1(24-2) Iatonna sulemo tu Saul unnula’ to Filistin, napokadami tau lako, nakua: Iatu Daud lan sia padang pangallaran En-Gedi.
2(24-3) Nasolammi Saul tallungsa’bu tu to ditonno’ dio mai mintu’ to Israel, anna male undaka’ Daud sola mintu’ taunna sikandappi’ buntu batu Bembe’ lampung.
3(24-4) Rampomi lako barung domba dio lu biring lalan. Denmi inde to dio tu misa’ lo’ko’; anna tama tu Saul la ma’to’kayu. Iatu Daud sola mintu’ taunna unno’ko’ lan lo’ko’ iato dio inan ringki’na lan.
4(24-5) Nakuami tu taunna Daud lako Daud: Allo iamote tu mangka Napokada PUANG lako kalemi, kumua: La Kusorong tu ualimmu, tama limammu ammu pogau’i situru’ lalan penaammu. Ke’de’mi tu Daud anna pela’-pela’i usse’pa’i tu biring bayu lamba’na Saul.
5(24-6) Apa iatonna mangkato, inang ma’rundede duka tu penaanna Daud, belanna mangkamo nase’pa’i tu biring bayu lamba’na Saul.
6(24-7) Ma’kadami lako taunna nakua: Napatoyangna’ PUANG dio mai umpogau’i tu apa susite lako datungku tu mangka Natokko PUANG, iamo tu la umpata’pa limangku lako, belanna iamo to Natokko PUANG.
7(24-8) Tete dio kada iate nadampai Daud tu mintu’ taunna sia tae’ naeloranni tu tau iato mai la umpogau’ kadake lako Saul. Ke’de’mi tu Saul lan mai lo’ko’ iato, anna male.
8(24-9) Mangkato ke’de’omi tu Daud nasun lan mai lo’ko’; metambami dio mai boko’na Saul, nakua: O puangku, o datungku! Messailemi tu Saul; menombami tu Daud anna tukku sae rokko padang.
9(24-10) Ma’kadami Daud lako Saul, nakua: Ma’apai anna perangii puangku tu kadanna tau, kumua: Nadakaran Daud tu la naposanggangna puangku.
10(24-11) Tonganna allo ia dukamote anna matammi kalena untiroi, kumua Nasorong PUANG te allo totemo tu puangku tama limangku lan lo’ko’ iate sia nakuammo’ tau la umpatei puang, apa kukanana’i tu puangku, sia kukua: Ma’apai kula umpata’pai lima tu datu, belanna iamo to Natokko PUANG.
11(24-12) Tiromi, o ambe’ku, tiromi tu biring bayu lamba’mi lan limangku! Iatongku se’pa’i tu biring bayu lamba’mi, tae’ kupateikomi, iamoto minii untiroi sia unnissanni, kumua tae’ kutangnga’ kadake sia kelok sia tae’ duka kusala lako puangku; apa undaka’komi lalan la ungka’tu sunga’ku.
12(24-13) Na PUANGmora umpaolai salu tu aku na kamu sia na PUANG dukamora umpakkanni tu a’gangku lako kalemi, apa tae’ kula umpata’paikomi lima.
13(24-14) Susi pa’kadanan to dolo-dolo: Dio mai tu to kadake nanii bu’tu tu kadake; apa tae’ kula umpata’pai lima puangku.
14(24-15) Mindara tu nalaoi datu to Israel? Mindara tu naula’ puangku? Misa’ asu mate sia misa’ talla!
15(24-16) Iamoto na PUANGmora tu to ma’paolai salu, tu umpaolaiki’ salu aku na kamu; Iamo la untiroi sia la urra’ta’ kara-karaku sia la ussanda tongannina’.
16(24-17) Iatonna mangkamo Daud umpokadai te mintu’ kada iate lako Saul, ma’kadami Saul nakua: Gamarammurakate, e Daud, anakku? Unnangle-anglemi tumangi’ tu Saul,
17(24-18) sia ma’kada lako Daud, nakua: Tonganko iko na aku, belanna umpogau’ko melo lako kaleku, apa aku umpogau’na’ kadake lako kalemu.
18(24-19) Allo ia dukate munii umpa’pekitananni, kumua melo tongan tu mupogau’ lako kaleku, belanna Nasorongmo’ PUANG tama limammu, apa tae’ sia mupateina’.
19(24-20) Iake den tau unnappa’ ualinna ma’apaopira anna la urrampanan mana’pai male? Iamoto Napakkannimira kameloan PUANG tu apa mupogau’ lako kaleku allo iate.
20(24-21) Tonganna kuissanmo kumua inang la dadiko datu undinna sia iatu kadatuan lako to Israel la manda’ mutoe.
21(24-22) Iamoto palaoko sumpa lako kaleku totemo tete dio sanganNa PUANG, kumua tae’ mula ussabu’i tu bati’ku sia tae’ mula umpa’dei tu sangangku dio mai sangdadiangku.
22(24-23) Umpalaomi sumpa Daud lako Saul. Anna sule tu Saul lako banuanna, apa iatu Daud sola mintu’ taunna kendek langngan tambakuku.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel