1Wali yako etu i Yesu manganto’o wo’u rapa mangampotundeka wo’u kami see kami damadota mangampeas temponya Ia dama’i muni, Ia manganto’o, “Palaong to mawali tempo i Pue Allah Makole nto lino maya raporapaka ewa si’i. Rapanya re’e sampuyu mba’a ngana we’a to tawa re’e nepenya to langkai. Wali ngana we’a etu re’e lima mba’a to madoyo pasi lima mba’a to pande. Ngana we’a etu yau mangansabi paporongo nu galung nsira. Wali ane ratamo temponya, sira yau damangantomu tau to langkai to darapaporongo see maya sindarandara pei ia masua ri roa mangalulu ada ngkita. Tempo sira yau etu sira mangangkeni pansona samba’a pei samba’a.
2(25:1)
3Wali ngana we’a to madoyo etu, sira mangkeni pansona pei taa mangkeni minya to darapake damangabanang muni pansona etu.
4Pei ngana we’a to pande, sira mangkeni pansona pasi mangkeni seja minya to ri raya ntampa.
5Yako etu masae sira mangampeas pei tawa rata to langkai etu. Wali see naka sira sampuyu paka yoremo mata nsira wali sira yore yau.
6“Wali yako etu, ntongo wuri, re’e tau kaboo-boo manganto’o, ‘Daratamo to langkai! Inta pei tomu ia!’
7Wali ngana we’a to sampuyu etu sira mambangu pei mampasilonga muni pansonanya.
8Wali ngana we’a to madoyo manganto’oka to pande, ‘Waika kami sangkodi minya ngkomi apa dapikamo pansona mami.’
9“Pei ngana we’a to pande mangansono, sira manganto’o, ‘Taa, apa taa gana danapake ngkita samparia. Inta njo’u kios pei oli wo’u minya to danupake ngkomi.’
10“Wali ngana we’a to madoyo etu, sira yau mangoli minya. Pei tongo-tongonya sira yau etu, ratamo to langkai to darapaporongo. Wali ngana we’a to masilongamo pansonanya etu, sira masua sindarandara pei to langkai etu ri raya banua nakanja’u roa mpaparongo. Roo see wombo banua etu raba’a yau.
11“Wali yako etu rata seja ngana we’a to lima nja’u banua etu. Sira mampokio, to’onya, ‘Pa’a, Pa’a, lokaka kami wombo!’
12“Pei to langkai to darapaporongo etu ia manganto’o, ‘Taa, apa aku taa kunsani komi.’ Etu semo to nato’oka nto langkai resi ngana we’a to madoyo etu. Wali etu semo rapa.
13“Wali ne’e ewa to we’a to madoyo etu. Jagai kojo ne’e lenga mangampeas ngkama’ingKu see sigena komi ane Aku rata. Apa komi taa nunsani bara eo kesaa pasi bara jam sawei dakukarata Aku, Wiyaa nto Lino.”
14Wali ojo karoonya i Yesu manganto’o rapa to etu, Ia manganto’o wo’u rapa mangampotundeka wo’u kami to anaguruNya see kami damadota mangika palaong mami ri rayanya mangampeas kama’iNya. Wali Ia manganto’o, “Palaong to mawali tempo i Pue Allah Makole ri lino maya raporapaka seja ewa si’i. Rapanya re’e samba’a tau sugi, ia togo to papolaonginya. Wali tau sugi etu dayau njo’u tana to longko. Pei tempo ia tawa yau ia mampokio to papolaonginya panewa mansarumakaka resi sira samparia to ia puenya.
15Ia mangawaika resi sira doi samba’a pei samba’a singkonong ewa kapande nsira damampasilonga. Wali samba’a to papolaonginya etu ia mangawaika lima nsowu ngkomba doi pera. Pasi samba’a wo’u to papolaonginya ia mangawaika dua nsowu ngkomba doi pera. Panewa samba’a wo’u ia mangawaika sansowu ngkomba doi pera. Roo see ia mayoko dayau njo’u longko.
16“Wali yako etu to papolaong to nawaika mpuenya doi lima nsowu ngkomba etu, ia mansaka yau mangampake doi etu mangoli pasi mampobalu see naka tidugang wo’u lima nsowu ngkomba doi pera etu.
17Pasi ewa see seja naika nto papolaong to nawaika mpuenya doi dua nsowu ngkomba. Doi to si ia etu tidugang seja dua nsowu ngkomba.
18Pei tau to nawaika mpuenya doi sansowu ngkomba, ia ojo yau mangika wayau ri tana panewa mangantampok yau doi mpuenya see taa danarata nsa’e.
19“Wali yako etu masae panewa rata muni tau pue nto papolaong etu. Ojo karatanya muni ia mampotanaka resi to papolaonginya mangkonong doi to isarumakakanya resi sira seore.
20Wali to papolaong to mangantima doi lima nsowu ngkomba etu, ia mangkenika tau puenya doi to rasarumakaka resi ia pasi ia mangkeni seja doi lima nsowu ngkomba to wua mpalaonginya. Ia manganto’o, ‘Pue, komi mansarumakaka resi aku lima nsowu ngkomba doi pera, pei lo’aja, aku roomo mangadugang wo’u lima nsowu ngkomba.’
21“Wali tau puenya manganto’o, ‘Matao kojo! Korom to papolaong to matao pasi to masipato rasarumaka. Wali apa saba korom masipato rasarumaka mampasilonga palaong to kodi etu, see naka aku damangokotaka korom damampasilonga palaong to bae wo’u batuanginya. Wali pasuamo pei pakandende rayamu sindara-ndara pei aku.’
22“Wali roo see ma’i wo’u to papolaong to nawaika mpuenya doi dua nsowu ngkomba. Ia manganto’oka tau puenya, to’onya, ‘Pue, komi mansarumakaka resi aku dua nsowu ngkomba doi pera, pei lo’aja, aku roomo mangadugang wo’u dua nsowu ngkomba.’
23“Wali tau puenya manganto’o, ‘Gete, matao kojo! Korom to papolaong to matao pasi to masipato rasarumaka. Wali apa saba korom masipato rasarumaka mampasilonga palaong to kodi etu, see naka aku damangokotaka korom damampasilonga palaong to bae wo’u batuanginya. Wali pasuamo pei pakandende rayamu sindara-ndara pei aku.’
24“Wali yako etu ma’i seja to papolaong to nawaika mpuenya doi sansowu ngkomba. Ia rani mangika anto, see naka ia mawuti mampakasala tau puenya, ia manganto’o, ‘Pue, aku kunsani komi tau to maroso kojo porentamu. Komi mamota nja’u tampa to si’a komi mampomuya pasi komi mamporomung wua mpinumuya to si’a komi mangansawu.
25Wali aku meka mampobuuka danuhuku ngkomi ane bara tibute yau doi ngkomi, see naka aku yau mangansayaka doi etu la’u raya ntana. Wali si’i muni doi to komi puenya etu.’
26“Wali tau puenya manganto’o, ‘Gete korom to papolaong to maja’a pasi meyoko! Korom manganto’o aku mamota nja’u tampa to si’a aku mampomuya pasi mamporomung wua mpinumuya to si’a aku mangansawu.
27Wali ane monso pu’u lengkongku ewa to nuto’o ngkorom etu, maka pei korom taa mangkeni doingku etu pei mamposaka nja’u bang see tempo aku rata muni aku maya mangantima muni doi etu pasi bunganya?’
28“Wali roo see, tau pue nto papolaong etu manganto’oka sa’e, to’onya, ‘Oko yau doi sansowu ngkomba etu yako resi ia pei waika wo’u resi tau to re’e doinya sampuyu nsowu ngkomba.
29Apa i sema-sema tau to masipato rasarumaka, tau etu darawaika wo’u. Wali bae kojo to re’e resi ia. Pei tau to taa masipato rasarumaka, tau etu nempo re’e sangkodi to rasarumakaka resi ia, to etu daraoko yau see ia tamo re’e bara kesaa.
30Panewa soko to papolaong to tare batuanginya si’i pei panasok yau njo’u longko, njo’u tampa to mawuri. Nja’u ria tau tumangi-mangi pasi sakangke’i baganginya.’” Wali etu semo rapa to nato’oka i Yesu kami to anaguruNya see kami mangansani mampakadota mangika palaong mami ri rayanya mangampeas tempo ngkama’iNya.
31Wali yako etu i Yesu manganto’o wo’u, “Wali Aku, Wiyaa nto Lino, dama’i ri raya ngkayawangKu pasi samparia pomakaungKu yako ndate saruga, sira dama’i sindara-ndara pei Aku. Wali tempo Aku dama’i etu, Aku damangabotus to lino, see naka Aku damatunda ri gadera to tondong kuasangKu pasi kayawangKu.
32Pasi tempo etu tau samparia bansa darapasiromunaka ri tangongKu, panewa Aku damangaga’a sira ewa naika nto pangkampang domba mangaga’a domba pasi bembe.
33Wali tau to singkonong pei Aku, to raporapaka ewa domba, tau etu dakuposaka ri sambalingKu tondo ngkana. Pasi tau to taa singkonong pei Aku, to raporapaka ewa bembe, tau etu dakuposaka ri sambalingKu tondo ngkii.
34“Yako etu Aku, i Makole, damanganto’oka tau to re’e ri sambalingKu tondo ngkana, Aku damanganto’o, ‘Maimo. Komi semo tau to Makolemu i Pue Allah. Wali mai apa danawaika mPa’angKu rasi. Apa rasi to rawaika resi komi etu, rasi etu rapasigenaka yami komi yako ri temponya lino si’i rapapowali, pasi maya raporapaka ewa panta to nawaika mpa’a resi ananya.
35Wali komi damangarata rasi etu apa tempo Aku moro kompongKu seore komi mampokoni Aku. Pasi tempo Aku mara ngangangKu komi mangawaika Aku anu to rainu. Pasi Aku ewa tau to rata yako ri lipu to yusa pei komi mangansale Aku maroo ri raya banuamu.
36Pasi tempo Aku taa gana pakengKu komi mangawaika Aku pake. Pasi tempo Aku masaki komi mangkampang Aku. Pasi tempo Aku re’e ri raya ntarungku komi yau mayunu resi Aku.’ Wali apa saba ewa wetu nuika ngkomi, see naka komi darawaika rasi. Ewa wetu daKuto’oka tau to ri tondo ngkanangku etu.
37“Wali tau to singkonong pei Aku etu sira damampotanaka resi Aku, sira damanganto’o, ‘Pue, kami taa mangendo temponya kami re’e mangansawang Komi ewa wetu. Bara mpia temponya kami re’e mangkita Komi moro kompoMu pei mampokoni Komi bara mangkita Komi mara ngangaMu pei mangawaika Komi anu to rainu?
38Pasi mpia temponya kami mangkita Komi ewa tau to rata pei mangansale Komi maroo ri raya banua mami, bara mangkita Komi taa gana pakeMu pei mangawaika Komi pake?
39Pasi mpia temponya kami mangkita Komi masaki pei mangkampang Komi bara mangkita Komi ri raya ntarungku pei yau mayunu resi Komi?’
40“Wali Aku damanganto’oka sira, ‘Aku manganto’oka komi, monso pu’u ponto ngkani komi nangika palaong to ewa wetu mangansawang tau to rato’oka tua’ingKu si’i, nempo to taa bose angga nsira, batuanginya ane ri pangkita nu matangKu komi nangika palaong to etu mangansawang Aku.’
41“Wali yako etu Aku damanganto’oka wo’u tau to re’e ri sambalingKu tondo ngkii, Aku damanganto’o, ‘Piyaimo yako resi Aku, komi to roomo natanaa yau i mPue Allah. Inta njo’u apu to singkasaenya mawea, to rapasigenaka i Kepala nto pantipu pasi pomakaunya.
42Piyai, apa tempo Aku moro kompongKu seore komi taa mangawaika Aku pangkoni. Pasi tempo Aku mara ngangangKu komi taa mangawaika Aku anu to rainu.
43Pasi Aku ewa tau to rata yako ri lipu to yusa, pei komi taa mangansale Aku maroo ri raya banuamu. Pasi tempo Aku taa gana pakengKu, komi taa mangawaika Aku pake. Pasi tempo Aku masaki komi taa mangkampang Aku pasi tempo Aku ri raya ntarungku, tempo etu komi taa yau mayunu resi Aku.’
44“Wali tau to etu sira seja damangansono, sira damanganto’o, ‘Gete, Pue, taa masipato kami rapakasala, apa kami taa kojo mangendo temponya kami re’e mangkita Komi parluu rasawang ewa wetu pei kami taa mangansawang! Kami tare mangkita Komi moro kompoMu, bara mara ngangaMu, bara ewa tau to rata, bara taa gana pakeMu, bara masaki bara ri raya ntarungku. Kami tare mangkita Komi ewa wetu!’
45“Wali Aku damanganto’oka sira, ‘Aku manganto’oka komi, monso pu’u ane komi taa mangika palaong to ewa wetu mangansawang pua’ingKu si’i nempo to bose angganya pasiwa to taa bose angganya, batuanginya ane ri pangkita nu matangKu, komi taa seja mangansawang Aku.’
46“Wali yako etu, tau to re’e ri sambalingKu tondo ngkii etu, sira damayoko. Sira dayau damangarata huku to singkasaenya. Pei tau to singkonong pei Aku sira dayau damangarata katuwu to singkasaenya.” Wali samparia etu, etu semo gombo i Yesu mangansono pampotanaka mami to anaguruNya mangkonong temponya Ia dama’i wo’u.
Download Audio MP3 (Matius 25):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel