Alkitab Mobile SABDA
[VER] : [TAA]     [PL]  [PB] 
 <<  Lukas 1 >> 

1Pa’a Teopilus to kutabea, malagi tau to roomo mampeyaa mangantulis sarita mangkonong palaong to bae batuanginya to nawalimo ri oyo ngkita. Palaong etu mangkonong i Pue Yesu.

2Pasi sarita to natulis nsira etu sewaju kojo pei sarita to kita roomo mangandonge yako resi tau to yusa. Tau to yusa etu, sira semo tau to matamanasa mpalaong to naika i mPue Yesu yako ri pamulanya, pasi sira semo to mampakarebaka resi kita kareba matao.

3Wali aku roomo mamparesa kojo samparia sarita nsira etu mangkonong palaong to mawali yako ri pamulanya i Yesu mangika palaongiNya. See naka aku mangepe matao ane aku seja mangantulisika komi, Pa’a, sarita to masilonga kojo mangkonong palaong to etu.

4Naka pei aku mangika ewa wetu apa kuporani komi mangansani monso pu’u samparia to roomo napotundeka ntau komi mangkonong i Pue Yesu.

5Wali ri tempo i Herodes mawali makole ri propinsi Yudea, tempo etu re’e samba’a to pampue to sanganya i Sakharia. I Sakharia etu ia samba’a wiyaa i Harun pasi ia samba’a joa i Abia, to pampue to tempo owi to roomo namate yau. Pasi rongo i nSakharia ia sanganya i Elisabet. Wali i Elisabet etu, ia seja samba’a wiyaa i Harun sewaju ewa rongonya.

6Wali i Sakharia pei i Elisabet etu, sira dua mangika lengko ngkatuwu to singkonong pei i Pue Allah. Pasi sira mangalulu kojo samparia porenta pasi tuntu i mPue. Wali tare lengko ngkatuwu nsira to maya rapakasala.

7Pei sira dua taa riana apa i Elisabet ia tau apa, pasi sira dua paka tu’a kojomo.

8Wali re’e seore i Sakharia mangika palaong nto pampue ri banua i mPue Allah apa ratamo temponya joa i Abia semo to mangika palaong to etu.

9Wali ane ada nto pampue, sira mambata’a see daransani to imba sira to damasua ri raya banua i mPue Allah damangantunu kemenyan ewa pampue resi i Pue Allah. Wali seore etu tempo sira mambata’a, kono kojo i Sakharia to rasudu. Wali ia masua ri raya banua i mPue Allah

10pei mangantunu kemenyan. Ri rayanya ia mangika palaong to etu, tau boros makai-kai ri sambali banua etu.

11Wali tempo i Sakharia mangantunu kemenyan etu, kodi majoli rata samba’a pomakau i mPue Allah yako saruga, rata resi ia. Pomakau etu makore ri sambali tondo ngkana mpalampa to rapangantunu kemenyan.

12Wali tempo i Sakharia mangkita pomakau etu ia kayopo pasi meka kojo seja rayanya.

13Pei pomakau etu manganto’oka ia, “Ne’e meka Sakharia, apa kareba matao to aku ma’i mampakarebaka resi korom. Kareba etu semo, pokai-kaimu nadonge i mPue. See naka rongomu, i Elisabet, damampoanaka korom ana langkai. Panewa ana etu danusangaka i Yohanes.

14Wali saba ia see naka korom damasanang pasi ndende kojo seja rayamu. Pasi boros tau damasanang seja apa saba kare’enya,

15apa ia dabae kojo batuanginya ri pangkita i mPue Allah. Wali ia taa maya manginu tule anggur bara anu to yusa to kayangu tau manginu. Pasi ana etu ane tiroowa re’e ri raya ngkompo nu indonya ia dabae kojo yami karoso ndaya to danawaika i Nosa Mapasing ia.

16Wali ia damangandolika muni tango nto Israel to malagi resi i Pue Allah nsira.

17Pasi ia damampatiruyu pei i Pue pei kuasa to danawaika i Nosa i mPue Allah ia dasewaju pei kuasa to re’e resi to pantuntu tuntu i mPue Allah, i Elia, tempo owi. Wali ia damampotundeka tau, see naka pa’apa’a damasingkatao muni pei ngana nsira. Pasi ia damampotundeka tau to mangewa i Pue Allah see naka sira damajea see pampobuuka nsira singkonong pei i Pue Allah. Wali ewa wetu danaika anamu damampasigenaka yami raya ntau damangaya i Pue.” Etu semo gombo to nato’oka mpomakau etu i Sakharia.

18Wali i Sakharia manganto’oka ia, ia manganto’o, “Gete, wimba palaong to etu damawali? Apa aku tu’amo pasi rongongku tu’am seja. Wali kesaa tondong to danupapokitaka aku see kunsani palaong etu monso pu’u damawali?”

19Wali pomakau etu mangansono, ia manganto’o, “Aku semo i Gabriel to biasa mampotango i Pue Allah damangika palaongiNya. Wali aku napokau i mPue Allah ma’i damampogomboka korom pei mampakarebaka korom kareba matao etu.

20Pei korom taa mangaya gombo to kuto’oka korom etu, wali see naka korom damawali bea. Korom tamo damangansani magombo ane tawa rata temponya napowali mpalaong to aku roomo mampakarebaka resi korom etu. Wali gombongku etu datibanang kojo ane ratamo temponya.”

21Wali tongo-tongonya sira dua magombo etu, tau boros ipu rayanya mangampea i Sakharia apa ia masae kojomo nja’u raya banua i mPue Allah.

22Pei tempo ia masuwu muni, ia tamo mangansani magombo. Ia jamo mangkawe-ngkawes sira mangika tondong apa tamo kojo mangansani magombo. Wali see naka sira mangansani bara re’e pangkita to rapapokitaka resi ia tempo ia re’ewa ri raya banua i mPue Allah.

23Wali ojo kagananya eonya ia mapalaong, ia mawolili muni njo’u lipunya.

24Yako etu tamo masae rongonya, i Elisabet, mayu’umo. Wali lima mbuya kasaenya ia taa masuwu resi tau, ia ojo maroo-roo ri banua.

25Ia manganto’o, “Pue semo to mangawaika aku dale ri tempo si’i. Ia mamporayang aku wali Ia mangayali yau rowi ntau resi aku apa aku tamo apa si’i-si’i.”

26Wali yako etu, ono mbuyamo kayu’unya i Elisabet, panewa i Pue Allah mampokau wo’u pomakauNya yako ri saruga, i Gabriel, yau ri kota Nasaret nja’u propinsi Galilea.

27Ia manganto’oka i Gabriel yau damampogomboka samba’a tau we’a to maroo nja’u ria, sanganya i Maria. Tau we’a etu tawa re’e nepenya to langkai pei ia mangkasimpandeka i Yusup. I Yusup ia samba’a wiyaa i Makole Daud tempo owi.

28Wali pomakau etu yau resi i Maria. Rata resi ia, ia manganto’o, “Pakasanang rayamu, apa bae kanoto i mPue Allah resi korom. Pasi i Pue re’e siwaka pei korom. Wali korom semo to rasi-rasi wo’u pei samparia tau we’a to yusa!”

29Wali tempo i Maria mangkita pomakau etu ia ipu kojo rayanya pasi masusa mangampobuuka, “Kesaa batuanginya gombonya etu?”

30Wali pomakau i mPue Allah etu manganto’oka ia, “Ne’e meka Maria, apa korom re’e mangarata kanoto i mPue Allah.

31Wali korom damangkayu’uka samba’a ana langkai pei tempo Ia rapoanaka danusangaka i Yesu.

32Ia damawali bae kojo anggaNya. Pasi Anamu etu darato’oka Ana i mPue Allah anu Makuasa. Pasi i Pue Allah damangawaika Ia mawali Makole sewaju ewa wiyaaNya, i Makole Daud tempo owi.

33Wali Anamu etu damangkuasang wiyaa i Yakub rataka ri singkasaenya. Tare kapuranya Ia maporenta.”

34Wali ojo karoonya pomakau i mPue Allah manganto’o gombo etu, i Maria mampotanaka resi ia, “Wimba palaong etu damawali apa aku tawa re’e nepengku to langkai?”

35Wali pomakau etu mangansono, ia manganto’o, “I Nosa Mapasing yako resi i Pue Allah darata resi korom, pasi kuasa i mPue Allah damangika see damawali. Ia darata resi korom, pei kuasa i mPue Allah to bae kojo anggaNya damangantorung korom. Wali see naka Ana to danupoanaka ngkorom etu darato’oka mapasing pasi see naka Ia darato’oka seja Ana i mPue Allah.

36Wali ne’e bata-bata rayamu. Pobuuka i Elisabet, ja’imu etu to nato’oka ntau apa. Ia tu’am, pei nempo ewa wetu ia mangkayu’uka ana langkai naika ngkuasa i mPue Allah, pasi si’i-si’i ia ono mbuyamo kayu’unya etu.

37Apa resi i Pue Allah tare to taa mawali.”

38Wali ojo karoonya pomakau i mPue Allah manganto’o gombo etu, i Maria manganto’o, “Aku si’i to papolaong i mPue Allah. Wali biakamo nakawali resi aku to to’o ngkomi etu.” Wali yako etu pomakau i mPue Allah yako ri saruga mampiyaika i Maria.

39Wali tawa masae yako etu, i Maria mampakaroso dayau mayunu resi i Elisabet. Wali ia majoli yau njo’u propinsi Yudea. Sangga’a propinsi etu malagi mpantana, wali nja’u ria semo kota to napago i Maria.

40Ojo karatanya nja’u kota etu, ia yau ri banua i nSakharia, panewa masua ri rayanya pei mangantabe i Elisabet.

41Wali ojo pangandonge i Elisabet gombo i Maria etu, ana kodi to ri raya ngkomponya maroso naika mawolewole. Panewa i Elisabet bae karoso ndaya to nawaika i Nosa Mapasing ia.

42Wali ia maroso loonya manganto’o, “Komi semo to rasi-rasi wo’u pei samparia tau we’a to yusa! Pasi marasi kojo seja Ana to danupoanaka ngkomi etu!

43Gete, ipu kojo rayangku apa komi indo mPuengku wali komi bae anggamu pei komi tiroo ma’i mayunu resi aku to kodi angga si’i.

44Apa ojo pangandonge ntalingangku loomu mampogomboka aku etu, ana to ri raya ngkompongku si’i maroso naika mawole-wole saba kandende ndayanya.

45Masanang komi apa komi mansarumaka i Pue damangika kojo ewa wimba Ia roomo manganto’oka komi.”

46Wali i Maria manganto’o, “Rayangku mangabarong i Pue,

47pasi ndende kojo toniingku apa saba i Pue Allah, to pansompongku.

48Ndende rayangku apa i Pue Allah mamporayang aku, nempo ojo to papolaongiNya to kodi angganya si’i. Wali monso pu’u yako tempo si’i samparia wiyaa ntau to datuwu damanganto’oka aku masanang.

49Naka pei sira damanganto’oka aku masanang apa saba palaong to bae kojo batuanginya to naikaka i mPue Allah anu Makuasa aku. O, mapasing kojo Ia!

50Pasi Ia mamporayang potapi-tapi mbiyaa ntau to mampalaika Ia saba manga’angga Ia.

51Yako ri palaong to inikaNya Ia roomo mampapokitaka to lino kuasaNya, pasi Ia roomo mangaga’a tau to pampobuuka ndayanya mangei.

52Ia roo seja mangayali muni kuasa makole-makole pei tau to kodi angganya Ia mangokotaka see mawali bae angganya.

53Pasi Ia roomo mangawaika tau to masiasi gana kojo anu to matao to danapake nsira. Pei ane tau to sugi Ia mangarubak yau pei taa mangawaika sira mangkeni bara kesaa.

54Pasi Ia roomo mangabanang parajanji to inikaNya resi bue-bue ngkita tempo owi, apa Ia mangansawang kita to Israel, to papolaongiNya. Ia taa mangkalingan mampaponsanika i Abraham pamporayangiNya tempo owi pasi Ia mampaponsanika seja samparia wiyaa i Abraham pamporayangiNya etu rataka ri singkasaenya.” Wali etu semo gombo i Maria.

55(1:54)

56Wali yako etu i Maria maroo bara togo mbuya kasaenya resi i Elisabet panewa ia mawolili muni njo’u lipunya.

57Wali yako etu, ojo kagananya wuyanya danapoana i Elisabet, ia mampoanaka ana langkai.

58Ojo pangandonge nu romu lipunya pasi ja’i-ja’inya kareba etu, sira mangansani i Pue Allah bae pamporayangiNya resi i Elisabet, wali sira samparia ndende kojo seja rayanya sindara-ndara pei ia.

59Wali ojo kagananya wayu eo yako kare’e nu ana etu, tau ma’i mangansui mangalulu ada nto Yahudi. Pasi sira rani damangansangaka ia i Sakharia, apa etu semo sanga mpa’anya, pasi ane ewa ada nsira, ewa wetu raika.

60Pei indonya manganto’o, “Ne’e. Ia darasanagaka i Yohanes.”

61Wali tau etu manganto’oka i Elisabet, “Tare ja’imu to ewa wetu sanganya.”

62Wali sira mangangkawes pa’a nu ana kodi etu. Sira taa mampogomboka ia apa ia tawa mangansani muni magombo, see naka sira mampondayaka ia taa seja nakoto mangandonge rao. Sira mangangkawes mampotanaka resi ia bara sema sanga to ia rani mangasangaka ananya etu.

63Wali i Sakharia mangamporapi anu to danatulis, panewa ia mangantulis, “Sanganya i Yohanes.” Wali tau boros etu sira ipu rayanya.

64Wali ojo pangantulis i Sakharia gombo etu, ia mansaka nansani muni magombo. Wali ia magombo mangabarong i Pue Allah.

65Wali tau boros to maroo ri awe nsira, sira meka rayanya mangkita palaong to etu. Pasi kareba mangkonong samparia palaong to nawali etu natikareba-reba njo’u samparia lipu ntau to re’e ri woto mpantana-mpantana ri propinsi Yudea.

66Pasi samparia tau to mangandonge kareba mangkonong ana i Sakharia sira dua Elisabet etu sira mampobuu-buuka kojo pasi manganto’o samba’a pei samba’a, “Bara kesaa to damawali resi ana etu ane baemo?” Naka pei sira manganto’o ewa wetu apa manasa resi sira i Pue mangararamaka katuwu nu ana kodi etu.

67Wali i Sakharia, pa’a nu ana etu, ia bae karoso ndaya to nawaika i Nosa Mapasing ia. See naka ia mamporata gombo to yako resi i Pue Allah.

68Ia manganto’o, “Barongi i Pue, Allah nto Israel, apa Ia ma’imo mangansawang tauNya pasi mangalapa muni kita.

69Apa Ia mangawaika kita to pansompo to maroso. To pansompo etu, Ia wiyaa i Makole Daud, to papolaong i mPue Allah tempo owi.

70Wali palaong si’i semo to nato’o yami i mPue Allah tempo owi. Ia manganto’oka gombo etu mangampake nganga nto pantuntu tuntuNya, tau to Ia puenya semo.

71Wali Ia nanganto’o Ia damampalaes kita yako ri balinta, pasi Ia damampalaes kita yako ri kuasa ntau samparia to maja’a nakita kita.’

72Pasi Ia nanganto’o Ia damampaponsanika bue-bue ngkita pamporayangiNya pasi Ia damangabanang parajanji to Ia semo nangika resi sira.

73Parajanji etu parajanji to Ia namparajanjika kojo resi bue ngkita, i Abaraham tempo owi.

74ParajanjiNya etu semo Ia damangalapa kita yako ri kuasa nu balinta see kita tamo meka-meka resi sira. Apa ane ewa see kita maya mampue mampakabae Ia ri kasanang ndaya.

75Wali singkasaenya kita tuwu, kita maya mangika lengko to singkonong pei Ia to masipato naika ntau to Ia puenya.” Wali etu semo gombo i nSakharia.

76Roo see ia mampogomboka wo’u ana kodi, ia manganto’o, “O anangku, korom darato’oka to pantuntu tuntu i mPue Allah anu Makuasa. Apa korom damampatiruyu pei i Pue damampasilonga raya ntau see sira damangansani i Pue ane Ia ratamo.

77Etu semo, korom damampaponsanika tau i mPue i Pue Allah damampalaes sira. Wali jaya Ia mampalaes sira etu, Ia mangalapa dosa nsira.

78Naka pei i Pue Allah damangika ewa wetu apa Ia bae kojo pamporayangiNya resi kita. Wali see naka to Pansompo to dama’i yako saruga darata resi kita. Ia raporapaka ewa eo to owo lambu.

79Apa Ia damampakareme kita to ewa tau to maroo ri raya ngkawuri, to mampokeka kapate. Ia damampotundeka kita see kita damangansani ewa wimba daraika ane rani masingkatao pei i Pue Allah. Wali palaong to danaika nto Pansompo etu maya raporapaka ewa mampakaremeka kita jaya to kita damangalulu.” Wali ungkanyamo gombo i nSakharia.

80Wali yako etu ana i nSakharia etu tioko-yokomo pasi tidugangi seja karoso ndayanya. Panewa ia yau njo’u pada bone pei maroo nja’u ria sampe rata temponya ia mula mampakarebaka yununya to Israel anu to nato’oka i mPue Allah ia mampakarebaka.



Download Audio MP3 (Lukas 1):
Mobile (Low Quality) - CD (High Quality)

 <<  Lukas 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran