Pangallu’Na Puang Matua, kumua Salomo la umpabendanni tu Banua Kabusungan
1Iatonna unnisung tu Daud lan tongkonan layukna, ma’kadami lako nabi Natan nakua: Aku te unnisungmo’ lan tongkonan layuk kayu arasi’ na iatu patti basseNa PUANG torro lan tenda dikulambu.
2Ma’kadami Natan lako Daud nakua: Melo ke mipalaloi tu mintu’ pa’inaammi, belanna Narondongkomi Puang Matua.
3Apa bongi ia dukato sae tu kadanNa Puang Matua lako Natan Nakua:
4Malemoko, pokadanni taungKu Daud kumua: Inde sia tu kadanNa PUANG: Tae’ na iko tu la umpabendananNa’ misa’ banua la Kunii unnisung,
5belanna randuk dio mai allo Kusolanna tu to Israel tassu’ lan mai tondok Masir sae lako allo iate, tae’pa Kutorroi len banua, sangadinna torro bangna’ lan tenda sia kema.
6IatongKu tipalele-lele dio lu mintu’ tondok Israel, denmoraka Kuma’kada sangbuku kada lako misa’i tu to parengnge’na to Israel, tu Kusua umpetayanni taungKu to Israel, kumua: Ma’apai ammi tang umpabendananNa’ misa’ banua kayu arasi’?
7Iamoto susite tu la mupokada lako taungKu Daud, kumua: Inde sia tu kadanNa PUANGna mintu’ ma’dandan maritik, kumua: Kupalelemoko dio mai to’ kariuanna, dio mai to’ domba, la dadi arungna mintu’ taungKu, to Israel.
8Kurondongmoko umba-umba muola sia Kusabu’imo tu mintu’ ualimmu dio tingayomu. Sia la Kupatarompo’ tu sangammu susi sanganna to tarompo’ lan lino.
9Sia la Kupamanassan misa’ inan tu taungKu, to Israel angKu pamari’pii ma’tondok inde to dio, kumua namanassa tu naninna siamo torro, da nadipatiramban lu lako lu dio mai, sia da duka napa’dikki to ma’pakario-rio, susi tonna dolona,
10randuk dio mai allo Kunii untappui tu to parengnge’ umparenta taungKu, to Israel. Kupalumbang baka direngnge’ tu mintu’ ualimmu. Sia Kupokadan dukako, kumua PUANG la umbangunangko misa’ banua.
11Iake upu’mi tu allomu, ammu sanginanmo nene’ to dolomu, Aku la umpatulangdanni tu bati’mu la ussondako, sala umbanna tu anakmu muane misa’, sia Aku la umpabantangi tu kadatuanna.
12Iamo la umpabendananNa’ misa’ banua na Akumo la umpabantangi tu isungan kapayunganna tontong sae lakona.
13Akumo tu la napoambe’ na iamo la Kupoanak; iatu KamasokanangKu tae’ angKu la umpasorong boko’i dio mai kalena, susitu mangkamo Kupasorong boko’ dio mai tu to musonda.
14La Kupabantang tontong sae lakona lan banuangKu sia lan kadatuangKu, na iatu isungan kapayunganna la bantang sae lakona.
15Susitu mintu’ kada iate sia susitu mintu’ dipaombo’na, susi dukamoto tu napokada Natan lako Daud.
Pa’kurre sumanga’na Daud
16Attu iato malemi tama tu datu Daud, anna unno’ko’ umpennoloi PUANG, anna ma’kada nakua: O PUANG Kapenomban, mindara te taumMi sia mindara tu to lan banuangku, amMi baara’ sae indete?
17Na iatu iannate bitti’pa dio pentiroMi, o Puang Matua; iamoto Mimangka unnalluranni bati’na taumMi tu diona apa la dadi te attu la sae, sia Mitiromo’ misa’ garonto’ nanii mentaruk tau tu la sakendek-kendekna kamala’biranna, o PUANG Kapenomban.
18Apapara la napengkamoyan Daud lako Kalemi la umpalaku kamala’biran tu losong na iatu Mikamaseammo taumMi? Belanna Mitandai kalenamo te taumMi.
19O PUANG, belanna taumMi sia pa’inaamMi, amMi pogau’i te mintu’ apa mala’bi’ iate sia Mipaissanni te mintu’ apa mala’bi’ iate.
20O PUANG, tae’ misa’ tau dipasangtintiangKomi sia tae’ tu Kapenomban senga’ sangadinna Kamu, situru’ tu mintu’ tobangna tama pa’perangingki.
21Bangsa umbara tu ma’din dipasangtinti to Israel, tu bangsa sangbua bannang dao te kuli’na padang tu Nala’bak Puang Matua la dadi misa’ bangsa lako Kalena, amMi padenan sanga Kalemi, tomMi pogau’i tu penggauran kapua sia metakuran, amMi ula’i mintu’ bangsa dio tingayona taumMi tu mangka Mila’bak lan mai tondok Mesir.
22Mangkamo tu to Israel taumMi Mipadadi misa’ bangsa lako Kalemi masae lako, sia Kamu, o PUANG, tu Kapenombanna tau iato mai.
23Totemo, o PUANG, iatu kada tu mangka Mipokada diona te taumMi sia diona bati’na, pabantangi tontong sae lakona; sia parampo randannai susitu apa mangka Mipokada.
24Iake susito iatu sangamMi la bantang sia la pasareongan sae lakona, anna gente’i tau kumua: Iatu PUANG na mintu’ ma’dandan maritik, Kapenombanna to Israel, iamo misa’ Kapenomban lako to Israel, sia iatu bati’na Daud, taumMi, la manda’ dio oloMi.
25Belanna Kamu, o Kapenombangku, tu mangka umpaombo’i lako taumMi, kumua la Mipabendanan misa’ banua tu taumMi; iamoto anna tang malaa’ te taumMi umparampoi te passambayang iate lako oloMi.
26O PUANG, Kamu tonganmo tu PUANG Matua sia Kamumo tu mangka umpokadai te apa melo iate diona taumMi.
27Totemo naalamo penaamMi umpamasakke tongkonanna taumMi, kumua natang tileluk dio oloMi tontong sae lakona. Belanna Kamumora, o PUANG, tu mangka umpamasakkei, iamoto nala maupa’ sae lakona.
<< 1 Tawarikh 17 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel