Alkitab Mobile SABDA
[VER] : [TAA]     [PL]  [PB] 
 <<  Yohanes 7 >> 

1Wali yako etu i Yesu mangalinjak propinsi Galilea. Ia tawa rani yau njo’u propinsi Yudea apa re’e to Yahudi nja’u ria to rani mampopate yau Ia.

2Pei mosu rata temponya roa nto Yahudi to rato’oka Roa Tenda,

3tempo etu a-i-a’i i Yesu mampokore Ia, sira manganto’o, “Piyaika lipu si’i pei inta pago roa nja’u Yudea see anaguruMu nja’u ria maya mangkita seja palaong to taa rapobiasa to nuika ngKorom.

4Apa ane Korom rani naponsani ntau boros, Korom taa maya mangawuni palaong to Nuika. Wali ane Korom damangika palaong to taa rapobiasa etu, gete, to tao-tao Korom mampapokitaka resi tau sambawo lino!”

5Wali ewa wetu nato’o ntua’i i Yesu mampokore Ia, apa sakowa sira to sintua’i pei Ia, sira taa seja mangaya Ia.

6Wali i Yesu manganto’oka sira, “Tawa rata temponya to masipato Aku dayau. Pei ane komi, mpia temponya komi rani yau, komi maya yau apa komi taa maja’a nakita nto lino. Pei ane Aku, Aku maja’a nakita nsira apa Aku sangkani mampaponsanika sira lengko nsira to maja’a.

7(7:6)

8Wali intamo komi njo’u roa etu. Aku tawa dayau, apa tawa rata temponya to masipato Aku dayau.”

9Wali ewa wetu gombo i Yesu resi tua’iNya. Roo see Ia maroo-roo ruyu nja’u propinsi Galilea.

10Wali yako etu a’i-a’i i Yesu mayoko dayau ndeku Yerusalem damangampago roa. Pei payunya sira yau, i Yesu yau seja, pei tempo Ia yau etu, Ia taa yau sinjaya pei tau boros. Ia yau tempo tare tau boros to mangkita.

11Wali re’e to Yahudi to mangaliwu-liwu Ia nja’u tampa rapangika roa. Sira mampotanaka resi tau nja’u ria, to’onya, “Imbare ngkai etu?”

12Pasi ane tau boros to siromu tempo roa etu, sira mampojawaka resi yunu nsira samba’a pei samba’a mangkonong i Yesu. Re’e to manganto’o, “Ia tau to matao.” Pei re’e seja tau to manganto’o, “Taa! Ia ojo mangantipu tau.”

13Ewa wetu naika nsira magombo mangkonong i Yesu, pei tare sira to magombo mangkonong Ia tempo boros tau mangandonge, apa sira meka bara danahuku ntau tu’a nto Yahudi apa tau tu’a etu, sira taa masanang ane tau boros magombo mangkonong i Yesu.

14Wali ri tongonya roa etu, i Yesu yau ri banua i mPue Allah pei mula mampotunde tau nja’u tongonatanya.

15Ojo pangandonge nto Yahudi gombo i Yesu mampotundeka tau etu, re’e sira to ipu rayanya mandonge gomboNya to pande kojo etu. Sira manganto’o, “Tau si’i tare maguru ri sekolah agama ngkita, wali yako imbare pangarataNya kapande to ewa wetu?”

16Wali i Yesu manganto’oka sira, “Anu to Aku mampotundeka komi, si’a Aku pu’unya. I Pue Allah to nampokau Aku, Ia semo pu’unya.

17Wali i sema tau to monso pu’u rani mangika pamporani i mPue Allah, matantu tau etu damangansani anu to Aku mampotundeka bara yako resi i Pue Allah semo pu’unya, bara ojo gombo to si Aku semo.

18Wali ane tau mampotunde ojo yako pampobuuka to si iaja, tau etu ojo mamporani danabarong nsa’e. Pei tau to mampotunde apa mamporani sa’e mangabarong tau to nampokau ia, tau etu taa mawuti wali ia masipato rasarumaka.

19Komi mangansani i Musa semo to nangawaika komi porenta, pei tare pasi samba’a komi to mangalulu kojo porenta etu. Manasa resi Aku komi taa mangalulu porenta i Musa apa porenta etu manganto’o, ‘Ne’e mampopate sa’e,’ pei komi rani mampopate yau Aku!”

20Pei ojo pangandonge ntau boros gombo i Yesu etu, sira manganto’o, “Gete! Kameasa Korom! Tare tau to mansongka damampopate yau Korom!”

21Wali i Yesu manganto’oka sira, “Aku sangkanija mangika palaong to taa rapobiasa ri Eo Rapandoo, pasi tempo etu komi ipu rayamu mangkita Aku mangika palaong ri eo etu.

22Pei kamonsonya komi seja mangika palaong ri Eo Rapandoo. Apa komi mangansui ngana ngkomi nempo ri Eo Rapandoo apa mangalulu porenta to nawaika i Musa komi. (Pei kamonsonya porenta to etu si’a yako i Musa, apa ri tempo tawa re’e i Musa, tempo etu semo i Pue Allah manganto’oka bue-bue ngkita mangika palaong to etu.)

23Wali ane komi mangabiaka ana kodi rasui ri Eo Rapandoo naka ne’e raewa porenta i Musa, ane ewa see, maka pei komi maja’a rayamu resi Aku apa saba Aku mampakatao muni koro ntau kabaenya ri Eo Rapandoo?

24Ne’e mangabotus Aku ane tawa manasa mangkonong palaong to inikangKu. To tao-tao komi mangabotus Aku singkonong pei anu to masipato ri pangkita i mPue Allah.” Ewa wetu nato’o i Yesu manganseko tau etu.

25Wali tempo i Yesu manganto’o gombo etu, re’e to Yerusalem to manganto’o, “Bara si’anya tau si’i semo to tau tu’a ngkita mansongka damampopate yau?

26Lo’a, Ia magombo ri tango ntau boros pei tau tu’a ngkita etu sira taa mangewa Ia. Wali wimba, tau tu’a ngkita sira bara mampobuuka Ia monso pu’u i Kerisitu, Makole parajanji i mPue Allah?

27Pei gete, taa maya ewa wetu, apa ane i Kerisitu, Makole parajanji i mPue Allah, tare tau to mangansani yako imba kama’iNya etu. Pei ane tau si’i kita mangansani kojo yako imba kama’iNya.”

28Wali tempo sira manganto’o gombo etu, i Yesu tiroowa mampotunde ri tongonata banua i mPue Allah etu. Pei Ia mangandonge gombo ntau to manganto’o sira mangansani yako imba kama’iNya. See naka Ia mampakaroso looNya manganto’o, “Ane ewa pampobuuka ngkomi, komi mangansani Aku pasi mangansani yako imba kama’ingKu, pei taa monso! Apa Aku taa ma’i ojo mangalulu songka to si Aku. Aku ma’i napokau i mPue Allah. Ia masipato rasarumaka, pei komi taa mangansani i sema kamonsonya Ia.

29Pei Aku mangansani kojo i sema kamonsonya Ia apa Aku ma’i yako resi Ia pasi Ia semo to nampokau Aku.”

30Wali ojo pangandonge ntau boros gombo i Yesu etu, re’e ri oyo nsira to ranimo mangansoko Ia apa Ia manganto’o yako resi i Pue Allah kama’iNya. Pei ane ewa songka i mPue Allah tawa rata temponya Ia darasoko, wali see naka tau taa mawali mangansoko Ia.

31Pei boros seja tau nja’u ria to mangaya Ia. Sira manganto’o samba’a pei samba’a, “Tare yusa i Kerisitu, Makole parajanji i mPue Allah, kasimbalinya yako tau si’i. Apa tare tau to yusa to manganangi Ia mangika palaong to taa rapobiasa.”

32Wali to Yahudi to aliran Parisi, sira mangandonge anu to napojawaka ntau boros mangkonong i Yesu. See naka to Parisi etu sindarandara pei kepala-kepala nto pampue sira mampokau bara sawei mba’a tau yau damangansoko i Yesu. Tau to napokau nsira etu, tau etu palaonginya mangajagai banua i mPue Allah. Wali pomakaunya etu yau mangampago i Yesu.

33Wali tempo to Parisi pasi yunu nsira mampokau tau etu, tempo etu i Yesu tongotongonya mampogomboka tau boros. Ia manganto’o, “Aku tamo masae kojo siwaka pei komi, Aku damawolili muni resi Ia to nampokau Aku.

34Tempo etu komi damangaliwu Aku, pei komi tamo damangarata Aku, apa komi taa maya yau ri tampa daKukayako etu.”

35Wali ojo pangandonge ntau tu’a nto Yahudi gombo i Yesu etu, sira mampotanaka samba’a pei samba’a, to’onya, “Bara imbanjo danakanjo’u ngkai si’i naka pei Ia manganto’o kita tamo maya damangarata Ia? Wimba, Ia bara yau damaroo resi yunu-yunu ngkita to Yahudi to maroo nja’u lipu nto Yunani, see damampotunde wo’u to Yunani etu?

36Apa Ia manganto’o, ‘Komi damangaliwu Aku, pei komi tamo damangarata Aku.’ Pasi Ia manganto’o seja, ‘Komi taa maya yau ri tampa daKukayako etu.’ Wali kesaa batuanginya gomboNya etu?” Wali ewa wetu nato’o nto Yahudi etu.

37Wali yako etu ratamo eo to pangkaroonya Roa Tenda. Eo etu semo to bae kojo batuanginya ane ri roa etu. Wali tempo etu i Yesu makore ri tango ntau boros, Ia maroso looNya mangaligi sira, to’oNya, “I sema tau to mamporani ue to mangawai katuwu, to tao-tao ia mai mangalulu Aku panewa Aku damampapoinuka ia ue to mangawai katuwu etu.

38Palaong to etu singkonong pei anu to ratulis ri raya ntuntu i mPue Allah mangkonong tau to mangaya Aku. Anu to ratulis etu manganto’o, ‘Tau to mangaya Aku, tau to etu re’e mata nu ue to maili yako ri rayanya, ue etu mangawai katuwu.’”

39Wali etu semo ligi to nato’o i Yesu. Ane ri ligi etu, ue to mangawai katuwu batuanginya i Nosa Mapasing to dama’i damaroo ri raya ntau to mangaya i Yesu. Pei tempo etu i Nosa Mapasing tawa rawaika resi tau apa i Yesu tawa tiokotaka muni nto’u saruga. Wali ane tempo Ia datiokotaka muni nto’u saruga etu, tempo etu Ia damangoko muni kayawaNya.

40Wali ojo pangandonge ntau boros gombo i Yesu etu, re’e sira to manganto’o, “Monso pu’u tau si’i to pantuntu tuntu i mPue Allah to kita mangampea!”

41Pasi sangga’a manganto’o, “Ia i Kerisitu, Makole parajanji i mPue Allah!” Pei re’e wo’u tau to taa mangansani i Yesu rapoanaka nja’u kota Betlehem. Sira mampondayaka Ia rapoanaka nja’u propinsi Galilea, see naka sira manganto’o, “Si’a! Apa i Kerisitu taa dama’i yako nja’u Galilea.

42Apa tuntu i mPue Allah manganto’o i Kerisitu, Makole parajanji i mPue Allah, Ia wiyaa i Makole Daud. Pasi Ia darapoanaka nja’u kota Betlehem, kota to nakaroo i Daud tempo owi.”

43Wali tau boros etu mawali masimpayu rayanya apa saba i Yesu.

44Re’e sira to rani mangansoko Ia, pei tare tau to mangansoko.

45Wali yako etu tau to palaonginya mangajagai banua i mPue Allah, sira yau muni resi kepala-kepala nto pampue pasi to Yahudi to aliran Parisi to roomo nampokau sira yau mangansoko i Yesu. Rata nja’u ria, tau to nampokau sira etu mampotanaka resi sira, to’onya, “Gete! Maka pei komi taa mangkeni Ia?”

46Wali tau etu mangansono, sira manganto’o, “Kami taa mangansoko Ia apa kami re’e mangandonge anu to Napotundeka. Wali rataka ri tempo si’i, tawa re’e tau to manganto’o gombo to ewa wetu kagayanya!”

47Wali to Yahudi to aliran Parisi, sira manganto’o, “Gete! Wimba, komi seja natipu ngkai etu?

48Lo’a, tare pasi samba’a kami to aliran Parisi bara tau tu’a nto Yahudi to mangaya Ia.

49Pei tau boros to bea etu, to taa manasanya porenta i Musa, sira mangaya Ia, wali sira danatanaa yau i mPue Allah.”

50Wali tempo to Yahudi to aliran Parisi magombo etu, nja’u seja i Nikodemus to yau mangampago i Yesu seore ri raya mburi. Ia seja to Yahudi to aliran Parisi, wali ia manganto’oka yununya etu,

51“Ane ewa porenta ngkita, kita taa maya mangahuku tau ane tawa mangandonge ruyu notonya see manasa palaong to inikanya.”

52Pei yunu i Nikodemus to Parisi etu mampokore ia, sira manganto’o, “Gete! Korom seja tau Galilea! Paguru ruyu tuntu i mPue Allah, panewa korom damanasa seja tare pasi samba’a to pantuntu tuntu i mPue Allah to ma’i yako nja’u Galilea.”

53Wali ojo karoonya sira manganto’o gombo etu, sira samparia yau muni njo’u banua nsira samba’a pei samba’a.



Download Audio MP3 (Yohanes 7):
Mobile (Low Quality) - CD (High Quality)

 <<  Yohanes 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran