Bunga’ kadanna Zofar, nakua: Sipatu tu Ayub umpamadiong penaanna dio oloNa Puang Matua unnissan angge maritik
1Ma’kadami tu Zofar, to Naama nakua:
2Ma’dinraka tu kada la’bi tang dipebalii, sia to umbeloi kadanna la ditonganan?
3Ma’dinraka tu kada punalammu umpakappa tau, sia ma’telle-telleko anna tae’ tau umpakasiri’ko?
4Ma’kadako mukua: Iatu pangadarangku malolo, sia maserona’ dio pentiroNa Puang.
5Apa lala sia manii anNa ma’kada Kalena tu Puang Matua sia umpatiku’bi’ randan pudukNa lako kalemu,
6sia umpaissanniko rasia kakinaan, belanna umpopanglokkon penduan kapaissanan. Mumane mangaku kumua iatu Puang Matua tae’mo Nakilalai tu sangtaan kakelokammu, tu la mupomatananna.
7Ma’dinraka mutarru’ tu rasianNa Puang Matua, sia ussuka’ To umpoissan angge maritik sae lako ma’katampakanna?
8Iatu iannato malangka’ ten to langi’; apara tu ma’din mupogau’? Mandalan na lino tomate; apara tu ma’din mutandai?
9Iatu suka’na malambe’ anna kuli’na padang, sia iatu kalua’na losong na tasik kalua’.
10Iake matira’I sae, anna ma’tingkan sia ma’paolai salu lan kombongan, minda tu la umpadapa Puang?
11Belanna Natandai tu to bulituk, sia Natiro tu kakelokan moi tae’ Namale umpenunui.
12Umba la nakua tu to tang kinaa la ungkabu’tui kapaissanan, ke la dadi tu iannato, ma’din duka tu anak keledai lampung mendadi rupa tau.
13Iake mupamaloloi tu penaammu, sia umballa’ko limammu, lako Puang;
14iake denni kakelokan lan limammu, pembuanganni lao, sia da naden katangmaloloan lan tenda munii torrs-
15iake susito, manassa la muadongan tu ulummu, natae’mo mumaruttak, ammu batta’ tumanan sia tang mataku’;
16ondongpi tang la mukilalaimo tu kamaparrisan, sia la mukilalai susito uai lolong.
17Iatu katuoammu la bu’tu marorrong susi ke ma’tangngai allo; moi matumba malillinna, apa la butung to melambi’.
18La ma’patonganko, belanna den pa’rannuanan, sia iake mangkami mupalelei matammu, la marampa’ko male mamma’;
19ammu matindo tang napatiramban misa’ tau, sia buda tu tau umpeagi kamasokanammu.
20Apa kamailuanna to tang mekaaluk umpamalayu matanna, iatu mintu’ lalan pentilindunganna ka’tumo, iatu apa napeagi, ia mannamo tu ka’tuan sunga’.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel