1'O ngo-ngaku ge'ena ma ngale panako 'itiaiokau 'okia naga gee ngone pongano-nganonou, de mita pamao 'itantuuokau 'okia naga gee kopamakewasi.
2Sababu 'o ngo-ngaku, so ma Jo'oungu ma Dutu wakisanangi nanga edete de nanga dotumu ma sirasi.
3Sababu 'o ngo-ngaku, so ngone pasahe 'o dunia ne'ena ma Jo'oungu ma Dutu wosidadiku de wi demo, so 'okia naga gee pamake-make ge'ena gee kopamake-makewa 'idadiku.
4Sababu 'o ngo-ngaku, so 'o Habel wokula ma Jo'oungu ma Dutuka 'o su-suba gee 'ifoloi yaowa de to Kain. Ge'enau so ma Jo'oungu ma Dutu wongose 'ato 'o Habel 'una ge'ena 'awi singina 'itiai. Sababu 'inyatakau 'ato ma Jo'oungu ma Dutu wadawongo 'awi su-suba. 'O Habel wosongenokau, ma ngano de 'awi ngo-ngaku so 'awi di-diai ge'ena 'imadadi 'o do-dotoko sigado ne'ena.
5Sababu de 'o ngo-ngaku, so 'o Henokh kowosongenuwa de kawigoraka 'o sorogaade. Komoiwa moi wimake, sababu 'una ma Jo'oungu ma Dutu wigoraokau. Naga 'o Buku 'Itebi-tebinoka 'isilefoku 'ato 'o Henokh kowigorakuawasi 'o sorogaade, 'una ma Jo'oungu ma Dutu wi singina wasanangi.
6'O ngo-ngaku koi'iwa, ge'ena komoiwa moi ma Jo'oungu ma Dutu wi singina yasanangi. Sababu 'o nyawa gee ma Jo'oungu ma Dutuka yaika, salingou yongaku 'ato ma Jo'oungu ma Dutu naga, de ma Jo'oungu ma Dutu 'asa wakiparasengi 'o nyawa gee yomau yomarimoi de de 'una.
7Sababu 'o ngo-ngaku so 'o Nuh ma Jo'oungu ma Dutu wisidemo 'okia sonaa gee dua 'asa 'idadi gee 'una kowamake-makewasi; 'una wosingounu ma Jo'oungu ma Dutuka sigado wodiai 'o kapali moi gee ge'enau 'una de 'awi woa ma dodaku yakisilaha. Ma 'o dunia de ma doda yahukumu, 'ena 'o Nuh 'una de 'awi ngo-ngaku so ma Jo'oungu ma Dutu wongose 'ato 'una 'o nyawa ma owa.
8Sababu de 'o ngo-ngaku, so 'o Abraham wodomoteke gee ma Jo'oungu ma Dutu wi'asoko de wisuloko wotagi 'o daeraaka gee wisijajiokau 'unaka 'idadi to 'unau wi pusaka. De 'o Abraham wotagi ngaro kowosidongoowa dua kiaka wosikaika.
9De 'o ngo-ngaku, so 'o Abraham womanoa 'o daeraaka gee ma Jo'oungu ma Dutu wosijaji-jajioka wodadi 'o nyawa ma dudunino. 'O Abraham ge'enaka dau wogogere de womanoa 'o da-darusoka. Koge'enali mita 'o Ishak de 'o Yakub gee yadawongo 'o jaji kaimatero ma Jo'oungu ma Dutuno.
10Sababu 'o Abraham woda-damaa 'o kota gee ma Jo'oungu ma Dutu wi singinaka wosigoko ma fandasi koito-torouwau.
11Sababu 'o ngo-ngaku, so 'o Abraham de ngo Sara 'idadi yamake 'o ngowaka, ngaro 'o Abraham wopereki 'ifoloiokau ma, de ngo Sara muna ma sira mi ngowaka koi'iwa ma. Ma 'o Abraham wongaku 'ato ma Jo'oungu ma Dutu 'awi jaji ma rai wagoungu.
12Ngaro 'o Abraham ma 'orasi ge'ena wopereki 'ifoloiokau so 'isoka 'o nyawa gee manga roese 'isongenokau, ma 'una womadamake wi waata 'o gudai. Ma gudai kopa'akunuwa padoimi, 'isoka 'o ngoma 'o diwangoka de 'o dowongi 'o ngooto ma batingoka.
13'Ona yoodumu gee kangano yakingose-ngosekau, 'ona ge'ena tatapu de manga ngo-ngaku sigado yosidosongene. 'Ona koyadawonguwasi 'o sagala moi-moi gee ma Jo'oungu ma Dutu wosijaji-jaji, ma 'ona yanakokau 'ato dua 'asa yamake. So 'isoka 'o kianikia yamakekau 'o gurutika so kayodo-domorene. De bege'enau 'ona yomasidemo 'ato 'ona ge'ena 'o nyawa ma dudunino de kayotagino 'o duniaka ne'ena.
14'O nyawa gee koge'ena yongose, ge'ena yosidumutu 'iwai-waiti 'ato 'ona yongano-nganonou 'o daeraa gee dua 'idadi ma gou-goungu to 'onau manga daeraa.
15'Ona yatiba-tibangi bukangi la 'o daeraa gee yamada-madakau. Sababu nako koge'ena, ge'ena to 'ona manga 'orasi ma amokou ma ngale yolio 'o daeraaka ge'ena.
16Ma ma nyo-nyata, 'ona 'ifoloi yoduaka 'o daeraa moi gee 'ifoloiosi yaowa, ge'ena la 'o daeraa gee 'o sorogaaka. Sababu ge'ena ma Jo'oungu ma Dutu kowimaekuwa nako 'ona yongose 'ato 'una ge'ena to 'ona manga Jo'oungu ma Dutu, sababu ma Jo'oungu ma Dutu wadua-duangou manga kota 'o ngai moi.
17Sababu 'o ngo-ngaku so 'o Abraham gee ma 'orasi 'awi ngo-ngaku ma Jo'oungu ma Dutu wataili, 'una womodeke 'awi ngowaka 'o Ishak widiai 'o su-suba yatuu-tuuku ma ngale wisisuba ma Jo'oungu ma Dutuka. 'O Abrahamuou wadawongo 'o jaji ge'ena, ma 'una womodeke wisisuba 'awi ngowaka womatengo-tengoka gu'una.
18Ma Jo'oungu ma Dutu 'o Abrahamuka wongose 'ato, "Ma ngekomo 'o Ishakiou nu'una, ngona 'asa namake 'ani waata gee tojajiokau ngonaka."
19'O Abraham wanako 'ato ma Jo'oungu ma Dutu wa'akunu 'o Ishak wisimomikoli ngaro wosongenoka ma, so kaidadi pongose 'ato 'o Abraham matero kawidawonginouoli 'o Ishak wosongenoka de.
20Sababu 'o ngo-ngaku, so 'o Ishak woga'asoko 'o sagala co-catu ma ngale 'o Yakub de 'o Esau manga 'ahu 'o bio-bionika.
21Sababu 'o ngo-ngaku, so 'o Yakub gee rekeni wosongenoka de wakidaga'asoko 'o co-catu ma ngale 'o Yusuf wi ngowa-ngowaika, de womasidutuku 'awi papadi ma saekika de wisuba ma Jo'oungu ma Dutu.
22Sababu 'o ngo-ngaku, so 'o Yusuf gee rekeni wosongenoka, de wobi-bicara ma ngale 'o Israel ma nyawa yosupu 'o Mesiroka, de wamadaku wi besesongo ge'ena la wi kobongo salingou ya'asa mita.
23Sababu 'o ngo-ngaku, so 'o Musa wolahiruku de wi balusu wi'iunika 'o mede sa'angeno. 'Ona wilega-lega 'ena 'una 'o ngowaka ma dero moi, de 'ona koyakimodonguwa yaparene ma Koana wi pareta.
24Sababu de 'o ngo-ngaku, so 'o Musa gee woamokokau de wooluku wisironga 'o Mesiroka manga koana wi ngowaka 'o ngeweka 'ami ngowaka.
25'Una 'ifoloi woduaka wosangisara de ma Jo'oungu ma Dutu wi kawasa, de wooluku womasa-sanangi 'o sowono ma sigoronaka gee ma sanangi ge'ena ka 'o 'orasi moioka.
26'O Musa wamaoku ngaro womadamake 'o sagala harataa 'o Mesiroka, ma 'ifoloi 'ibaraguna wisito-torou 'unaka sababu ma Koana gee 'o Nyawa Wosilaha-laha, gee ma Jo'oungu ma Dutu wosijajiokau. Sababu 'o Musa wongano-nganono 'o parasengi ma du'uruoka.
27Sababu 'o ngo-ngaku, so 'o Musa wamada 'o Mesir de kowodomodonguwa ma Koana wi do'otasa. 'O Musa wodaba-baili 'isoka kogee wimakekau ma Jo'oungu ma Dutu gee kopowimake-makewa.
28Sababu 'o ngo-ngaku, so 'o Musa wodiai 'o rame ma ngale 'o Israeloka yosupu 'o Mesiroka yosingano-nganonie, de wosuloko 'o 'aunu yosibilarotika 'o Israeloka manga woa ma ngorana ma saekino, la 'o mala'ekati gee 'o nyawa yakisonge-songene 'uwa 'iboa de yato'oma to 'ona manga ngowa-ngowaka 'o riaka.
29Sababu 'o ngo-ngaku, so 'o Israeloka 'idadi yatoaka 'o Ngooto 'Ite-terebokino, yotagi kogee 'o tonaka dudungika, 'ena 'o Mesir ma nyawa 'ona 'o ngooto ge'ena yakiluunokau gee yositaili yatoaka mita de.
30Sababu 'o ngo-ngaku, so 'o Yerikho manga kota ma tembok 'ikokitotaka gee 'o Israeloka yaki-kiloliti 'o wange tumudiingino.
31Sababu 'o ngo-ngaku mita, so 'o ngo Rahab 'o ngeweka ma dorou gumuna komisidoto'omawa de 'o nyawa-nyawa gee yoma-malawani ma Jo'oungu ma Dutuka, sababu muna makidawongo mosidi-diai 'o Israeloka manga mata-mata.
32De 'okiasi salingou tongose? Sababu 'ai 'orasi rekeni koi'iwau tosiwaiti ma ngale 'o Gideon, 'o Barak, 'o Simson, 'o Yefta, 'o Dautu, 'o Samuel, de 'o nabii-nabii.
33Sababu manga ngo-ngaku, so 'ona yosikalakau 'o koa-koana, 'ona yosidagi 'o loa, de yamake 'okia naga gee ma Jo'oungu ma Dutu wosijajiokau. 'Ona 'o singa koyakigoliwa,
34de 'ona yasongene 'o 'uku 'ila-laagomo, koyakidaenuwa yaki'oto; 'ona yolamahani ma 'idadi yokuata, 'ona yokuata 'o gudotioka, de yakisikala 'o nyawa ma dudunino manga solodado.
35Sababu 'o ngo-ngaku, so 'o nge-ngeweka gee manga nyawa-nyawa yosonge-songenokau 'idadi yomasida'ahuoli sababu yowangokali. Naga munuka yomodeke yakisikisaa sigado yosongene, de yooluku yakisipidili sababu yomau yakisiwangoli la yo'ahu 'ifoloiosi yaowa.
36Naga munuka yakisela-sela, yakipesana, yakipusuku de 'o rate, de yakibui.
37'Ona yakiteto, yakigaragaji, de munuka yakito'oma de 'o wase. 'Ona yokadagi 'o daeraa 'ireguka manga baju ka 'o domba ma kai de 'o kabingi ma kai, 'ona yosaigalere, yakihalebiru de yakisikisaa.
38'Ona manga singina 'isure ma sala, 'ona koyadaenuwa yomanoa 'o duniaka ne'ena. 'Ona kayotagi-tagi 'o tonaka 'ika-kakasaka de 'o diko-dikoka, de yomanoa 'o 'aru-'arukoka, de 'o guru-gurukoka.
39De 'ona yoodumu koyamakewasi 'okia naga gee ma Jo'oungu ma Dutu wosijajiokau ngaro manga ngo-ngaku yakisisakisiiokau 'o sakisii yaowa-owa.
40Sababu ma Jo'oungu ma Dutu wadua-duangou 'okia naga gee 'ifoloisi yaowa ma ngale ngone, so dua 'ona de de ngone, 'asa de 'itotomo.
Download Audio MP3 (Ibrani 11):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel