.
61Jadi taringat ma ho bani parlahoumu anjaha bador ho, anggo Huain ma abangmu pakon anggimu, anjaha Hubere sidea gabe boru bam, age pe seng maronjolan ai hubani padan na Hubere bam.
62Anjaha pajongjongon-Ku do padan-Ku hu bam, ase ibotoh ho, Ahu do Jahowa,
63ase tong idingat ho ai, gabe maila ho, anjaha seng be mungkab pamanganmu halani habadoronmu, anggo Husaloseihon ma ganup binahenmai,ʼ” nini Tuhan Jahowa.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel