Alkitab Mobile SABDA
[VER] : [SIMALUNGUN]     [PL]  [PB] 
 <<  Yohanes 1 >> 

Hata In na gabe Daging

1Bani mungkahni domma adong Hata in, anjaha rap pakon Naibata do Hata in, anjaha Naibata do Hata in.

2Rap do in pakon Naibata bani mungkahni.

3Haganup marhiteihon-Si do ase adong, anjaha seng dong na dob dong in, na so marhiteihon-Si.

4Ibagas Hata in do hagoluhan, anjaha hagoluhan in do panondang ni hajolmaon,

5Na marsinondang do panondang in ibagas na golap, tapi seng ijalo na golap in.

6Bangkit ma sada halak, na sinuruh ni Naibata, na margoran si Johannes.

7Laho manaksihon do ia ase roh, ase isaksihon panondang in, ase haganup porsaya marhiteihonsi.

8Seng ia panondang in, tapi sisaksihon panondang in do ia.

9Panondang na sintong in, na manondangi ganup jolma do, na roh hu dunia on.

10I dunia on hinan do Ia, anjaha marhiteihon-Si do adong dunia on, hape seng itanda dunia on Ia.

11Na roh do Ia marayak na dong Bani, tapi seng ijalo na dong Bani in Ia.

12Tapi barang piga na manjalo-Si, hujai do ibere kuasa, ase gabe anak ni Naibata sidea, ai ma na porsaya bani goran-Ni.

13Ai ma na so tubuh humbani daroh barang humbani rosuh ni daging barang humbani rosuh ni dalahi, tapi humbani Naibata do.

14Gabe daging ma Hata in anjaha marianan i tongah-tongahta; jadi ididah hanami ma hasangapon-Ni songon hasangapon ni Anak Sasada na humbani Bapa in, gok idop ni uhur ampa hasintongan.

15Isaksihon si Johannes do Ia, nini do marsora na gogoh, “On do Ia na huhatahon ai, na roh hun pudingku; lobeinan do Ia adong ase ahu, ai parlobei hinan do Ia.

16Hun bani habayakon-Ni do haganup hita manjalo, ai ma idop ni uhur na marnunut.

17Marhitei si Musa do ibere titah, tapi marhitei Jesus Kristus do manjadi idop ni uhur ampa hasintongan.

18Ise pe lang na ongga mangidah Naibata; Anak na sasada in, na bani abingan ni Bapa in, Ia do na pabotohkonsi.”

Hasaksian ni si Johannes Pandidi Pasal Dirini

19On do hasaksian ni si Johannes, sanggah roh hubani malim ampa halak Lepi hun Jerusalem, na sinuruh ni halak Jahudi na ijai ai, laho manungkunsi, atap ise do ia.

20Jadi iakuhon do, seng iporsou, nini ma, “Sedo Ahu Kristus in.”

21Isungkun sidea ma ia, “Ise do, anggo sonai? Ai si Elias do ham?” Jadi nini ma, “Seng ahu ai! Ham do nabi na pinarbagah ai?” Balosni, “Lang!”

22Dob ai nini sidea ma hu bani, “Ise do anggo sonai, ase tarbalosi hanami na marsuruh hanami. Aha do hatahononmu pasal ham?”

23Jadi nini ma, “Ahu, ai ma sora na dilo-dilo i halimisan, ?Papintor ma dalan ni Tuhan in!? songon na hinatahon ni Nabi Jesayas.”

24Ia na sinuruh ai humbani halak Parisei do.

25Jadi nini sidea ma manungkunsi, “Mase ma mandidi ham, anggo seng Kristus ham, atap si Elias atap nabi ai?”

26Jadi nini si Johannes ma mambalosi sidea, “Ia ahu bah do hudidihon, tapi domma jongjong i tongah-tongah nasiam Ia, na so tinanda nasiam in,

27na roh hun pudingku, anjaha na hurang talup do ahu mananggali tali ni sipatu-Ni.”

28I Betania do ai masa, i dipar ni Bah Jordan, ijai do ianan ni si Johannes mandidi.

Hasaksian ni si Johannes Pandidi Pasal Jesus

29Patarni ai ididah si Johannes ma Jesus roh hu bani, gabe nini ma, “Tonggor ma, Ia do biribiri ni Naibata, na mamorsan dousa ni dunia on!

30Ia do ai na huhatahon ai, i pudingku roh do sada halak, na dob parlobei do Ia adong ase ahu, ai parlobei do Ia adong ase ahu.

31Ahu pe seng hutanda hinan Ia, tapi ase talar Ia bani bangsa Israel, ai do ase roh ahu mandidihon bah.”

32Dob ai isaksihon si Johannes ma, nini ma, “Huidah do Tonduy in susur songon asas hun nagori atas anjaha marianan Bani.

33Ahu pe seng hutanda hinan Ia. Tapi Ia na marsuruh ahu mandidihon bah, Ia do mangkatahon hu bangku, ?Ia hubani ise ididah ho susur Tonduy in anjaha marianan Bani, Ia ma sididihon Tonduy Na Pansing.?

34Ase domma huidah anjaha husaksihon, ?Ia do Anak ni Naibata.?”

Susian ni Jesus na Parlobei

35Patarni ai jongjong ma use si Johannes ijai rap pakon dua susianni.

36Jadi sanggah ididahsi Jesus montas, nini ma, “Tonggor ma, Ia do biribiri ni Naibata!”

37Dob ibogei susianni na dua ai hatani ai, jadi iirikkon sidea ma Jesus.

38Marhusor ma Jesus, gabe ididah ma sidea mangirikkon-Si, jadi nini ma hubani sidea, “Aha do na pinindahannima?” Jadi nini sidea ma hu Bani, “Rabbi \it (artini: Guru)\it*, ija do Ham marianan?”

39Nini ma hubani sidea, “Roh ma hanima, ase ididah hanima!” Jadi roh ma sidea, ididah ma ianan-Ni ai, jadi rap ma sidea pakon-Si sadarini ai. Tar pukul ompat ma ai.

40Si Andreas, sanina ni si Simon Petrus do sada humbani na dua ai, na mambogei hata ni si Johannes ai, anjaha na mangirikkon Jesus ai.

41Dob ai jumpahsi ma lobei si Simon, saninani ai, jadi nini ma dompaksi, “Domma jumpah hanami Mesias in \it (artini: Kristus)\it*.”

42Ibobai ma ia bani Jesus, ikawahkon Jesus ma ia, lanjar nini ma hu bani, “Si Simon do ho, anak ni si Jonas; si Kepas ma ho goranon \it (artini: Petrus; batu gingging)\it*!”

43Patar ni ai, sanggah na sihol laho Ia hu Galilea, jumpah-Si ma si Pilippus. Jadi nini Jesus ma hu bani, “Irikkon ma Ahu!”

44Ai si Pilippus ai hun Betsaida do, ai ma huta ni si Andreas ampa si Petrus.

45Jumpah si Pilippus ma si Natanael, jadi ihatahon ma hu bani, “Domma jumpah hanami Ia, na sinahapkon ni si Musa ibagas titah in, sonai homa nabi-nabi ai ma Jesus, anak ni si Josep, na hun huta Nasaret.”

46Dob ai nini si Natanael ma hu bani, “Mintor tarbahen ma roh na madear hun Nasaret?” Jadi ihatahon si Pilippus ma, “Roh ma ho, ase ididah ho!”

47Ididah Jesus ma si Natanael roh hu Bani, jadi nini ma pasalsi, “On ma sada halak Israel na sintong, na so maruhur lekluk ibagas.”

48Nini si Natanael ma hu Bani, “Hunja itanda Ham ahu?” Jadi nini Jesus ma mambalosisi, “Sanggah lape idilo si Pilippus ho, domma Huidah ho i toruh ni hayu ara ai.”

49Nini si Natanael ma hu Bani, “Rabbi, Ham do Anak ni Naibata, Ham do Raja ni Israel.”

50Jadi nini Jesus ma mambalosisi, “Halani na Huhatahon ai do bam: Huidah do ho i toruh ni hayu ara ai, ase porsaya ho. Sibanggalhonon ni ai ope idahonmu!”

51Lanjar nini ma hu bani, “Na sintong tumang do na Huhatahon bannima, idahonnima do mungkab nagori atas anjaha naik turun malekat ni Naibata marayak Anak ni Jolma in.”



 <<  Yohanes 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran