Katipa’duanna kadatuan
1Ke’de’mi tu Rehabeam lako Sikhem, belanna sae nasangmo tu to Israel dio Sikhem la untokkoi dadi datu.
2Narangimi Yerobeam, anakna Nebat, tu iannate, tonna diopa Mesir, tu nanii mallai lako dio mai olona Salomo, pakalan sulemi dio mai Mesir.
3Disuami tu tau lao untambai lako, anna sae tu Yerobeam sola mintu’ kombongan to Israel lako Rehabeam, anna ma’kada nakua:
4Napamatana’mo ambe’mi tu pamaangki sola nasang te; totemo la mipamaringngan tu pa’diaman magasanna ambe’mi sia pamaan matana’na, tu napapassanangkan, anna kami te sola nasang mendadi taummi.
5Ma’kadami lako tau iato mai, nakua: Sule bangpokomi, duang bongipa mimane sae pole’ lako kaleku. Malemi sule tu to buda.
6Ma’kombongammi tu datu Rehabeam sola mintu’ to matua-tua, tu naala parea Salomo, ambe’na, tonna tuo siapa, sia ma’kada nakua: Umbara susitu timbangammi, la kubalianni te to buda?
7Ma’kadami tu tau iato mai lako nakua: Iake moraikomi te totemo umpopengkaola kalemi lako tu to buda sia umpasiolai tu pa’poraianna sia mibalii kada melo, manassa tontong sae lakona la dadi taummi tu tau iato mai.
8Apa natumpu tu timbangan napokada mintu’ to matua-tua lako kalena, anna male ma’kombongan sola to mangura, sangbara’na, tu naala parea.
9Nakuami lako tau iato mai: Umbara susitu timbangammi la tabalianni te to buda, tu ma’kada lako kaleku nakua: La mipamaringngan tu pamaan mangka napapassanangkan ambe’mi!
10Mebalimi tu mintu’ to mangura sangbara’na lako kalena, nakua: Susite tu la mikuanni te to buda, tu mangka ma’kada lako kalemi nakua: Napamatana’mo ambe’mi tu pamaangki, apa la mipamaringnganangkan, la mikua lako tau iato mai: Mandu kapua ia tu taruno kidi’ku anna iatu aakna ambe’ku.
11Iake susinna napamatana’i ambe’ku tu pamaammi, apa aku la kupamatanna’ pissan tu pamaammi; iake mangkakomi napa’dikki pebamba ambe’ku, apa iatu aku la umpa’dikkikomi pebamba ma’duri bassi.
12Ma’tallung alloan to saemi tu Yerobeam sola to buda umpennoloi Rehabeam, susitu napokada datu: Duang bongipa mimane sae pole’ lako kaleku.
13Mebali makarra’mi tu datu lako to buda, belanna natumpu tu pa’timbangan tu napokada to matua-tua lako kalena,
14anna ma’kada lako tau iato mai susitu pa’timbangna mintu’ to mangura, nakua: Napamatana’mo ambe’ku tu pamaammi, apa la kupamatana’ pissan tu pamaammi; iake mangkakomi napa’dikki pebamba ambe’ku, apa iatu aku la umpa’dikkikomi pebamba ma’duri bassi.
15Iamoto natang umpasiolai datu tu palakunna to buda, belanna iatu iannate panglampaknamo PUANG, la umpalanda’i tu apa mangka Napokada PUANG lako Yerobeam, anakna Nebat, nalopian Ahia, to Silo.
16Iatonna tiromi mintu’ to Israel tu diona datu tang napasiolamo tu palakunna, mebalimi lako datu nakua: Tae’mo tasangbilangan tu Daud, sia tae’mo tasangmana’ tu anakna Isai! E, to Israel, sulemokomi lako tendami! Karitutui kalenami tu tongkonammi, e Daud! Sulemi tu mintu’ to Israel lako to’ tendana.
17Apa iatu mintu’ to Israel tu torro lan mintu’ kota Yehuda, Rehabeam duka tu napodatu.
18Nasuami datu Rehabeam tu Adoram, kapala pa’diaman, apa natumbui batu mintu’ to Israel, anna mate; sidi’mora natang pakala kendek langngan kareta la mallai lako Yerusalem.
19Susimoto tu to Israel randuk memboko’ dio mai bati’na Daud sae lako allo iate.
20Iatonna pekarebami mintu’ to Israel, kumua sulemo tu Yerobeam, mesuami tu tau untambai tama kombonganna, anna tokkoi dadi datunna mintu’ to Israel. Moi misa’ tae’ unturu’ bati’na Daud, sangadinna suku Yehuda manna.
21Iatonna rampomo tu Rehabeam lako Yerusalem, naarakmi tu mintu’ bati’na Yehuda sia suku Benyamin, den saratu’ karuapulona sa’bu to mangura tu manakka parari, la urrarii to Israel, kumua anna pasulei tu kadatuan lako Rehabeam, anakna Salomo.
22Apa rampo tu kadanNa Puang Matua lako Semaya, taunNa Puang Matua, nakua:
23Pokadanni Rehabeam, anakna Salomo, datu Yehuda, sia mintu’ to Yehuda sia to Benyamin sia mintu’ to senga’, kumua:
24Inde sia tu kadanNa PUANG: Da milaoi ba’tu urrarii tu mai sangsiulurammi to Israel, sangadinna pantan la sulekomi lako to’ banuammi, belanna Aku anna dadi tu apa iate. Naturu’mi tau iato mai tu kadanNa PUANG, anna sule, susitu kadanNa PUANG.
Yerobeam umpaden kamenomban ba’ru
25Nabentengmi Yerobeam tu kota Sikhem dao buntunna Efraim, anna torro lan. Ke’de’mi anna male umbentengi tu Pnuel.
26Natangnga’mi Yerobeam lan penaanna: Umbai anna sule te kadatuan lako bati’na Daud.
27Iake la malei te to buda langngan Yerusalem umpemalaran pemala’ lan banuanNa PUANG, manassa iatu penaanna malangmo sule lako puangna, iamotu Rehabeam, datu Yehuda, anna pateina’ tau iato mai, nasule lako Rehabeam, datu Yehuda.
28Nabisarami datu tu iannato, anna garagai da’dua anak sapi bulaan, nakuami lako tau iato mai: Lendu’mo maparri’na, ke malekomi langngan Yerusalem; iamote tu deatammi, e to Israel, tu mangka ussolangkomi sun lan mai tondok Mesir.
29Misa’ napabendan dio Betel na iatu misa’ napadio Dan.
30Iate penggauran iate dipokasalan. Iatu to buda undoloanni tu misa’ anak sapi sae lako Dan.
31Sia nagaragapa tu banua pemalaran dao lu inan madao, anna angka’i dadi to minaa ba’tu pira-pirai tu tau iato mai tu tangia suku to Lewi.
32Napamanassami Yerobeam tu allo kapua lan bulan ma’pengkarua, allo ma’pessangpulo limanna bulan iato, susitu allo kapua dio Yehuda, anna kendek langngan inan pemalaran iato. Susimoto napogau’ dio Betel anna pemalaranni tu pemala’ lako anak sapi nagaragai. Na iatu to minaa tu biasa memala’ dao inan madao, tu mangka naangka’, ba’tu pempiran-piranmo nasua memala’ dio Betel.
TaunNa Puang Matua dio mai Yehuda
33Attu iato kendekmi langngan inan pemalaran, tu nagaragai dio Betel, tonna allo ma’pessangpulo limanna bulan ma’pengkaruanna, iamotu misa’ bulan napamanassa kalena lan penaanna, tu nanii umpokadanni allo kapua tu to Israel. Tonna attu iato kendekmi langngan inan pemalaran la untunu pemala’.
<< 1 Raja-raja 12 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel