Alkitab Mobile SABDA
[VER] : [TAA]     [PL]  [PB] 
 <<  Kisah Para Rasul 9 >> 

1Wali ri tempo etu seja i Saulus tamo re’e pandoonya mangarai pasi rani mampopate yau anaguru i mPue. Ia yau mampotango kepala nto pampue to bae angganya,

2panewa mamporapi sura kuasa yako resi ia. Sura etu danakenika tau to mampasilonga banua-banua to napampotunde nto Yahudi nja’u kota Damsyik. Ri raya sura etu kepala nto pampue manganto’oka sira mangansawang i Saulus damangansoko tau to mangalulu Jaya to nato’o i Yesu, see ane ia mangarata tau bara to langkai bara to we’a, ia damangansoko panewa tau etu darakeni ndeku Yerusalem.

3Wali ojo kare’enya sura etu, i Saulus mayoko yau njo’u kota Damsyik. Pei tempo ia ri raya mpalinjanya, mosumo danakarata ri kota Damsyik, kodi majoli re’e reme to makilo kojo yako ri yangi mangansindo ia.

4Wali ia napuka yau ri wawo ntana panewa ia mangandonge loo mampogomboka ia, loo etu manganto’o, “Saulus, Saulus maka pei korom mangansesai Aku?”

5Wali i Saulus mampotanaka, “Bara semanya Komi Pue?” Panewa loo etu mangansono, “Aku semo i Yesu to korom mangansesai.

6Pambangumo pei inta njo’u raya ngkota. Tempo korom nja’u nja’u ria panewa korom darato’oka palaong to danuika.”

7Wali tau to mangalulu i Saulus sira jamo sakangkore pei sakaroti apa sira ipu kojo rayanya mangandonge ewa loo ntau pei taa mangangkita koronya.

8Wali yako etu i Saulus makore. Tempo ia makore etu ia mangaloka matanya pei tamo mangkita rao. Wali yununya sira jamo mangkentar ia masua ri kota Damsyik.

9Wali nja’u ria togo eo kasaenya ia taa mangkita rao pasi ia taa seja mangkoni pasi taa manginu.

10Wali nja’u kota Damsyik etu re’e samba’a anaguru i Yesu sanganya i Ananias. Ananias etu nawaika i mPue pangkita. Ri raya mpangkitanya etu i Pue mampogomboka ia, to’onya, “Ananias.” Wali ia mangansono, “Seijare aku, Pue.”

11Wali i Pue manganto’oka ia, “Inta pago jaya to rato’oka Jaya Manoto panewa yau ri banua i Yudas. Patanaka tau to yako ri kota Tarsus, tau etu sanganya i Saulus. Ia tempo si’i tongo mpakai-kainya,

12pasi ia re’e seja pangkitanya. Ri raya mpangkitanya etu ia mangkita tau to sanganya i Ananias rata resi ia pasi mamposaka palenya ri wawonya see ia maya mangkita muni rao.” Etu semo gombo i mPue resi i Ananias.

13Wali i Ananias mangansono gombo i mPue, ia manganto’o, “Pue, boros sarita ntau to aku room mangandonge mangkonong i Saulus etu. Ia mapari kojo naika mangansesai tau to Komi puenya to nda’a Yerusalem.

14Pasi si’i-si’i ia narata wo’u rire, ia nawaika ngkepala-kepala nto pampue kuasa damangansoko samparia tau to makai-kai resi Komi.”

15Pei i Pue manganto’oka wo’u i Ananias, to’oNya, “Inta, apa Aku roomo mangampilis ia damangika palaongingKu. Wali ia damampakarebaka mangkonong Aku resi to Israel pasi tau to si’a to Israel pasi makole-makolenya.

16Wali Aku damampaponsanika ia kasesa to danarata apa saba ia mangalulu Aku.”

17Wali ojo karoonya i Pue mampogomboka ia, i Ananias ia yau ri banua to nato’oka i mPue ia etu. Tempo ia rata ri banua etu ia masua panewa ia mangkita i Saulus. Ia mamposaka palenya ri wawo i nSaulus, pei manganto’o, “Saulus, a’ingku, i Pue Yesu to nampokau aku ma’i resi korom. Ia semo to nukita ngkorom ri jaya tempo korom ma’i si’i. Wali Ia nampokau aku ma’i resi korom see korom damangkita muni rao. Pasi Ia nampokau aku ma’i see korom dabae kojo karoso ndaya to danawaika i Nosa Mapasing korom.”

18Wali ojo karoonya i Ananias magombo, mansaka re’e anu to ewa pepa nu bau maranta yako ri mata i nSaulus, wali ia mangkita muni rao. Wali ia makore panewa ia yau rabaptis.

19Roo see ia mangkoni panewa karoonya ia mangkoni ia maroso muni. Wali yako etu i Saulus bara sawei mbengi kasaenya maroo-roo sindara-ndara pei anaguru i mPue Yesu nja’u Damsyik.

20Pasi ia mansaka yau ri banua-banua to napampotunde nto Yahudi, panewa ia mampakarebaka tau nja’u ria mangkonong i Yesu, Ia semo ana i mPue Allah.

21Wali tempo tau mangandonge i Saulus magombo ewa see, sira samparia ipu kojo rayanya. Sira manganto’o, “Gete! Ngkai si’i semo to mampoja’a tau to makai-kai resi i Yesu ri Yerusalem. Pasi naka pei nama’i rire damangansoko wo’u tau to mangaya i Yesu panewa ia damangkenika kepala-kepala nto pampue.” Ewa see to nato’o ntau to mangandonge gombo i nSaulus etu.

22Pei i Saulus ia ojo kanjo’u-njo’u karoso-roso rayanya mampakarebaka resi tau mangkonong i Yesu. Ia mampakanasaka sira i Yesu Ia semo Kerisitu, Makole parajanji i mPue Allah. Wali to Yahudi to maroo ri Damsyik etu sira tamo nansani kesaa to danato’o nsira damangabanta gombo i nSaulus etu.

23Wali malagi mbengi yako etu panewa re’e to Yahudi etu to siromu mangansongka damampopate yau i Saulus.

24Wali sira wuri-eo mangajagai samparia wombo ngkota etu mangampea damampopate yau i Saulus ane ia liu nja’u ria. Pei i Saulus rapaponsanika mangkonong songka nsira etu.

25Wali taa mawali songka nsira etu apa ri raya mburi anaguru i nSaulus sira mangkeni ia njo’u rindi ngkota panewa manganto’oka ia matunda la’u raya ngkaranji to bae. Yako etu sira manganguyu i Saulus lo’u sambali ndindi ngkota etu.

26Wali i Saulus mampiyaika kota Damsyik yau wo’u ndeku Yerusalem. Rata nda’a ria ia rani siromu sindara-ndara pei anaguru i Yesu, pei samparia sira mampokeka ia apa sira taa mangaya kareba to manganto’o i Saulus ia seja mawalimo anaguru i Yesu.

27Pei yako etu i Barnabas mangansawang ia. Ia mangkeni i Saulus mampotango pomakau i mPue Yesu panewa mangansaritaka sira mangkonong anu to nawali resi i Saulus. Ia mangansaritaka sira ewa wimba i Saulus mangkita i Pue ri jaya pasi ewa wimba i Pue mampogomboka ia ri jaya etu. Pasi ia mangansaritaka seja sira mangkonong i Saulus ia taa meka rayanya mampakarebaka resi tau nja’u kota Damsyik mangkonong i Yesu.

28Wali yako etu i Saulus maroo masingkatao pei sira nda’a Yerusalem, pasi ia taa kojo meka mampakarebaka tau juku ri kota etu kareba mangkonong i Yesu.

29Pasi ia re’e seja magombo-gombo, pasi masibanta resi to Yahudi to basanya Yunani. Pei sira mangaliwu jaya mampopate yau ia.

30Wali yunu i nSaulus to samba’a pangaya, sira mangandonge kareba re’e tau to rani mampopate yau i Saulus. Tempo sira mangandonge kareba etu sira mangkeni yau ia lo’u kota Kaisarea. Panewa yako la’u ria sira manganto’oka ia yau muni njo’u lipunya, etu semo kota Tarsus.

31Wali yako etu tau to mangaya ri sambawo propinsi Yudea pasi Galilea pasi Samaria, sira masanang karoos nsira apa tamo re’e to mampakasusa sira. Wali sira ojo tidugang karoso ndayanya pasi tidugang seja kaborosinya apa i Nosa Mapasing mampakaroso raya nsira. Pasi ri raya ngkatuwu nsira, sira mampalaika kojo i Pue saba manga’angga Ia.

32Wali i Petrus ia re’e malinja-linja juku tana etu. Ia yau ri samparia lipu nakare’e ntau to i Pue Allah puenya, ia yau mayunu-yunu resi sira. Wali re’e seore ia rata seja nja’u kota Lida.

33Ri kota etu ia mangarata samba’a tau sanganya i Eneas. Ngkai etu wayu nto’umo kalulu yau ngkoronya wali ri rayanya wayu nto’u etu ia ojo maturu-turu ri wawo ngkoi.

34Wali tempo i Petrus mangkita ngkai etu ia manganto’o, “Eneas, pambangu pei yuyu alimu apa i Pue Yesu mampakatao muni korom si’i-si’i.” Wali ojo karoonya i Petrus mampogomboka ia etu, ia mambangu.

35Wali samparia tau to re’e ri kota Lida pasi kota Saron sira mangkita i Eneas matao muni, panewa sira mangandolika tangonya resi i Pue.

36Wali tempo etu, nja’u kota Yope re’e samba’a tau we’a ia anaguru i mPue Yesu seja. Tau etu sanganya i Tabita. (Sanganya etu ane ri basa Yunani rato’oka i Dorkas, Dorkas etu batuanginya “lago”.) Wali i Dorkas etu sangkani mangika palaong to matao pasi ia sangkani mangansawang tau to masiasi.

37Wali ri tempo i Petrus nja’uwa nja’u kota Lida, re’e seore i Dorkas masaki panewa mate yau. Roo see yununya mangariu lembanya panewa mampoduli ri raya nsongi to ndate juya to kadua ntampenya.

38Wali yako etu anaguru i Yesu to nja’u kota Yope etu sira mampokau dua mba’a tau to langkai yau resi i Petrus, apa sira re’e mangandonge i Petrus nja’u nja’u kota Lida. Kota Lida etu taa longko yako ri Yope. Wali tau dua to napokau etu sira yau panewa sira dua mangarata i Petrus nja’u kota Lida. Wali tau dua etu mamporapika resi i Petrus see ia majoli yau njo’u kota Yope.

39Wali ojo pandonge i mPetrus gombo nsira dua, ia mampakaroso panewa ia mangalulu sira. Ojo karata nsira nja’u banua ri kota Yope, I Petrus nakeni ntau nto’u songi to ndate juya to kadua ntampenya nakare’e ntau mate etu. Ndate ria siromumo samparia tau to balu, wali ojo karata i mPetrus ndate ria, sira mampago ia panewa makore tiku ia. Sira tumangi pei mampaporaoka ia baju-baju pasi pake to yusa to naikaka i nDorkas sira tempo ia tuwuwa.

40Yako etu i Petrus mampokau yau sira samparia ri sambali mbombo panewa ia mambokotu pei makai-kai. Ojo karoonya ia makai-kai ia mangalekoka tangonya resi lemba i Dorkas panewa ia manganto’o, “Tabita, pambangu.” Wali i Dorkas mangaloka matanya pei mangkita i Petrus, panewa ia matunda.

41Wali i Petrus mangkongko palenya mangansawang ia see ia makore. Roo see i Petrus mampokio tau balu pasi tau to i Pue Allah puenya to yusa panewa ia manganto’oka sira, to’onya, “Si’i yunu ngkomi, ia tuwu muni.”

42Wali palaong to etu natikareba juku ri kota Yope panewa boros tau to mangaya i Pue.

43Wali i Petrus maroo-roo malagi mbengi ri Yope. Ia maroo ri banua ntau to pangkantab pela nu binatang. Sanga ntau etu i Simon.



Download Audio MP3 (Kisah Para Rasul 9):
Mobile (Low Quality) - CD (High Quality)

 <<  Kisah Para Rasul 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran