Elia torro dio randan salu Kerit
1Attu iato ma’kadami tu Elia, to Tisbe, dio mai Tisbe, lili’na Gilead, lako Ahab, nakua: La lelukraka tuoNa PUANG, Kapenombanna to Israel, tu kupengkaolai: manassa tae’ nala den damo’ sia tae’ nala sae uran lan te ba’tu pirang-pirang taun, ke tae’i angku pokadai.
2Mangkato rampomi tu kadanNa PUANG lako, nakua:
3Ke’de’ko inde te ammu ma’palulako matallo, ammu membuni dio randan salu Kerit, tu ma’minanga tama Yordan.
4Ia bang la muiru’ tu uai salu iato sia Kusuamo tu kaduaya la umbenko kande.
5Ke’de’mi anna pogau’i susitu kadanNa PUANG; malemi anna torro dio randan salu Kerit, tu ma’minanga tama Yordan.
6Saemi kaduaya umbanni roti sia duku’ ke melambi’, susi dukato nabaan roti sia duku’, ke makaroen, anna uai salu nairu’.
Iatu Elia napakande baine balu to Sarfat
7Ba’tu sangapa-apa masainna to marangkemi tu salu, belanna tae’ uran sae lan tondok iato.
8Rampomi tu kadanNa PUANG lako kalena nakua:
9Ke’de’ko mumale lako Sarfat, lili’na Sidon, ammu torro dio; den sia dio tu baine balu mangkamo Kusua la umparakaiko.
10Ke’de’mi tu Elia anna male lako Sarfat. Iatonna lambi’mi tu babangan kota, denmi dio tu misa’ baine balu marassan urruruk kayu; metambami tu Elia lako nakua: Alanna’ uai sidi’ lan mai busso, angku iru’i.
11Iatonna malemo unnalanni, metamba pole’omi nakua: Ban dukana’ roti sangsasa’.
12Mebalimi nakua: La lelukraka tuoNa PUANG, Kapenombammi, moi misa’ pa’ranggina tae’mo torro, sangadinna ta’pung manna sangsomba lan kurin sia minna’ sidi’ lan tonde. Urrurukmo’ kayu inde sidi’; la malemo’ lako banua umposarasan kaleku sola anakku muane; iake purami kikande to, la matemokan.
13Apa nakua tu Elia lako: Da mimataku’, malemokomi lako banua, posara’mi susitu mipokada, apa posarasanna’ dolo misa’ bitti’, mibaanna’ mai; mimaneo umposarasanni tu kalemi sola anakmi.
14Belanna inde sia tu kadanNa PUANG, Kapenombanna to Israel: Iatu ta’pung lan kurin tae’ nala pura sia iatu minna’ lan tonde tae’ nala tappu sae lako allo Nanii PUANG umpasae uran dao kuli’na padang.
15Malemi anna pogau’i susitu kadanna Elia; anna kumande la baine iato la Elia la to lan banuanna.
16Iatu ta’pung lan kurin tae’ anna pura sia iatu minna’ lan tonde tae’ anna tappu, susitu kadanNa PUANG tu mangka Napokada nalopian Elia.
17Undinnato masakimi tu anakna te baine ampu banua iato, mandarra’ tongan, naurungan tae’ bangmo penaa lan.
18Ma’kadami lako Elia nakua: Umbamora la mipakuanna’, e taunNa Puang Matua? Rampokomi inde te banuangku la ma’pakilala diona salaku na kamumora napobannang anna mate tu anakku.
19Nakuami tu Elia lako: Baanna’ mai tu anakmi. Naalami diong mai rianna, nasolanni langngan bilik mengkadoan, tu nanii torro, anna pamamma’i dao inan mamma’na.
20Metambami langngan PUANG, nakua: O PUANG, Kapenombangku! Miparampoiori kamandasan te baine balu tu kunii rampo mempue, ammi patei tu anakna?
21Umballa’mi kalena pentallun dao pia iato, anna metamba langngan PUANG, nakua: O PUANG, Kapenombangku! pasulemi tama tu penaanna te pia.
22Natanannimi talinga PUANG tu gamaranna Elia, nasule tama tu penaanna tinde pia, anna tuo sule.
23Naalami Elia tinde pia, anna solanni dao mai bilik mengkadaoan rokko banua, anna benni indo’na, nakuami Elia: Tiromi, iate anakmi tuo sia.
24Nakuami tinde baine lako Elia: Totemo kuissan tonganmo, kumua taunNakomi Puang Matua, na iatu kadanNa PUANG dio randan pudukmi manappa’.
<< 1 Raja-raja 17 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel