Salomo randukmo menomba lako deata
1Iatu datu Salomo ungkamali’mo ba’tu pira-pira baine bangsa senga’, boko’ ia tu anakna Firaun, iamotu baine Moab, Amon, Edom, Sidon na Het,
2dio mai tu mintu’ bangsa mangka Napepasanan PUANG lako to Israel susite, Nakua: Da misirau ta’nak sia da duka namerrau tu tau iato mai lako kalemi, da napasepangi tu penaammi umpenombai deatanna: apa la’ka’ tu penaanna Salomo lako.
3Iatu mintu’ bainena pitu ratu’, anak datu nasang, anna gundi’na tallu ratu’; namintu’ tu bainena umpapusa penaanna.
4Belanna iatonna matuamo tu Salomo, napasepangmi mintu’ bainena tu penaanna umpenombai kapenomban senga’, naurunganni tae’mo nalantuk tu penaanna lako PUANG, Kapenombanna, susi Daud, ambe’na.
5Susimoto tu Salomo umpenombai Astoret, deatanna baine to Sidon sia Milkom, apa megallianna to Amon.
6Sia napogau’ Salomo tu apa kadake dio pentiroNa PUANG sia tae’mo nalantuk penaanna umpengkaolai PUANG, susi Daud, ambe’na.
7Iatonna attu iato napabendanammo Salomo misa’ inan madao tu Kamos, apa megallianna to Moab, dao buntu rampe matallona Yerusalem sia iatu Molokh, apa megallianna to Amon.
8Susi dukato napogauranni tu mintu’ baine senga’na, tu mantunu dupa sia memala’ lako deatanna.
9Re’dekmi tu ara’Na PUANG lako Salomo, belanna’ sepangmo tu penaanna dio mai PUANG, Kapenombanna to Israel, tu mangka ombo’ penduan lako kalena,
10sia tu mangka umpepasananni tu diona apa iate, kumua da mupenombai kapenomban senga’; apa tae’ nakaritutui te pepasanNa PUANG.
11Iamoto anna ma’kada tu PUANG lako Salomo, Nakua: Belanna susimote tu kedomu, tae’ ammu karitutui tu basseKu sia iatu apa Kupondok, tu mangka Kupepasanan lako kalemu, manassa iatu kadatuan la Kualai dio mai kalemu, angKu benni taummu.
12Apa lan angge tuomu tae’pa angKu la umpogau’i susito belanna Daud ambe’mu, sangadinna iapi tu anakmu Kumane unnalai lan mai limanna.
13Tae’ angKu la unnalai nasangi tu kadatuan iato, sangadinna sangsuku la Kuben anakmu muane, belanna taungKu Daud sia belanna Yerusalem, tu mangka Kupilei langsa’.
Diona to umbali Salomo
14Napadenmi PUANG tu misa’ to umbali Salomo, iamotu Hadad, to Edom; ia misa’ tarukna datu to Edom.
15Iatonna alami Daud tu Edom sia male tu Yoab, kamandang lompo, ullamunni tu mintu’ to dipatei, napateimi Yoab tu mintu’ muane dio Edom.
16Belanna annanmo bulanna torro tu Yoab dio sola mintu’ to Israel sae lako puranna naroto’i tu mintu’ muane dio Edom.
17Apa mallai tu Hadad sia ba’tu pira-pira to Edom, to mase’ponna ambe’na, nasolan la umpallaian kalena lako Mesir; na attu iato mangura tonganpa tu Hadad.
18Ke’de’mi dio mai Midian, anna rampo lako Paran, anna ala ba’tu pira-pira muane dio mai Paran nasolan, anna rampo lako Mesir, lako Firaun, datu Mesir; nabenni misa’ banua sia napapatui tu la nakandena sia naben padang.
19Nakaturu-turuimi Firaun tu Hadad, naurunganni naben tu ipa’na napobaine, iamotu sangbainena Tahpenes, datu baine.
20Napadadiammi sangbainena Tahpenes misa’ pia muane, disanga Genubat, tu nasarak Tahpenes lan tongkonan layukna Firaun, naurunganni iatu Genubat sisola anakna Firaun lan tongkonan layukna Firaun.
21Iatonna rangimi Hadad dio Mesir, kumua iatu Daud malemo tama batu dilobang sola nene’ to dolona sia matemo tu Yoab, kamandang lompo, ma’kadami tu Hadad lako Firaun, nakua: Eloranna’male sule lako tondokku.
22Apa nakua tu Firaun lako: Apara tu mutae’i torro dio kaleku, ammu ta’pa la malera sule lako tondokmu? Mebalimi nakua: Tae’ra, apa eloran bangmo’ male.
23Napabangun polemi Puang Matua tu misa’ to umbali Salomo, iamotu Rezon, anakna Elyada, tu mallaimo dio mai puangna, dio mai Hadadezer, datu Zoba.
24Narampunmi tu tau lako kalena, anna ia umpangului to misa’ kaponan; iatonna la umpatei Daud, mallaimi lako Damsyik anna torro dio, anna angka’i tu Rezon dadi datu dio Damsyik.
25Iamo ualinna to Israel angge tuona Salomo; senga’pi to tu kakadakean napogau’ Hadad. Iatu Rezon ungkagi’gi’ to Israel sia iamo datu dio Aram.
26Iatu Yerobeam, anakna Nebat, misa’ to Efraim dio mai Zereda, anakna misa’ baine balu, disanga Zerua, taunna Salomo, umbali tu datu.
27Inde sia bannangna anna balii tu datu: Dikua umbangun Milo tu Salomo sia umpemeloi tu benteng tembo’ ro’pok dio kotana Daud, ambe’na.
28Na iatu Yerobeam misa’ to malinta’; iatonna tiromi Salomo, kumua iate pia muane iate birisan dio pa’diamanna, naangka’mi umpangului mintu’ to ma’diama dio mai pa’rapuanna Yusuf.
29Den pissan tassu’mi tu Yerobeam dio mai Yerusalem, anna sitammu nabi Ahia, to Silo, dio lalan, na iatu Ahia ma’bayu lamba’ ba’ru, na ia manna tu tau sola duai dio lu padang.
30Natoemi Ahia tu bayu lamba’ ba’ru tu napake, naserekki napa’sangpulo dua.
31Anna ma’kada lako Yerobeam nakua: Alanni kalemu te sangpulo serekna, belanna nakua kadanNa PUANG, Kapenombanna to Israel, kumua: Tonganna la Kualai tu kadatuan dio mai Salomo, angKu benko tu sangpulo suku.
32Apa iatu misa’ suku la dio kalena, belanna Daud, taungKu, sia Yerusalem, iamotu kota tu mangka Kupilei langsa’ dio mai mintu’ suku to Israel.
33Belanna natampeMo’, anna tukku menomba lako Astoret, deata baine to Sidon, sia lako Kamos, deatanna to Moab, sia lako Milkom, deatanna to Amon, sia tae’ anna lolang unturu’ lalanKu, sia tae’ napogau’ apa malolo dio pentiroKu, iamotu apa Kupondok sia Kupa’parentan, susi Daud, ambe’na.
34Apa iate kadatuan moi misa’ suku tae’ Kualai lan mai limanna, sangadinna la Kuangka’ datu angge tuona belanna Daud, taungKu, tu mangka Kupilei langsa’ sia tu mangka ungkaritutui tu apa Kupasan sia tu apa Kupondok.
35Apa la Kualai lan mai limanna anakna tu kadatuan, angKu benko tu sangpulo suku.
36Anna misa’ suku tu la Kuben anakna, kumua anna iatu Daud, taungKu, tontong unnampui misa’ palita dio oloKu lan Yerusalem, iamotu kota mangka Kupilei langsa’ la tontong Kupannii sangangKu.
37La Kuangka’ko ammu parentai tu mintu’ angge naporainna penaammu sia la undatuiko to Israel.
38Iake muperangii tu mintu’ apa Kupasan lako kalemu sia lolangko unturu’ lalanKu, sia umpogau’i tu apa malolo dio pentiroKu, iamotu ungkaritutui apa Kupondok sia apa Kupasan, susi tu napogau’ Daud, taungKu, manassa la Kurondongko sia la Kubangunangko misa’ tongkonan matontongan, susitu mangka Kubangunan Daud, sia la Kukamaseangko tu to Israel.
39Kumua anna dadi tu iannato, la Kupampa lu rokko tu bati’na Daud, apa tae’ nala tontong sae lakona.
40Undaka’mi lalan tu Salomo la umpatei Yerobeam, apa ke’de’ tu Yerobeam namallai lako Mesir, lako Sisak, datu Mesir, anna torro dio Mesir sae lako matena Salomo.
Kamateanna Salomo
41Iatu tang dipokadannapa tu mintu’ tuna’na Salomo sia mintu’ apa napogau’, sia ia duka tu kakinaanna, tae’raka nadisura’ lan sura’ tuna’na Salomo?
42Iatu Salomo umparenta to Israel dio Yerusalem, patangpulo taunna.
43Mangkato malemi tama batu dilobang sola nene’ to dolona sia dipeliang lan kotana Daud, ambe’na, na Rehabeam, anakna muane, ussondai dadi datu.
<< 1 Raja-raja 11 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel