I. Aturan taringot tu parture ni bagabaga gararon tu Debata 1-25. II. Taringot tu parture ni buhabaju ni pinahan dohot taringot tu ugasan siharomhononhon 26-29. III. Taringot tu parture ni parpuluan 30-34.
1(I.) Dung i ro ma hata ni Jahowa tu si Musa songon on:
2Paboa ma tu halak Israel jala dok ma tu nasida: Tung sura manang ise naeng marbagabaga hasurungan, ingkon marguru tu pangasammu di angka jolma i gararonna tu Jahowa.
3Ia pangasammu di baoa na marumur duapulu taon sahat ro di onompulu taon, ingkon asamonmu ibana limapulu sekkel perak marguru tu sekkel na di inganan na badia i.
4Alai tung sura parompuan ibana, ingkon asamonmu tolupulu sekkel.
5Molo marumur lima taon jolma i sahat ro di duapulu taon, ingkon asamonmu ibana duapulu sekkel, molo baoa, alai molo parompuan sampulu sekkel do.
6Molo marumur ibana sabulan sahat ro di lima taon, ingkon asamonmu ibana lima sekkel perak, molo baoa, alai molo parompuan tolu sekkel perak asamonmu.
7Tung sura onompulu taon umur ni jolma i manang lobi sian i, ingkon asamonmu ibana sampulu lima sekkel, molo baoa, sampulu sekkel molo parompuan.
8Alai tung sura mapogoshu ibana manggarar pangasammu, ingkon ro ibana tu jolo ni malim i, asa malim i mangasam ibana; alai ingkon marguru tu na dapot tangan ni halak na marbagabaga i asamon ni malim i ibana.
9Alai tung sura pinahan do i na tarpelehon bahen pelean tu Jahowa, nasa na pinelehon ni halak sian i na badia do i di Jahowa.
10Ndang jadi singkaton manang pasambaron, na denggan singkat ni na roa manang na roa singkat ni na denggan; alai tung sura naeng sambaran ni manang ise, pinahan singkat ni pinahan, ingkon duansa badia di Jahowa.
11Alai tung sura pinahan na ramun do i na so jadi pelehononhon bahen pelean tu Jahowa, ingkon boanon do pinahan i tu adopan ni malim i.
12Ingkon malim i muse mangasam pinahan i, manang na denggan manang na roa, jala ingkon pangasam ni malim i do na lalu.
13Alai tung sura manang ise naeng manobussa, ingkon patambaonna saparlimana sian pangasammu hian.
14Tung sura manang ise pabadiahon bagasna bahen inganan na badia di Jahowa, ingkon asamon ni malim do i, manang na denggan manang na roa; ia songon i pangasam ni malim i disi, laos songon i do hot.
15Alai tung sura halak na pabadiahon i naeng manobus jabuna, ingkon patambaonna saparlima perak lobi sian pangasammu, jadi ibana ma nampuna jabu i.
16Tung sura manang ise pabadiahon di Jahowa santurpuk sian partalianna, ingkon asamonmu do i hombar tu bonina; molo sada ampang bonina ingkon mararga limapulu sekkel perak.
17Molo olat ni taon parolopolopon ibana pabadiahon ladangna, ingkon hombar tu pangasammu do hot.
18Alai tung sura dung salpu taon parolopolopon i, ibana pabadiahon ladang i, ingkon timbangon ni malim argana marguru tu taon angka na tinggal i sahat tu taon parolopolopon, dung i oruanna ma pangasamna i.
19Alai tung sura jolma na pabadiahon ladang i naeng manobus muse, ingkon patambaonna saparlima perak pangasammu hian, asa hot di ibana.
20Alai tung sura ndang naeng tobusonna ladang i, lam digadis tahe ladang i tu halak na asing, ndang tartobus be i.
21Ia dung malua ladang i di taon parolopolopon, ingkon badia ma i di Jahowa, suang songon ladang na hona harom, ingkon gabe partalian ni malim do i.
22Tung sura manang ise pabadiahon tu Jahowa santurpuk hauma na nidondonna na so golatna hian.
23Ingkon etongan ni malim tu ibana hepeng pangasammu sahat ro di taon parolopolopon, dung i lehononna ma di na sadari i hepeng pangasammu i, na badia di Jahowa do i.
24Dapot taon parolopolopon, ingkon mulak hauma i tu pandondonanna hian, tu jolma nampuna golat i.
25Alai nasa pangasammu ingkon marguru tu sekkel na di inganan na badia i: Duapulu gera, i ma sada sekkel.
26(II.) Holan buhabaju ni pinahan naung Jahowa hian nampunasa ala buhabaju, ndang jadi bagabagahonon ni manang ise, nang lombu, nang birubiru, badia hian do i di Jahowa.
27Alai tung sura pinahan na ramun do i, ingkon tobusonna do i marguru tu pangasammu, jala ambaonna dope tusi saparlimana, alai tung sura so ditobus, jadi ma gadisonna marguru tu pangasammu.
28Alai tahe nasa naung hona harom, naung hinaromhon ni manang ise tu Jahowa sian nasa ugasanna, nang jolma, manang pinahan, manang sian golatna pe, ndang jadi gadisonna manang tobusonna; ai nasa naung hona harom na badia sahali do i di Jahowa.
29Nasa naung hona harom tahe, nang sian jolma, ndang jadi tobuson, ingkon marutang hosa do.
30(III.) Nasa parpuluan gogo ni tano i, nang sian boni di ladang, nang sian parbue ni hau, Jahowa tu nampunasa, ingkon badia di Jahowa do i.
31Alai tung sura manang ise naeng manobus manang aha sian parpuluanna, ingkon ambaonna tusi saparlimana.
32Jala nasa parpuluan sian lombu manang birubiru, sian saluhut na tinudu ni batahi, ganup pasampuluhon tahe, ingkon badia di Jahowa do i.
33Ndang pola jolo tangkasan manang na uli manang na roa, jala ndang jadi pasambaronna; alai tung sura manang ise naeng manambarhon, ingkon gabe rap badia do, na sinambarhon dohot sambarna i, ndang jadi tobuson.
34I ma tona, angka na tinonahon ni Jahowa tu si Musa di dolok Sinai, pasahatonna tu halak Israel.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel