Alkitab Mobile SABDA
[VER] : [TORAJA]     [PL]  [PB] 
 <<  1 Raja-raja 15 >> 

Diona Abiam, datu to Yehuda

1Iatonna ma’sangpulo karuamo taunna datu tu Yerobeam, anakna Nebat, dadimi datu tu Abiam umparenta to Yehuda.

2Tallung taun ma’parenta dio Yerusalem; na iatu indo’na disanga Maakha, anakna Abisalom.

3Naturu’ bang tu mintu’ kasalanna ambe’na, tu napogau’ ambe’na dolona, sia iatu penaanna tang lantuk langngan PUANG Kapenombanna, susi kalantukanna penaanna Daud, nene’ to dolona.

4Apa bannang dio Daud, anNa kamasei PUANG, Kapenombanna, misa’ palita lan Yerusalem, belanna Napabangun tu anakna ussondai sia Napabantang tu Yerusalem.

5Belanna napogau’mo Daud tu apa malolo dio pentiroNa PUANG sia tae’ anna sepang dio mai mintu’ apa Napasananni angge tuona, sangadinna ia manna tu penggauranna lako Uria to Het.

6Tontong bang tu kasirarianna Rehabeam na Yerobeam lan mintu’ allo katuoanna.

7Iatu tang dipokadannapa tu mintu’ tuna’na Abiam, sia mintu’ apa napogau’, tang tisura’moraka lan sura’ ossoranna mintu’ datu to Yehuda? Sia den bang tu kasirarianna Abiam na Yerobeam.

8Mangkato malemi tama batu dilobang tu Abiam sola nene’ to dolona, anna dipeliang lan kotana Daud, na Asa, anakna muane, ussondai dadi datu.

Diona Asa, datu to Yehuda

9Iatonna ma’duangpulomo taunna tu Yerobeam umparenta to Israel, dadimi datu tu Asa umparenta to Yehuda.

10Patangpulo mmisa taunna ma’parenta dio Yerusalem; iatu indo’na disanga Maakha, anakna Abisalom.

11Iatu Asa umpogau’ apa malolo dio pentiroNa PUANG, susi Daud nene’na.

12Naula’i lan mai tondok tu mai to ma’gau’ sala dio to’ dipa’deatainna sia napembuangan tu mintu’ rapang-rapang dipodeata nagaragai nene’ to dolona.

13Moi na iatu Maakha, indo’na, natassu’i dadi datu baine, belanna unggaragai rapang-rapang megallian, iamotu Asyera. Nata’tak-ta’tak Asa tu rapang-rapang megallian iato sia naballa diong lombok Kidron.

14Apa iatu inan madao tu dinii memala’ tae’ nadiratoi. Moi susito iatu penaanna Asa lantuk lako PUANG lan mintu’ allo katuoanna.

15Nabaami tama banuanNa PUANG tu mintu’ apa napamarimbangan ambe’na lako Puang sia mintu’ apa tu ia kalena umpamarimbanganni lako Puang, iamotu salaka, bulaan sia ma’rupa-rupa pareanan.

16Tontong bang tu kasirarianna Asa na Baesa, datu to Israel, temponna ma’parenta.

17Iatu Baesa, datu to Israel, ke’de’ ullaoi to Yehuda, anna bentengi tu Rama, la unnampangi lalan, kumua da naden misa’ tau tassu’ sia tama umpennoloi Asa, datu to Yehuda.

18Attu iato naala nasangmi Asa tu mai salaka sia bulaan tu tinampena siapa lan bilik pangnannanna banuanNa PUANG sia iatu lan bilik pangnannanna banuanna datu, anna sorongi lako to mase’ponna, nasuai datu Asa lao umbaai lako Benhadad, anakna muane Tabrimon, anakna muane Hezion, datu to Aram, dio Damsyik, nakua:

19Den tu basse lan alla’ta, lan alla’na ambe’ku sia ambe’mi. Iate pamengan kupa’pea lako kalemi iamotu salaka sola bulaan. Ammi pokai tu bassemi sola Baesa, datu to Israel, kumua anna soro’ dio mai kaleku.

20Napasiolami Benhadad tu kadanna datu Asa, anna suai tu pangulu rarinna ullaoi tu mai kota to Israel, natalomi tu kota Iyon sia Dan sia Abel-Bet-Maakha sia lili’na Kinerot sia mintu’ lili’na tondok Naftali.

21Iatonna rangimi Baesa tu iannato, nasoroi’mi umbenteng Rama, anna sule lako Tirza.

22Napesuammi datu Asa unnarak mintu’ to Yehuda, moi misa’ tae’ tau torro; iatu batu sia kayu napake Baesa umbenteng Rama, nabaa nasang tau iato, na apa iamoto tu napake datu Asa umbenteng Geba lan lili’na Benyamin sia Mizpa.

23Iatu tang dipokadannapa tu mintu’ tuna’na Asa, sia mintu’ kalalonganna sia mintu’ apa napogau’, sia mintu’ tondok nabenteng, tang tisura’moraka lan sura ossoranna mintu’ datu Yehuda? Iatonna matuamo, kambang patomalimi tu lentekna.

24Mangkato malemi tama batu dilobang tu Asa sola nene’ to dolona, anna dipeliang lan kotana Daud, nene’ to dolona, lan liangna nene’ to dolona. Na Yosafat, anakna muane, ussondai dadi datu.

Diona Nadab, datu to Israel

25Iatu Nadab, anakna muane Yerobeam, dadi datu umparenta to Israel tonna taun ma’penduan kadatuanna Asa umparenta to Yehuda; umparentami to Israel duang taun.

26Napogau’mi tu apa kadake dio pentiroNa PUANG. Urrundu’ bate lalanna ambe’na sia unturu’ tu kasalan napa’pesuan ambe’na lako to Israel umpogau’i.

27Iatu Baesa, anakna Ahia, dio mai rapu Isakhar, umpaden kasiturusan la unneai. Napatei Baesa dio Gibeton, lili’ to Filistin, tonna patama limbui Nadab sola mintu’ to Israel tu Gibeton.

28Napatei Baesa tonna taun ma’pentallunna tu Asa umparenta to Yehuda, anna ia dadi datu ussondai.

29Iatonna mane mangka ma’parenta, napateimi tu mintu’ bati’na Yerobeam; tae’ nasesai tu kepenaanna dio lu Yerobeam, namangsanni nasang, susitu kada Napokada PUANG nalopian taunNa, iamotu Ahia, to Silo,

30buntu tumangna mintu’ kasalan napogau’ kalena Yerobeam, sia kasalan napa’pesuan lako to Israel umpogau’i sia mintu’ penggauranna tu umpa’dikki penaanNa PUANG, Kapenombanna to Israel.

31Iatu tang dipokadanna tu mintu’ tuna’na Nadab, sia mintu’ apa napogau’, tang tisura’moraka lan sura’ ossoranna datu Israel?

32Tontong bang tu kasirarianna Asa na Baesa, datu to Israel, temponna ma’parenta.

Diona Baesa, datu to Israel

33Iatonna taun ma’pentallunna Asa umparenta to Yehuda, dadi datumi tu Baesa, anakna muane Ahia, umparenta mintu’ to Israel duang pulo nna’pa’ taunna dio Tirza.

34Napogau’mi tu apa kadake dio pentiroNa PUANG. Urrundu’ bate lalanna Yerobeam sia unturu’ kasalan napa’pesuan lako to Israel umpogau’i.



 <<  1 Raja-raja 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran