Daud sirari to Amon sia to Aram
1Mangkato matemi tu datu to Amon, anna Hanun, anakna ussondai dadi datu.
2Ma’kadami Daud nakua: La umpa’petiroanna’ kamasokanangku lako Hanun, anakna Nahas, susitu ambe’na umpa’petiroammo kamasokananna lako kaleku. Iamoto nasuami Daud tu taunna umpakatanai diona kamateanna ambe’na. Ta’kala rampomi tu taunna Daud lako tondok to Amon.
3Ma’kadami tu mintu’ arungna to Amon lako Hanun, puangna, nakua: Tongannaraka tu Daud umpakala’bi’ ambe’mi dio olomi, diona kaussuanna ba’tu pira-pira pa’pakatana mennolo lako kalemi? Tangiaraka bannangna te nanii Daud ussua taunna mennolo lako kalemi, la umparessai torroanna te tondok sia la usserre’i anna sanggangi?
4Natingkanmi Hanun, tu mintu’ taunna Daud, naku’ku’i sangsese tu danggo’na sia nase’pa’i sangpiak tu sambu’na sae rokko pupunna, namane ussuai sule.
5Iatonna mangkamo dipokadan Daud tu iannato, nasuami tu ba’tu pira-pira tau male untamui tu tau iato mai, belanna lendu’ dipakasiri’na; nakuami datu: Melo ke torropokomi dio Yerikho sae lako tuona sule tu danggo’mi, mimane sule.
6Iatonna issanmi to Amon kumua napakadake lelemo tu kalena dio olona Daud, nasuami ussaroi to Aram dio Bet-Rehob sia to Aram dio Zoba duangpulo sa’bu tu surodadu lumingka, sia surodadunna datu Maakha sangsa’bu, sia surodadunna Tob sangpulo dua sa’bu.
7Iatonna rangimi Daud tu kareba iato, nasuami tu Yoab sola mintu’ surodadu, iamotu surodadu pa’tonno’.
8Tassu’mi tu to Amon anna ma’pampangan dio tingayo babangan tondok, apa mintu’ to Aram dio mai Zoba sia Rehob sia mintu’ to Tob sia Maakha pada bendan dio inanna dio lu padang.
9Iatonna tiromi Yoab tu surodadu umpempatui la ullaoi lu dio mai tingayo sia dio mai boko’ napileimi ba’tu pira-pira surodadu dio mai pa’tonno’ to Israel, napopa’pampanganni sitingoan to Aram.
10Iatu mintu’ surodadu la’bi, nasorong lako Abisai, adinna, tu umpopa’pampanganni sitingoan to Amon.
11Nakuami Yoab: Iake nasau’na’ tu to Aram, la saeko untunduinna’ na iake nasau’ko tu to Amon, manassa la saena’ untunduiko.
12La baraniko sia la lalongki’ belanna bangsata sia belanna mintu’ kotana Kapenombanta. Na PUANGmora umpogau’i tu apa naala penaanNa.
13Tassu’mi lako tingayo tu Yoab sia mintu’ tu surodadu nasolan la sirari to Aram, anna mallai tu to Aram dio mai tingayona.
14Iatonna tiromi to Amon, kumua mallaimo tu to Aram, mallaimi tu tau iato mai dio mai tingayona Abisai, anna tama kota. Sulemi tu Yoab untalo to Amon, anna rampo lako Yerusalem.
15Iatonna issanmi to Aram kumua natalomo to Israel, sirampun pole’omi.
16Nasuami Hadadezer sae tu mintu’ to Aram, tu sambali’na lu salu, anna sae lako Helam; na Sobakh, kamandangna Hadadezer, iamo umpangului tu tau iato mai.
17Iatonna dipokadammo Daud tu iannate, narampunmi tu mintu’ to Israel, anna lamban Yordan, natarru’ lako Helam. Ma’pampangammi tu to Aram sitingoan Daud, anna sirari.
18Apa mallai tu mintu’ to Aram dio mai tingayona to Israel; napateimi Daud pituratu’ tu darang karetana to Aram sia patangpulo sa’bunna pakkanarang, sia nabangkei tu Sobakh kamandangna, anna mate inde to dio.
19Iatonna tiromi mintu’ arung mengkaola lako Hadadezer, kumua talo dio tingayona to Israel, sikaelomi to Israel, sia mengkanorong lako. Mataku’mi tu to Aram untundui pole’i tu to Amon.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel