Alkitab Mobile SABDA
[VER] : [TAA]     [PL]  [PB] 
 <<  Kisah Para Rasul 15 >> 

1Wali re’e seore rata bara sawei mba’a tau yako nda’a propinsi Yudea, rata ri kota Antiokhia. Tau etu mamula mampotundeka tau to mangaya i Yesu nja’u ria, sira manganto’o, “Ane komi taa rasui ruyu, mangalulu porenta i Musa, komi taa darapalaes.”

2Wali ojo pandonge i mPaulus sira dua i Barnabas anu to napotundeka ntau etu, sira dua mangewa kojo pasi maroso kojo naika mangabanta tau etu mangkonong anu to napotundeka etu. Pei yako etu tau ri Antiokhia sira mangampilis sawei mba’a tau dayau ndeku Yerusalem yau damampogomboka pomakau i mPue Yesu pasi ketua-ketua ntau to mangaya to ndate ria mangkonong anu to napotunde ntau to yako Yudea etu. Tau to ipilisinya etu semo i Paulus, i Barnabas, pasi re’e wo’u sawei mba’a yununya to mangaya.

3Wali tau to mangaya to siromu ri Antiokhia etu, sira mampokau tau to room rapilis etu. Wali i Paulus pasi yunu-yununya mayoko dayau ndeku Yerusalem. Ri raya mpalinjanya etu sira liu mandoo ri propinsi Penisia pasi Samaria. Tempo sira nja’u nja’u ria, sira mampakarebaka resi yunu nsira to samba’a pangaya mangkonong tau to si’a to Yahudi re’e seja to mangaya i Pue Yesu. Wali samparia tau to mangaya ri Penisia pasi Samaria etu paka masanang kojo mangandonge kareba etu.

4Wali yako etu i Paulus pasi yununya polas wo’u yako ri Penisia pasi Samaria yau ndeku Yerusalem. Rata nda’a ria, pomakau i mPue Yesu, pasi ketua-ketua ntau to mangaya, pasi samparia tau to mangaya to yusa to siromu nda’a ria, sira paka masanang kojo simparata pei sira. Wali i Paulus pasi yununya etu sira mangansaritaka tau to nda’a ria mangkonong samparia palaong to naika nsira yako ri kuasa i mPue Allah.

5Pei tempo etu re’e sangga’a tau to mangaya etu to aliran Parisi. Wali sira makore pei manganto’o, “Tau to si’a to Yahudi etu, nempo mangaya pei tiroo taa maya taa sira rasui pasi rapotundeka see mangalulu kojo porenta i Musa.”

6Wali yako etu pomakau i mPue Yesu pasi ketua-ketua ntau to mangaya sira siromu damagombogombo mangkonong palaong to etu.

7Wali ri rayanya sira magombogombo etu sira masibanta masae sangkodi, panewa i Petrus makore pei manganto’o, “A’i-a’i, komi mangansani sawei nto’u liu i Pue Allah nangampilis aku yako ri oyo ngkita mangkenika tau to si’a to Yahudi kareba matao see sira maya seja mangandonge kareba etu. Pasi tempo sira mangandonge, sira mangaya i Pue Yesu.

8Wali i Pue Allah mangansani raya ntau, wali Ia mangansani monso pu’u tau to si’a to Yahudi etu mangaya. See naka Ia mangawaika sira i Nosa Mapasing sewaju ewa nikaNya resi kita. Wali ewa wetu inikaNya mampakanasaka resi kita Ia room mangantima tau to si’a to Yahudi etu.

9I Pue Allah taa mampasisala kita to Yahudi pasi sira to si’a to Yahudi. Ia room mampakayongo raya nsira apa sira mangaya i Yesu.

10Wali ane ewa see, maka pei komi sewaju ewa manganto’o taa gana palaong to naika i mPue Allah resi sira etu? Apa komi rani mangawaika anaguru i mPue Yesu to si’a to Yahudi etu porenta-porenta to mabeu kojo to taa nawaika i mPue Allah sira. Pei gete, sakowa kita to Yahudi tare to mangkurang mangaluluka kojo porenta-porenta to etu. Nempo buebue ngkita tempo owi rataka resi kita ri tempo si’i tare pasi samba’a kita to mangkurang mangaluluka.

11Wali manasa kojo si’a apa saba mangalulu porenta to etu naka pei kita rapalaes. Kasimbalinya yako etu, anu to kita mangaya, etu semo kita rapalaes apa saba kanoto i mPue ngkita, i Yesu. Pasi ewa see seja ane tau to si’a to Yahudi. Sira seja rapalaes saba yako kanoto i mPue Yesu, si’a saba mangalulu porenta-porenta.”

12Wali tempo i Petrus magombo etu, tau to siromu nja’u ria ojo maroti. Yako etu sira mampodongeka wo’u gombo i Barnabas sira dua i Paulus tempo sira dua mangansaritaka sira mangkonong palaong to taa rapobiasa to nawaika i mPue Allah sira dua kuasa mangika tempo sira nja’u resi tau to si’a to Yahudi. Palaong etu mawali tondong resi tau to si’a to Yahudi etu pasi mampakaipu raya nsira.

13Wali ojo karoonya sira dua magombo, i Yakobus manganto’o, “A’i-a’i, padongeka gombongku si’i.

14I Simon ia room mangansaritaka kita ewa wimba naika i mPue Allah uyunya mampaponsanika tau to si’a to Yahudi pamporayangiNya see dare’e seja tau yako ri oyo nsira to damawali Ia puenya.

15Palaong to nikaNya etu singkonong kojo ewa gombo i mPue to room natulis nto pantuntu tuntuNya tempo owi, to’onya,

16‘Roo see, ri tempo to darata, tempo etu Aku dama’i muni, pasi Aku damampakaroso muni wiyaa i Makole Daud to raporapaka ewa banua to room mapuka yau. Wali ewa naika ntau mangawangu muni banua to room mapuka yau, ewa wetu seja daKuika mampasilonga muni wiyaa i Daud.

17Naka pei Aku damangika ewa wetu see to lino to toronya damangaliwu Aku, etu semo tau to si’a to Yahudi, sira darato’oka seja Aku puenya.’

18Wali etu semo gombo i mPue to Ia nanganto’o yami tempo owi mampakanasa mangkonong palaong to mawali ri tempo si’i.”

19Wali i Yakobus manganto’o wo’u, to’onya, “Ane ewa pampobuuka to si aku, ne’e kita mampakasusa tau to si’a to Yahudi to roomo mangandolika tangonya resi i Pue Allah.

20Ne’e kita mampakasaaka sira mangalulu samparia porenta i Musa. Kasimbalinya yako etu, to taotao kita ojo mangantulisika sira sura pei manganto’oka sira ne’e mangkoni pangkoni to makarika, etu semo pangkoni to room rapampueka resi tau-tau. Pasi ne’e masala bara magoyal. Pasi ne’e seja mangkoni raa pasi wombo mbinatang to mate taa masuwu raanya.

21Wali etu semo porenta-porenta i Musa to matao sira mangaluluka naka ne’e sira mampakasusa raya nu yunu ngkita to Yahudi. Apa yako tempo owi porentaporenta to etu ponto Eo Rapandoo rabasa nja’u raya banua-banua to napampotunde nto Yahudi pasi rapakarebaka resi tau nja’u ponto kota.”

22Wali ojo karoonya i Yakobus magombo etu, pomakau i mPue Yesu pasi ketua-ketua ntau to mangaya sindara-ndara pei samparia tau to mangaya to siromu nda’a ria, sira magombo-gombo panewa manganto’o, “Anu kita mangampilis tau yako ri oyo ngkita pei pokau sira damangalulu i Paulus sira dua i Barnabas yau ri kota Antiokhia.” Wali sira mangampilis i Silas sira dua i Yudas to rato’oka Barsabas. Tau dua etu sira tau to na’angga nu pua’inya to samba’a pangaya.

23Wali tau dua etu damangkenika tau ri Antiokhia sura ane roomo ratulis. Wali sura to natulis i Yakobus pasi yununya etu manganto’o, “Kami mantabea komi to a’ia’i mami to samba’a pangaya. Wali sura si’i yako resi kami to pomakau i mPue Yesu pasi to ketua-ketua ntau to mangaya ri Yerusalem sire. Kami mangantulisika komi to si’a to Yahudi to maroo ri kota Antiokhia pasi ri propinsi Siria pasi Kilikia.

24Wali naka pei kami mangantulisika komi sura si’i apa kami mangandonge re’e sawei mba’a tau yako resi kami to rata resi komi seore. Tau etu gombonya ojo mampakasusa raya ngkomi pasi pampobuuka ngkomi. Wali kami rani mampakanasaka komi si’a kami nangampokau tau etu yau resi komi mangika palaong to etu.

25Wali see naka kami samba’a pampobuuka mangampilis dua mba’a yunu mami pei mampokau sira yau resi komi, etu semo i Yudas sira dua i Silas. Tau dua etu damampakanasaka seja komi anu to kutulisika komi si’i. Tempo sira yau resi komi sira damangalulu i Paulus sira dua i Barnabas anu to kuporayang kojo. I Paulus sira dua etu, si’a katuwu nsira ri lino si’i to bae kojo batuanginya resi sira, see naka sira taa meka mangika palaong i mPue Yesu Kerisitu.

26(15:25)

27(15:25)

28Wali re’e to roomo napakanasaka i Nosa Mapasing resi kami mangkonong komi, pasi kami seja singkonong. Ia taa rani kami mampakasaaka komi mangalulu porenta i Musa kasimbalinya yako porenta-porenta to bae kojo batuanginya resi samparia tau to Yahudi.

29Etu semo, ne’e mangkoni pangkoni to room rapampueka resi tau-tau, pasi ne’e mangkoni raa, pasi ne’e seja mangkoni wombo nu binatang to mate taa masuwu raanya. Pasi ne’e seja masala bara magoyal. Wali ane komi mangalulu porenta-porenta to rato’o etu, lengko ngkomi damatao. Wali ungkanyamo ruyu sura si’i.”

30Wali ojo pangantulis nsira sura etu, sira mangawaika i Yudas sira dua i Silas panewa mangabiaka sira dua yau. Wali sira dua meyoko mangalulu i Paulus sira dua i Barnabas yau lo’u kota Antiokhia. Rata la’u ria, sira mampasiromunaka tau to mangaya panewa sira mangawaika tau etu sura.

31Wali tau etu mangabasa sura etu. Sira ndende kojo rayanya mangampobuuka paposia to ratulis etu.

32Wali i Yudas sira dua i Silas, sira seja tau to pantuntu tuntu i mPue Allah, wali sira dua masae magombo nja’u ria mampaposiaka pasi mampakaroso raya nu pua’inya to samba’a pangaya pei sira etu.

33Wali yako etu sira dua maroo-roo bara sawei mbengi ri Antiokhia panewa sira dua mayoko damawolili muni resi tau to nampokau sira etu. Tempo sira mayoko etu, yunu nsira ri Antiokhia manganto’oka sira dua, “Kami mamporapika resi i Pue see Ia damangararamaka komi ri jaya.”

34Pei tempo etu i Silas ia mampobuuka, “Aku damaroo ruyu ri Antiokhia si’i.”

35Pasi i Paulus sira dua i Barnabas, sira seja maroo-roo ri Antiokhia. Sira dua mampotundeka tau pasi mampakarebaka tuntu i mPue nja’u ria. Pasi malagi yununya to mangika seja palaong to etu sindara-ndara pei sira.

36Wali ojo kagananya sawei mbengi i Paulus manganto’oka i Barnabas, to’onya, “Matao ane kita mawolili muni liu wo’u mayunu-yunu resi pua’i ngkita to samba’a pangaya to nja’u ponto kota to pangampakarebaka ngkita tuntu i mPue seore. Kita yau mangalo’a tau etu bara wimba katuwu nsira.”

37Wali i Barnabas ia rani mangkeni seja i Yohanes to rato’oka seja Markus yau mangalulu sira.

38Pei i Paulus manganto’o, “Taa matao kita mangkeni ngkai etu apa seore tawa roo palaong to kita mangika etu, ia nangampiyaika yau kita ri Pampilia.”

39Wali i Paulus sira dua i Barnabas matingka, see naka sira dua maga’a yau. Wali i Barnabas mangkeni Markus panewa sira dua mapone ri bangka pei malayag yau njo’u pulo Siprus.

40Pei i Paulus mangampilis i Silas damangalulu ia. Wali sira dua meyoko, pei tempo sira tawa meyoko etu, pua’inya to samba’a pangaya to nja’u ria, sira mampokaika sira dua mamporapika resi i Pue Allah see Ia mangajagang sira dua yako ri kanotoNya.

41Wali yako etu i Paulus sira dua i Silas yau mangalinjak propinsi Siria pasi Kilikia. Sira dua mampakaroso raya ntau to mangaya i Pue Yesu to siromu ri lipu-lipu to nja’u ria.



Download Audio MP3 (Kisah Para Rasul 15):
Mobile (Low Quality) - CD (High Quality)

 <<  Kisah Para Rasul 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran