Alkitab Mobile SABDA
[VER] : [TORAJA]     [PL]  [PB] 
 <<  1 Raja-raja 21 >> 

Diona pa’lak anggoro’na Nabot

1Iatonna mangkamo tu mintu’nato dadimi susite. Iatu Nabot, to Yizreel unnampui misa’ pa’lak anggoro’ dio Yizreel sikadappi’ tongkonan layukna Ahab, datu Samaria.

2Ma’kadami tu Ahab lako Nabot nakua: Benna’ tu pa’lak anggoro’mu, angku nii untanan utan, belanna iatu pa’lak iato siamping banuangku; la kuben siako misa’ pa’lak anggoro’ sondana melo ia na iate; ba’tu iake musangai melo la kubaya’ doi’ lako kalemu tu allinna.

3Apa ma’kada tu Nabot lako Ahab, nakua: Napatoyangmira PUANG dio mai kaleku la ussorongi mati’ kalemi tu mana’ nene’ to doloku.

4Sulemi tu Ahab tama banuanna kumamu’dang sia sengke diona tu kada mangka napokada Nabot to Yizreel lako kalena, susite nakua: tae’ kula ussorongi lako kalemi tu mana’ nene’ to doloku. Umbambangammi kalena dao katindoanna, anna memboko’ bang sia manoka kumande.

5Attu iato saemi tu Izebel bainena lako kalena, anna ma’kada nakua: Ma’apari ammi kumamu’dang bangra sia manoka kumande?

6Mebalimi lako nakua: Dikua mangkamo’ sipa’kada-kada Nabot, to Yizreel sia kukua lako: Benna’ tu pa’lak anggoro’mu, kubaya’ doi’i tu allinna, ba’tu iake musangai melo, la kubenko misa’ pa’lak anggoro’ sondana. Apa mebali nakua: Tae’ kula ussorongi lako kalemi tu pa’lak anggoro’ku.

7Ma’kadami tu Izebel bainena lako, nakua: Kamu tu datu umparenta to Israel totemo! Millikkomi ammi kumande, pamatanai tu penaammi; aku la umbenkomi tu pa’lak anggoro’na Nabot, to Yizreel.

8Naoki’mi Izebel tu ba’tu pira-pira sura’ tete dio sanganna Ahab, anna ca’i peca’na Ahab, anna pa’peai tu sura’ iato lako mintu’ pekaamberan sia to kapua lan lu kotana, tu sangtondok Nabot.

9Inde sia tu kada lan sura’ iato, nakua: Metambakomi, anna ma’puasa mintu’ tau, ammi paunnisungi tu Nabot dao inan mala’bi’na dio olona to buda.

10Ammi paunno’ko’ da’dua to bulituk untingoi, la ussa’bii kumua: Umpa’kada solangi Puang Matua sia datu. Solanni lako salian kota, ammi tumbui batu samatena.

11Napogau’mi sangtondokna, iamotu pekaamberan sia to kapua, tu torro lan kotana, susitu napesuanna Izebel lako, susitu disa’bu’ lan sura’ dipa’pea lako tau iato mai.

12Metambami anna ma’puasa mintu’ tau, anna paunnisungi tu Nabot dao inan mala’bi’na dio olona to buda.

13Attu iato saemi tu tau da’dua, iamotu to bulituk, unno’ko’ untingoi, anna sa’bii te to bulituk sola duai tu Nabot dio olona to buda, nakua: Ia tinde Nabot umpa’kada solangi Puang Matua sia datu. Nasolammi tau iato mai lako salian kota, anna tumbui batu samatena.

14Mangkato mesuami tu tau iato mai umpokadanni Izebel, kumua mangkamo tu Nabot ditumbui batu anna mate.

15Iatonna rangimi Izebel kumua matemo tu Nabot ditumbui batu, ma’kadami tu Izebel lako Ahab, nakua: Millikmokomi, alami mipoapai tu pa’lak anggoro’na Nabot, to Yizreel, iamotu pa’lak manoka umbenkomi dialli doi’, belanna iatu Nabot tae’mo natuo, sangadinna matemo.

16Iatonna rangimi Ahab, kumua matemo tu Nabot, millikmi tu Ahab, anna male lako pa’lak anggoro’na Nabot, to Yizreel, la unnalai napoapa.

17Attu iato saemi tu kadanNa PUANG lako Elia, to Tisbe, nakua:

18Ke’de’ko mumale lako sitammu Ahab, datu to Israel, tu torro dio Samaria; lanmo pa’lak anggoro’na Nabot, tu nanii male lako unnalai la napoapa.

19Ammu ma’kada lako kumua: Inde sia tu kadanNa PUANG: Mangkamorokoka papatean sia unnala duka mana’na tau? Sia la mukua duka lako kumua: Inde sia tu kadanNa PUANG: Iatu inan nanii asu mangka ullepa’i rarana Nabot, dio duka inan iato la nanii asu ullepa’i tu raramu.

20Nakuami Ahab lako Elia: Mukabu’tuimora’ka, e ualingku? Nakuami tu Elia: Tonganna kukabu’tuimokomi, belanna umbalukmokomi kalemi umpogau’ apa kadake dio pentiroNa PUANG.

21Nakua kadanNa Puang: Manassa la Kuparampoiko kamandasan, sia la Kuputtaiko sia iatu muane, bati’na Ahab la Kumangsanni la to mala’bi’na la to bitti’na dio lu to Israel.

22Sia iatu bati’mu la Kupasusi bati’na Yerobeam, anakna Nebat, sia Kupasusi bati’na Baesa, anakna Ahia, belanna mupabu’tu tu pa’dik penaa, napobannang to Israel umpogau’ kasalan.

23Sia ia duka tu diona Izebel nakua kadanNa PUANG: La nakande asu tu Izebel dio to’ benteng tembo’ salianna Yizreel.

24Minda-minda tu bati’na Ahab lan lu kota la nakande asu, na minda-minda tu mate dio lu padang, la nakande manuk-manuk dao lu langi’.

25Inang tae’ lenpa tau susi Ahab umbaluk kalena la umpogau’ kadake dio pentiroNa PUANG, belanna nasede Izebel, bainena.

26Iatu gau’na megallian liu, belanna mengkaola lako deata, lan mintu’na tu napogau’ to Amori, tu Naula’i PUANG dio mai olona to Israel.

27Iatonna rangimi Ahab tu mintu’ kada iate, nase’bu-se’bumi tu tamangkalena, anna potamangkale karoro’, sia ma’puasa; ondongpi umbambangan kalena mennammu’ karoro’ sia napela’-pela’ lumingka.

28Attu iato saemi tu kadanNa PUANG lako Elia, to Tisbe, nakua:

29Mutiromoraka, kumua iatu Ahab umpamadiongan kalena dio oloKu? Belanna umpamadiongammo kalena dio oloKu, iamoto natae’ angKu la umparampoi kamandasan ke tuopi, sangadinna angge tuonapi anakna muane, Kumane umparampoi kamandasan tu bati’na.



 <<  1 Raja-raja 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran