Ma’penduanna PUANG ombo’ lako Salomo
1Iatonna mangkamo tu Salomo umbangun banuanNa PUANG sia tongkonan layukna datu sia mintu’ tu nasanganna Salomo la nagaraga,
2ta’kala ombo’mi tonna ma’penduanna tu PUANG lako Salomo, susito dolona ombo’ lako kalena dio Gibeon.
3Ma’kadami tu PUANG lako Nakua: Kurangimo tu passambayangmu sia pengkamoyamu tu mangka mupennoloan dio oloKu, sia Kupamarimbanganmo te banua mangka mubangun, belanna Kupalanmo tu sangangKu tontong sae lakona; sia iatu matangKu sia penaangKu la dio bang kiallo-kiallo.
4Iake lolangko dio oloKu, susi Daud, ambe’mu lantuk sia bulo lollong penaanna lolang dio oloKu, ammu pogau’i tu mintu’ apa Kupepasanan lako kalemu sia ungkaritutui tu mintu’ apa Kupondok sia tu Kupa’parentan,
5manassa la Kupabantang tu isungan kadatuammu umparenta to Israel tontong sae lakona, susitu kadangKu lako Daud, ambe’mu, kumua: tae’ len nala ka’tu dio mai kalemu tu misa’ tau tu la unnisung dao kapayunganna Israel.
6Apa iatu kamu sola anakmi muane, ke toyangkomi dio mai Kaleku sia tae’ mituru’Na’, sia tae’ mikaritutui tu pepasanKu sia tu apa Kupondok, tu Kupatuduangkomi, sangadinna malekomi umpengkaolai sia tukku umpenombai tu kapenomban senga’,
7manassa la Kuurakki tu to Israel dio mai tu padang Kukamaseanni, sia iate banua mangka Kupamarimbanganan sangangKu, la Kutumpu dio mai oloKu, naurunganni iatu to Israel la dipoparumbasan sia la dadi misa’ kaditellean dio lu mintu’ bangsa.
8Iate banua iate la daun lauan minda-minda tu ullendu’i, la magiang sia natelle-telle, anna ma’kada nakua: Ma’apai, anNa pasusii PUANG to te tondok sia banua iate?
9La napebalii tau nakua: Belanna tau iato mai untampemo PUANG, Kapenombanna, tu mangka ussolan nene’ to dolona tassu’ lan mai tondok Mesir anna la’ka’ lakomo kapenomban senga’ tu penaanna, sia tukkumo umpenombai sia umpengkaolai, iamoto Naparampoi PUANG lako kalena te mintu’ kasanggangan iate.
Diona ma’rupa-rupa pa’pabendanna Salomo
10Iatonna ganna’mo duangpulo taunna, tepumi tu banua da’dua nabangun Salomo, iamotu banuanNa PUANG sia banuanna datu.
11Iatu Salomo natundui Hiram, datu Tirus, diona tu kayu arasi’ sia sendana sia bulaan pada tu naporainna. Attu iato nabenmi datu Salomo duangpulo kota dio tondok Galilea tu Hiram.
12Apa iatonna tassu’ tu Hiram dio mai Tirus la untiroi tu mintu’ kota, nabenni Salomo, tae’mi naalai penaanna.
13Anna ma’kada nakua: Kota apa toda ia te mubenna’, e siulu’ku? Nasangaimi tau tondok Kabul sae lako te allo iate.
14Iatu bulaan napa’pea Hiram lako datu Salomo, den saratu’ duangpulo talenta.
15Iamote tu bannangna naarakki datu Salomo tu tau la umbangunni tu banuanNa PUANG sia banua kalena, Milo, benteng tembo’ Yerusalem, Hazor, Megido na Gezer.
16Belanna ke’de’mo tu Firaun, datu Mesir untaloi tu Gezer sia nasumpun, sia napatei tu mintu’ to Kanaan torro lan kota iato, anna benni anakna, bainena Salomo, tu kota iato la napa’pabalian lan kasibalianna.
17Napamatoto’mi Salomo tu Gezer sia Bet-Horon Hilir diongna lu,
18sia Baalat na Tamar dio padang pangallaran (lan padang iato);
19sia mintu’ kota pangnannan kande tu naampui Salomo, sia mintu’ kota dipannii kareta sia mintu’ kota dipannii pakkanarang sia mintu’ tu apa nasanga la nabangun Salomo lan Yerusalem sia dao Libanon sia lan mintu’ lili’ parentana.
20Mintu’ tu to Amori torronapa sia to Het sia to Feris sia to Hewi sia to Yebus, tu tangia bati’ to Israel,
21iamotu mintu’ bati’na tu torrona siapa undinna lan tondok iato, tu tang nabelanna to Israel urroto’i, naarak nasang Salomo napopa’diama lompo sae lako allo iate.
22Apa iatu to Israel moi misa’ tae’ naa’ga kaunanni Salomo, sangadinna napotoparari, sia napotomase’ponna, sia napoarungna, sia napopangulu sia napopangulu karetana sia pakkanarangna.
23Inde sia tu bilanganna mintu’ mantari’ lompo pa’diamanna Salomo, limaratu’ llimangpulo, tu umpangului to buda undiamai tu pa’diaman iato.
24Mane tassu’ tu anakna baine Firaun lan mai kotana Daud lako banua kalena tu nagaraganni Salomo, nata’pa umbangunni tu Milo.
25Sia iatu Salomo pentallun umpemalaran pemala’ ditunu pu’pu’ sia pemala’ kasalamaran lan sangtaun dao inan pemalaran nagaragan PUANG, sia umballa pemala’ ditunu dio oloNa PUANG, kumua anna kabangnga’ tonganni tu banua iato.
Salomo umpopegaraga lembang la massombaran
26Nagaraga dukami datu Salomo tu ba’tu pira-pira lembang dio Ezion-Geber sikandappi’ Elot, dio biring tasik Teberau, lan lili’na tondok Edom.
27Nasuami Hiram tu taunna, iamotu pallopi, tu matarru’mo lan tasik male massombaran sola taunna Salomo.
28Rampomi lako Ofir, anna alai inde to dio mai tu bulaan a’pa’ ratu’ nduangpulo talenta, anna baai lako datu Salomo.
<< 1 Raja-raja 9 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel