Nakabudai to Israel la naparenta datu
1Iatonna matuamo tu Samuel, naangka’mi tu anakna muane da’dua la dadi to parengnge’na to Israel.
2Iatu anak pa’bunga’na disanga Yoël na iatu ma’penduanna disanga Abia, ullembangan toean to parengnge’ sola duai dio Bersyeba.
3Apa iatu anakna tae’ naturu’ bate lalanna ambe’na, sangadinna ungkabudai kamanengkengan, ungkande pappe’ sia ulleko’ katonganan.
4Iamoto anna sirampun tu mintu’ pekaamberan to Israel, anna male nasang mennolo lako Samuel dio Rama.
5Anna ma’kada lako nakua: Matuamokomi sia iatu anakmi tae’ naturu’ bate lalanmi, iamoto la miangkarangkan misa’ datu, anna rengnge’kan susi ada’na bangsa senga’.
6Kadakemi nasa’ding Samuel te kada iate, tonna kuai tu tau iato mai: Benkanni misa’ datu la urrengnge’kanni. Massambayangmi tu Samuel lako PUANG.
7Ma’kadami tu PUANG lako Samuel Nakua: Tarimai tu apa napalaku te bangsa iate lako kalemu, belanna tae’ na iko tu natumpu, sangadinna Aku, kumua da’mo angKu datui.
8Susitu mintu’ penggauranna tau iato mai randuk dio mai allo Kunii ussolanni tassu’ lan mai tondok Mesir sae lako allo iate, iamotu naboko’iNa’ anna turu’ kapenomban senga’, susi dukamo penggauranna tau iato mai lako kalemu.
9Totemo tarimai tu palakunna, apa pakainga’ tonganni tu tau iato mai sia pokadanni tu ada’ datu, tu la umparentai.
10Naparampomi Samuel tu mintu’ kadanNa PUANG lako tau iato mai, tu umpalaku misa’ datu lako kalena,
11sia nakua: La susite tu ada’na datu la umparentakomi; la naala tu mai anakmi muane napotomengkarangi dio to’ karetana sia napotomangkambi’ darang, sia to napopa’dondo-dondo dolo dio tingayo karetana.
12Sia la napopendadi kamandang lako sangsa’bu tau sia kamandang lako limangpulo tau sia la untengkoanni pa’lakna sia la umpegandunganni dio lu bela’na sia la unggaragai pa’bunona sia mintu’ parea karetana.
13Iatu anakmi baine la naala, napotomanggaraga minna’ busarungngu’ sia to ma’nasu sia to ma’deppa.
14Sia mintu’ bela’mi sia mintu’ pa’lak anggoro’mi sia mintu’ pa’lak saitunmi tu mandunna melo la naala, nabenni taunna.
15Sia dio mai mintu’ bura padangmi sia mintu’ bua anggoro’mi la naala taa sangpulona, la naben mintu’ to mase’ponna sia mintu’ taunna.
16Ondong pissanpi iatu mintu’ kaunanmi muane sia mintu’ kaunanmi baine sia to mangurammi tu mandunna melo sia ia duka tu keledaimmi la naala, la napake lako pengkaranganna.
17Sia dio mai mintu’ dombami sia bembe’mi la naala taa sangpulona sia la napokaunankomi sola nasang.
18Tonganna allo ia dukato, ammi la melallak sia sumarro diona datummi tu mipilei, apa tae’ duka anNa la umperangiikomi PUANG to allo iato.
19Apa manoka tu tau umperangii tu kadanna Samuel, sangadinna nakua: Moi umba nakua, inang la den tu datungki.
20Iake susimito, la padamokan tu bangsa senga’; la narengnge’kan tu datungki, la nadoloangkan sia la napana’ta’ tu mintu’ raringki.
21Iatonna rangimi Samuel tu kadanna tau iato mai napalanda’mi lako PUANG.
22Ma’kadami PUANG lako Samuel: Turu’i tu kadanna sia tokkoanni misa’ datu. Mangkato nakuami Samuel lako mintu’ to Israel: Pada sulemokomi lako kotami.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel