Diona surodadu diboronganni, sia to diala parea madao
1Inde sia tu bilanganna mintu’ to Israel situru’ pangulu rapunna sia kamandangna sangsa’bu tau sia kamandangna saratu’ tau sia to ma’parentana, tu umpengkaolai datu lan mintu’ pengkarangan dio golonganna surodadu, tu bulanoi tamaoi sia maleoi; susi bang to sipeupu’ bulan lan sang taun; iake sanggolonganoi den duang pulo nna’pa’sa’bunna.
2Iatu pangulu tuntunan bunga’na lan tu bulan bunga’, iamotu Yasobam, anakna Zabdiel; mintu’ to nalili’ tuntunanna den duangpulo nna’pa’ sa’bu;
3iamo bati’na Peres sia pangulunna mintu’ kamandang surodadu lan bulan bunga’na.
4Iatu pangulu tuntunan lan bulan ma’penduanna, iamotu Dodai, to Ahohi, sia ia duka tu nalili’ tuntunanna, iamo arung Miklot; mintu’ to nalili’ tuntunanna den duangpulo nna’pa’ sa’bu.
5Iatu kamandang surodadu ma’pentallunna lan bulan ma’pentallunna iamotu Benaya, anakna Yoyada, tominaa kapua; mintu’ to nalili’ tuntunanna den duangpulo nna’pa’ sa’bu.
6Benaya iamote tu misa’ pa’barani dio mai to pa’barani tallungpulo sia pangullunna tau tallungpuloi; sia (naala duka lili’) tuntunanna tu Amizabad, anakna.
7Iatu ma’penna’pa’na lan bulan ma’penna’pa’na iamotu Asael, siulu’na Yoab, naundinna to Zebaja, anakna muane Asael; mintu’ to nalili’ tuntunanna den duangpulo nna’pa’ sa’bu.
8Iatu ma’pellimanna lan bulan ma’pellimanna iamotu kamandang Samhut, to Yizrah; mintu’ to nalili’ tuntunanna den duangpulo nna’pa’sa’bu.
9Iatu ma’pennannanna lan bulan ma’pennannanna iamotu Ira, anakna Ikesh, to Tekoa; mintu’ to nalili’ tuntunanna den duangpulo nna’pa’ sa’bu.
10Iatu ma’pempitunna lan bulan ma’pempitunna iamotu Heles, to Peloni, bati’na Efraim; mintu’ to nalili’ tuntunanna den duangpulo nna’pa’ sa’bu.
11Iatu ma’pengkaruanna lan bulan ma’pengkaruanna iamotu Sibkhai, to Husa, bati’na Zerah; mintu’ to nalili’ tuntunanna den duangpulo nna’pa’ sa’bu.
12Iatu ma’pengkaseranna lan bulan ma’pengkaseranna iamotu Abiezer, to Anatot, bati’na Benyamin; mintu’ to nalili’ tuntunanna den duangpulo nna’pa’ sa’bu.
13Iatu ma’pessangpulona lan bulan ma’pessangpulona iamotu Maharai, to Netofa, bati’na Zerah; mintu’ to nalili’ tuntunanna den duangpulo nna’pa’ sa’bu.
14Iatu ma’pessangpulo misanna lan bulan ma’pessangpulo misanna iamotu Benaya, to Piraton, bati’na Efraim, mintu’ to nalili’ tuntunanna den duangpulo nna’pa’ sa’bu.
15Iatu ma’pessangpulo duanna lan bulan ma’pessangpulo duanna iamotu Heldai, to Netofa, bati’na Otniel; mintu’ to nalili’ tuntunanna den duangpulo nna’pa’ sa’bu.
16Inde sia tu mintu’ pangulunna suku to Israel, iamotu arung Eliezer, anakna Zikhri, dio to Ruben Sefaca, anakna Maakha, dio to Simeon;
17Hasabya, anakna Kemuel, dio to Lewi; Zadok dio bati’na Harun;
18Elihu, misa’i dio mai siulu’na Daud, dio to Yehuda; Omri, anakna Mikhael, dio to Isakhar;
19Yismaya, anakna Obaja, dio to Zebulon; Yerimot, anakna Azriel, dio to Naftali;
20Hosea, anakna Azazya, dio to Efraim; Yoël, anakna Pedaya, dio sangsesena suku Manasye;
21Yido, anakna Zakharia, dio sangsesena suku Manasye, lan lili’na Gilead; Yaasiel, anakna Abner, dio to Benyamin;
22Azareel, anakna Yeroham, dio to Dan; iamote tu mintu’ pangulunna suku to Israel.
23Tae’ napaalai bilangan Daud tu mai to duangpulo taunna sia to tang ganna’ duangpulo taunna, belanna mangkamo Napokada PUANG, kumua Ia la umpopemba’ka’ kalle-kalleanmi tu to Israel susi bintoen dao langi’.
24Naparandukmo Yoab anakna Zeruya, umbilangi, apa tae’ napatarru’i, belanna bannang inde to narampo tu kasengkean lako to Israel. Iamoto iatu bilangan iato tae’ nadipatama sura’ ossoranna datu Daud.
25Iatu pangulunna mintu’ pa’palumpunanna datu, iamotu Azmawet, anakna Adiel; iatu pangulunna pa’palumpunan dio lu padang, lan lu kota, lan lu kampong sia lan lu tambakuku, iamotu Yonatan, anakna Uzia.
26Iatu pangulunna mintu’ to lako padang, tu to umbungka’ padang, iamotu Ezri, anakna Kelub.
27Iatu pangulunna mintu’ pa’lak anggoro’, iamotu Simei, to Rama; iatu pangulunna mintu’ pa’palumpunan anggoro’ lan pa’lak anggoro’, iamotu Zabdi, to Syifmi.
28Iatu pangulunna mintu’ kayu saitun sia mintu’ kayu ara pangala’ diong Padang Merrantena, iamotu Baal-Hanan, to Gederi; na Yoas pangulunna tu mintu’ pa’palumpunan minna’.
29Iatu pangulunna mintu’ sapi, tu dilaai dio lu Saron, iamotu Sitrai, to Saron, apa iatu pangulunna mintu’ sapi diong lu lombok, iamotu Safat, anakna Adlai.
30Iatu pangulunna mintu’ unta, iamotu Obil, to Ismael; na pangulunna mintu’ keledai birang, iamotu Yehdeya, to Meronot.
31Iatu pangulunna mintu’ domba sola bembe’, iamotu Yazis, to Hagri. Iamote tu mintu’ pangulunna apanna datu Daud.
32Iatu Yonatan, pa’amberanna Daud, iamo pa’bisara, misa’ to matarru’ sia to umpoissan sura’-sura’; na Yehiel, anakna Hakhmoni, ungkampai anakna muane datu.
33Iatu Ahitofel pa’bisaranna duka datu, na iatu Husai, to Arki, iamo marengke’na datu;
34na iatu dampi’na Ahitofel, iamotu Yoyada, anakna Benaya na Abyatar. Na iatu kamandang lompona datu, iamotu Yoab.
<< 1 Tawarikh 27 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel