Hizkia umpemaseroi Banua Kabusungan ( ; )
1Iatu Hizkia duangpulomo llima taunna, tonna dadi datu, anna ma’parenta duangpulo ngkasera taunna dio Yerusalem. Iatu indo’na disanga Abia, anakna Zakharia.
2Napogau’mi tu apa malolo dio pentiroNa PUANG, susitu mintu’ napogau’ Daud, nene’ to dolona.
3Nabungka’mi tu mai ba’ba banuanNa PUANG sia napemeloi, tonna taun pamulanna kadatuanna lan bulan bunga’na.
4Nasuami datu tu mintu’ to minaa sia to Lewi sae mennolo, anna sirampun tu tau iato mai dio tarampak Rampe matallo,
5anna ma’kada tu datu lako nakua: Perangiina’, e to Lewi, pamaserokomi kalemi sia pamaseroi tu banuanna PUANG, Kapenombanna nene’ to dolomi, sia patassu’i tu mintu’ apa maruttak lan mai inan maindan.
6Belanna iatu mai ambe’ta tang maruru’ tonnanu’, umpogau’mo apa kadake dio pentiroNa PUANG, Kapenombanta, sia natampemo sia tae’mo nasailei tu inanNa PUANG sia naboko’imo.
7Ondongpi natutu’ tu mai ba’ba serambi, sia napa’dei tu mintu’ palita sia tae’ natunu dupa sia tae’ napemalaranni tu pemala’ ditunu pu’pu’ lan inan maindan lako Kapenombanna to Israel.
8Iamoto nare’dek ara’Na PUANG lako Yehuda sia lako Yerusalem, anNa popendadii apa napotiramban sia napomagiang sia napokatellean tau, susitu natiro matammi.
9Tonganna, iamoto na iatu mai ambe’ta tibambangmo mate nakande pa’dang sia iatu mai anakta muane sia anakta baine sia baineta male nasangmo dirampa.
10Totemo lanmo penaangku la untanan basse sola PUANG, Kapenombanna to Israel, kumua nasoro’ tu kare’dekanna ara’Na dio mai kaleta.
11E! anakku, da mitang ungkaritutui tu pentoeammi, belanna Natonno’mokomi PUANG la bendan dio oloNa la umpenombai, sia la dadi taunNa sia memala’ lako Kalena.
12Bendanmi tu to Lewi, iamotu Mahat, anakna Amasai, sia Yoël, anakna Azarya dio mai bati’na Kehat; na dio mai bati’na Merari iamotu Kish, anakna Abdi sia Azarya, anakna Yehaleleel; sia dio mai bati’na Gerson iamotu Yoah, anakna Zima sia Eden, anakna Yoah;
13na dio mai bati’na Elisafan iamotu Simri na Yeiel, sia dio mai bati’na Asaf iamotu Zakharia sia Matanya;
14na dio mai bati’na Heman iamotu Yehiel na Simei; sia dio mai bati’na Yedutun iamotu Semaya sia Uziel.
15Narampunmi tu mintu’ siulu’na, napemaseroi sia sae umpemaseroi banuanNa PUANG unturu’ pepasanna datu, susitu NapokadanNa PUANG.
16Malemi tu to minaa tama banuanNa PUANG la umpemaseroi. Iatu mintu’ apa maruttak tu naappa’ lan banua kabusunganNa PUANG nabaa lako tarampak banuanNa PUANG, naala to Lewi inde to dio mai nabaai lako salian lako salu Kidron.
17Iatonna allo bunga’na lan bulan bunga’na naparandukmi tau iato mai umpamaindanni; iatonna allo ma’pengkaruannamo, nalambi’mi tu serambi banuanNa PUANG, anna pamaindanni tu banuanNa PUANG lan karua allona; na iatonna allo ma’pessangpulo annan lan bulan bunga’na napaupu’mi tu pengkarangan iato.
18Mangkato mentamami umpennoloi datu Hizkia, anna ma’kada lako nakua: Mangkamo kipemaseroi tu mintu’ banuanNa PUANG, sia iatu inan pemalaran dinii mantunu sola mintu’ pareananna sia meda roti dipennoloan sola mintu’ pareananna.
19Sia iatu mintu’ pareanan tu mangka napamaruttak datu Ahas, tonna ma’parenta napobua’ katangmarurusanna, kipasakka’ sia kipamaindan; manassa iatu mintu’nato dio nasangmo tingayo inan pemalaranNa PUANG.
20Iatonna masiang melambi’ narampunni datu Hizkia tu mintu’ pangulu kota anna male lako banuanNa PUANG.
21Nabaami tau tu sapi laki pitu na domba laki pitu na domba pitu na bembe’ laki pitu la naposuru’ pengkalossoran banua datu sia inan maindan sia Yehuda. Mesuami tu datu lako bati’na Harun, iamotu mintu’ to minaa anna pemalaranni dao inan pemalaranNa PUANG.
22Natunumi tau tu sapi laki, anna tarimai to minaa tu rarana sia napa’pi’pikan dao inan pemalaran. Mangkato natunumi tau tu domba laki anna pa’pi’pikanni tu rara iato dao inan pemalaran. Mangkato natunumi tau tu domba, anna pa’pi’pikanni tu rara iato dao inan pemalaran.
23Nabaami tau tu mintu’ bembe’ laki tu diposuru’ pengkalossoran lako olona datu sia kombongan, anna paremme’i limanna.
24Natunumi mintu’ to minaa tu bembe’ iato sia napemalaran tu rarana diposuru’ pengkalossoran dao inan pemalaran iato, la umbasei kasalanna mintu’ to Israel, belanna mangkamo napa’parentan datu, kumua la den pemala’ ditunu pu’pu’ sia pemala’ pengkalossoran napopemala’ mintu’ to Israel.
25Nasuami tu to Lewi bendan sikandappi’ banuanNa PUANG untangke taa’-taa’, dandi sia katapi, susitu napasan Daud sia Gad, to patanda-tandanna datu sia nabi Natan, belanna iatu pepasan iato Napokada PUANG nalopian tu mai to minaanna.
26Bendanmi tu mintu’ to Lewi sitangke oni-onianna Daud, sola mintu’ to minaa sitangke tarompe’.
27Mesuami tu Hizkia umpemalaran pemala’ ditunu pu’pu’ dao inan pemalaran iato. Iatonna randukmo dipemalaran tu pemala’ ditunu pu’pu’, randukmi dipopenani tu nanian lako PUANG sia dipannoni tu tarompe’, dipasiala oni-onianna Daud, datu Israel.
28Sangtukkuammi tu mintu’ kombongan menomba, sia dipopenani tu nanian sia dipannoni tu tarompe’ – mintu’nate dipogau’ sae lako upu’na tu pemala’ ditunu pu’pu’.
29Iatonna mangkamo memala’ tu tau iato mai, malinguntu’mi tu datu sola mintu’ tau nasolan, anna tukku menomba.
30Mangkato mesuami tu datu Hizkia sola mintu’ pangulu lako to Lewi, la umpudi PUANG ussa’bu’ kadanna Daud sia Asaf, to patanda-tandan. Napopenanimi tu pa’pudi-pudian siparannu-rannu, malinguntu’ sia tukku menomba.
31Ma’kadami tu Hizkia nakua: Mangkamokomi umpamarimbangan kalemi lako PUANG. Maimokomi, baami tu mai pemala’ sia pemala’ pa’pudian lako banuanNa PUANG. Iatu kombongan umbaa pemala’ sia pemala’ pa’pudian; sia mintu’ tu to masorok penaanna, umbaa pemala’ ditunu pu’pu’.
32Iatu mintu’ pemala’ ditunu pu’pu’, tu nabaa kombongan iato, iamotu sapi pitungpulo, domba laki saratu’ sia domba duaratu’. Mintu’nate dipopemala’ ditunu pu’pu’ lako PUANG.
33Na iatu pamengan masero iamotu sapi ananratu’ na domba tallungsa’bu.
34Apa iatu mai to minaa tae’ napira, naurunganni tae’ nalambi’i umpekuli’i tu mintu’ pemala’ ditunu pu’pu’ iato, iamoto natundui siulu’na, iamotu to Lewi samangkanna tu pengkarangan iato, sae lako iatu to minaa mangka umpamasero kalena. Belanna napoinaa tongan tu mai to Lewi tu umpamasero kalena mandu matutu na iatu mai to minaa.
35Sia den duka tu pemala’ ditunu pu’pu’ lendu’ budanna sola lompo pemala’ kasalamaran sola pemala’ pantedok tu dipasisola pemala’ ditunu pu’pu’. Susimoto tu kamenomban lan banuanNa PUANG dipasirundunan sule.
36Parannu-rannumi tu Hizkia sia mintu’ to buda tu diona apa mangka Naparandan Puang Matua lako taunNa, belanna madoi’ lalo te apa iate.
<< 2 Tawarikh 29 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel