Alkitab Mobile SABDA
[VER] : [TAA]     [PL]  [PB] 
 <<  Wahyu 22 >> 

1Wali yako etu pomakau i mPue Allah mampaporaoka aku koro nu ue to mangawai katuwu. Ue etu malino kojo ewa kasa to rato’oka kristal. Wali ue etu maili yako ri gadera to napatunda i mPue Allah pasi Ana nu Domba.

2Panewa yako nja’u ria ue etu maili seja ri tongo njaya ri kota etu. Pasi ri towo nue etu sambote pei sambote re’e kaju to mangawai katuwu. Kaju etu pontoponto wuya nakawua. Wali sampuyu pei dua ngkani rayanya santo’u mawua. Wali ira ngkaju etu rapake ewa pakuli damampakatao muni to lino to si’a to Yahudi.

3Wali anu to natonaa i mPue Allah tamo re’e. Gadera i mPue Allah pasi gadera nu Ana Domba re’e ri raya ngkota etu, pasi to papolaongiNya mangika palaong mampue mampakabae Sira.

4Sira damangkita lio i mPue Allah, pasi sanga i mPue Allah daratulis ri kire nsira.

5Wali tempo etu tamo re’e kawuri, wali sira tamo parluu reme nu eo pasi pansona apa i Pue Allah semo reme. Wali sira damaporenta sindara-ndara pei i Pue Allah rataka ri singkasaenya.

6Wali ojo karoonya aku mangkita etu, pomakau i mPue Allah manganto’oka aku, “Gombo si’i monso pu’u pasi masipato rasarumaka. I Pue Allah to mangawaika to pantuntu tuntuNya i Nosa Mapasing, Ia semo to room mampokau pomakauNya ma’i resi komi to papolaongiNya, damampaponsanika komi palaong to tamo masae damawali.”

7Wali i Pue Yesu manganto’o, “Padongeka kojo! Aku majoli ma’i. Wali masanang kojo tau to mampodongeka kareba to ratulis ri raya buku si’i mangkonong palaong to damawali.” Ewa wetu gombo i mPue Yesu.

8Wali aku semo i Yohanes, aku semo to mangandonge pasi mangkita palaong to napapokitaka mpomakau i mPue Allah aku. Tempo aku mangandonge pasi mangkita, aku madungku yau ri tana ri tango mbiti mpomakau etu mampue resi ia.

9Pei ia manganto’oka aku, “Ne’e mampue resi aku. Pampue resi i Pue Allah! Apa aku seja to papolaong i mPue, sewaju pei korom pasi sewaju pei a’i-a’i ngkorom, etu semo to pantuntu tuntu i mPue Allah, pasi sewaju pei samparia to mangaluluka gombo to re’e ratulis ri raya buku si’i.” Etu semo to nato’oka mpomakau etu aku.

10Pasi yako etu ia manganto’oka seja aku, “Ne’e mangawuni gombo to ratulis ri raya nu buku si’i to manganto’o yami palaong to damawali, apa mosumo temponya damawali.

11Wali i sema to mangika palaong to maja’a, biakamo napongika palaong to maja’a etu. Pasi i sema to lengkonya makarika, biakamo lengkonya etu makarika. Pasi i sema to mangika palaong to singkonong pei i Pue Allah, biakamo napongika palaong to singkonong pei i Pue Allah etu. Pasi i sema to i Pue Allah Puenya, biakamo napongika lengko to masipato naika ntau to i Pue Allah Puenya.”

12Wali i Yesu manganto’o, “Padongeka! Aku majoli dama’i mangangkeni ntanapa ntau. Wali Aku damangawaika sira samba’a pei samba’a singkonong ewa palaong to nikanya.

13Aku semo Alpa pasi Omega, batuanginya Aku semo to uyunya pasi to purinya, to pamulanya pasi to kapuranya.” Etu semo gombo i Yesu.

14Wali masanang raya ntau to mangantatap bajunya, apa ane ewa see, sira masipato mangkoni wua ngkaju to mangawai katuwu, pasi sira masipato seja masua ri raya ngkota liu ri wombonya.

15Pei tau to makarika lengkonya, to raporapaka ewa asu, pasi tau to mangadoti sa’e, tau to magoyal, tau to mampopate sa’e, tau to mampue pue to yusa, pasi samparia tau to masanang sangkani mawuti, sira samparia paka nja’u sambali ngkota.

16Wali i Yesu manganto’o wo’u, “Aku semo i Yesu, pasi Aku room mampokau pomakaungKu resi komi mampakarebaka tau to mangaya Aku mangkonong palaong to si’i. Aku semo kalenya pasi wiyaa i Daud. Pasi Aku semo batu’e ngkeo anu to mareme kojo.” Etu wo’u gombo i Yesu.

17Wali yako etu, i Nosa Mapasing pasi Kasimpande nu Ana Domba sira manganto’o, “Maimo!” Pasi i sema tau to mangandonge gombo si’i, matao ia seja manganto’o, “Maimo!” Pasi i sema to mangau warokonya, biakamo ia naka ma’i. Pasi i sema to rani, biakamo ia mangoko ue to mangawai katuwu, ue etu tare olinya to danabayar.

18Wali aku mampatiendoka samparia tau to mangandonge gombo to ratulis ri raya buku si’i mangkonong palaong to damawali, aku manganto’o ane re’e tau to mangadugangika gombo to yusa, i Pue Allah damangadugang seja huku ntau etu see tau etu mangarata seja soba to re’e ratulis ri raya buku si’i.

19Pasi ane re’e tau to mangangkurang gombo to ratulis ri buku si’i mangkonong palaong to damawali, i Pue Allah damangoko yau tila ntau etu ri kaju to mangawai katuwu to re’e ri kota mapasing anu to re’e ratulis ri buku si’i.

20Wali i Yesu manganto’o gombo si’i monso, pasi Ia manganto’o, “Aku majoli ma’i.” Amin! O Pue Yesu, ma’imo!

21Wali aku mamporapika resi i Pue Yesu see Ia mampaponsanika kanotoNya resi samparia tau to i Pue Allah Puenya.



Download Audio MP3 (Wahyu 22):
Mobile (Low Quality) - CD (High Quality)

 <<  Wahyu 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel