1Wali yako etu i Yesu manganto’o wo’u, to’oNya, “Tempo komi mangabotus sa’e, ne’e mampakasala sira see komi taa seja darapakasala.
2Apa ewa wimba nuika ngkomi mangabotus sa’e, ewa wetu seja komi darabotus. Wali see naka ane komi mangika manoto tempo mangabotus sa’e, ane ewa see komi damangarata seja kanoto. Pei ane komi ojo mampakasala sa’e, ane ewa see, komi darapakasala seja.
3Wali maka pei komi mampakasala yunumu tempo ia mangika dosa to maya raporapaka ewa yoba ngkaju to nja’u raya matanya? Pei ane dosa to nuika ngkomi, dosa etu maya raporapaka ewa tinja to mampakabuta mata to si komi, pei komi taa mangepe dosamu to bae etu!
4Wali ane re’e tinja ri raya mata ngkomi, taa masipato komi manganto’oka yunumu, ‘Mai, aku damangayali yau yoba ngkaju yako ri raya matamu.’
5O komi to ojo gombomu manoto, yali yau ruyu tinja yako ri raya nu matamu panewa roo see komi bara mayoasimo mangkita see maya mangayali yau yoba ngkaju yako ri mata nu yunumu.”
6Wali yako etu i Yesu manganto’o rapa mampakanasaka tau ne’e mampotundeka tuntu i mPue Allah resi tau to bo’onya kojo mampodongeka. Ia manganto’o, “Anu to bae batuanginya, ne’e rawaika asu to maja’a kiranya, apa asu etu ojo damangansoko komi. Pasi ane watu to masuli olinya to rato’oka mutiara, ne’e ratajika yau ri tango mbawu, apa wawu etu ojo damangalombu yau.” Wali etu semo rapa to nato’o i Yesu etu.
7Yako etu i Yesu manganto’o wo’u, to’oNya, “Wali ane re’e to parluu ngkomi, ne’e mandoo marapi resi i Pue Allah see komi darawaika. Ane re’e to parluu ngkomi, ne’e mandoo mangaliwu resi i Pue Allah panewa Ia damangansawang see komi damangarata. Pasi ane parluu rasawang, ne’e mandoo mamporapi sawang resi i Pue Allah ewa naika ntau to mananya yau ri banua nu yununya damarapi sawang resi ia. Apa ane komi marapi sawang resi i Pue Allah, Ia damangansawang komi.
8Apa samparia tau to marapi, tau etu damangantima. Pasi tau to mangaliwu, tau etu damangarata. Pasi tau to marapi rasawang, tau etu darasawang.
9“Rapanya komi to pa’a, ane anamu mamporapi roti, wimba, komi bara mangawaika ia watu? Gete, taa!
10Pasi ane ia mamporapi bau, wimba, bara ule to danuwaika ngkomi ia? Si’a seja!
11Wali komi nempo tau to maja’a, komi mangansani seja ewa wimba raika mangawaika anu to matao resi nganamu. Wali taa manto’o Pa’a ngkomi to ndate saruga. Ia semo to noto-noto wo’u mangawaika anu to matao resi tau to marapi resi Ia.
12Wali saba komi rani sa’e damangika matao resi komi, see naka masipato komi damangika seja matao resi sira. Apa etu semo batuanginya samparia to ratulis nja’u raya tuntu i mPue Allah, nempo ri porenta i Musa pasi samparia anu to napotundeka nto pantuntu tuntu i mPue Allah tempo owi.”
13Wali i Yesu manganto’o wo’u, “Jaya to rapangarata katuwu maya raporapaka ewa wombo mpampa to kodi katawaanya. Wali pasua ri wombo mpampa to etu. Apa ane wombo mpampa to bae katawaanya pasi jaya to bae, boros tau to masua re ria, pei tau to masua re ria etu darapakaja’aka yau.
14Pei wombo mpampa to kodi katawaanya pasi jaya to kodi, tau to masua re ria damangarata katuwu. Pei taa boros tau to mangarata wombo pasi jaya to etu.
15“Wali jagai kojo, apa re’e to pantuntu tuntu to taa monso. Sira mampoanika tau to matao to raporapaka ewa domba. Pei kamonsonya sira ewa asu maila to maja’a kiranya.
16Pei komi maya manasa mangkonong sira saba yako anu to napotunde nsira, to raporapaka ewa wuanya. Rapanya ewa si’i: Tau taa mangarata wua anggur yako ri kaju to marui. Pasi taa seja mangarata wua ara yako ri kaya to marui.
17Pasi ewa see seja kaju. Apa samparia kaju to matao, matao seja wuanya. Pei ane kaju to maja’a, maja’a seja wuanya.
18Wali ane kaju to matao, kaju etu taa maya mampowuaka wua to maja’a. Pasi kaju to maja’a taa maya mampowuaka wua to matao.
19Pei samparia kaju to taa mampowuaka wua to matao, kaju etu ratowo yau pei rapanasoka yau ri raya nu apu.
20Wali ane to pantuntu tuntu to taa monso, sira raporapaka ewa kaju etu,wali komi damangansani sira taa monso saba yako anu to napotundeka nsira to raporapaka ewa wua ngkaju to maja’a.
21“Wali boros tau to manganto’oka Aku, ‘Pue’ pasi mampoanika mangalulu Aku. Pei taa samparia tau etu to damawali tau to Makolenya i Pue Allah. Ojo tau to mangika pamporani mPa’angKu to ndate saruga, ojo tau to etu to damawali tau to Makolenya i Pue Allah.
22Wali ane ratamo eonya to darapangabotus to lino, boros tau to damanganto’oka Aku, ‘Pue, Pue, maka pei Komi taa mampalaes kami? Apa kami mangampake kuasa ngKomi mamporata tuntuMu. Pasi kami mangampake seja kuasa ngKomi mangarubak measa yako resi tau pasi mangika boros palaong to taa rapobiasa.’ Ewa see danato’o ntau etu.
23Pei Aku damangansono sira pasi damanganto’o, ‘Piyai yako resi Aku komi to maja’a lengkomu. Komi si’a taungKu ri kamonso-monsonya.’ Etu semo to dakuto’oka sira.
24“Wali i sema-sema tau to mampodongeka gombongKu si’i pei mangampolengkoka, tau etu pande. Ia maya raporapaka ewa tau to pande to mangawangu banuanya ri rapa mbatu to bae.
25Panewa roo see tudu uja pasi mowo ue pasi ma’i ngoyu marimbo kono banua ntau pande etu. Pei banua etu taa mapuka yau apa rapa mbatu semo pondasinya.
26Pei i sema-sema tau to mangandonge gombongKu si’i pei taa mangampolengkoka, tau etu madoyo. Wali ia maya raporapaka ewa tau to madoyo to mangawangu banuanya ri wawo bone.
27Panewa roo see tudu uja pasi mowo ue pasi ma’i ngoyu marimbo kono banua ntau to madoyo etu. Wali maja’a yau banua etu. Tamore toronya to taa maja’a apa taa maroso pondasinya ri wawo bone etu.”
28Wali ojo karoonya i Yesu manganto’o gombo etu, ipu raya ntau boros to mangandonge gomboNya tempo Ia mampotunde etu.
29Naka pei ipu raya nsira apa Ia mampotunde ewa tau to re’e kuasanya, si’a ewa tau to biasa mampotundeka sira porenta i Musa.
Download Audio MP3 (Matius 7):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel