Alkitab Mobile SABDA
[VER] : [TORAJA]     [PL]  [PB] 
 <<  Bilangan 20 >> 

Kamateanna Miryam

1Iatonna bulan bunga’na, iatu to Israel, iamotu mintu’ kasirampunan saemo tama padang pangallaran Zin, natorro tu bangsa iato dio Kadesh, matemi tu Miryam, nadilamun dio.

Diona kasalanna Musa sola Harun

2Iatonna tae’mo uai dio lu kasirampunanna to Israel, sirampunmi tu tau unnea Musa sia Harun,

3anna iatu to buda unggaga Musa sia ma’kada nakua: Melo kami, ke matemokan, tonna mate tu siulu’ki dio oloNa PUANG!

4Ma’apai mibaai indete padang pangallaran tu kombonganNa PUANG, angki mate dio, la kami la iatu mai patuoangki?

5Ma’apai misuakan tassu’ lan mai tondok Mesir, ammi baakan tama te inan mandasa, tu tang natuoi gandung sia garonto’ ara sia garonto’ anggoro’ sia bua dalima sia tae’ nanii uai la diiru’.

6Malemi tu Musa sola Harun dio mai kombongan lako to’ ba’ba Tenda Kasitammuan, anna lumbang rokko padang, anna payan lako kalena tu kamala’biranNa PUANG.

7Anna ma’kada tu PUANG lako Musa, Nakua:

8Alami tu tekken sia popa’misai tu mintu’ kasirampunan, iko sia iatu kakammu Harun; ma’kadakomi dio tingayona tau iato mai lako buntu batu, manassa la napa’bengan tu uainna, ammu patassuranni uai tu tau iato lan mai buntu batu sia la mupairu’ tu kasirampunan sia iatu mai patuoanna.

9Naalami Musa tu tekken dio mai oloNa PUANG, susitu mangka Napasananni Puang.

10Narampunmi Musa sola Harun tu kombongan sitingoan buntu batu, nama’kada lako tau iato mai nakua: Perangii, e kamu to pabali-bali, la kipatassuranrokomika uai lan mai buntu batu iate?

11Naangka’mi Musa tu limanna, anna sambakki tekken penduan tu buntu batu, anna tassu’ tu uai buda, naurungan ma’dinmo tu kasirampunan iato mangiru’ sia ia duka tu mai patuoan.

12Ma’kadami tu PUANG lako Musa sola Harun, Nakua: Belanna tae’ mipatonganNa’ sia tae’ mipamaindanNa’ dio pentirona to Israel, iamoto tae’ mila ussolanni te kombongan iate tama tondok, tu Kukamaseanni.

13Iamote tu uainna Meriba, tu nanii to Israel sigaga PUANG sia Nanii PUANG umpamanassai lako tau iato mai, kumua Maindan.

Tae’ naeloranni to Edom tu to Israel unnola lendu’ tondokna

14Mangkato nasuami Musa tu sumbungan puduk dio mai Kadesh lako datu Edom, umparampoi kumua: Inde sia tu kadanna siulu’mi Israel, kumua: Mitandai tu mintu’ kamasussan urrampoikan,

15umba nakua tu diona nene’ to doloki male lako Mesir, sia masai allokan umpa’tondokki Mesir, sia iatu to Mesir umpakario-riokan, susi duka tu nene’ to doloki.

16Attu iato metambakan lako PUANG, Naperangii tu petambaki, anna suai tu misa’ malaeka’ ussolangkan tassu’ lan mai tondok Mesir; totemo indemokan Kadesh, misa’ kota dio passaparanna lili’ tondokmi,

17elorangkan ullendu’i tondokmi; tae’ angki la unnola pa’lak sia pa’lak anggoro’ sia tae’ angki la unniru’ uai bubun; la unnola batatta bangkan, tang sumepang kanan, ba’tu kairi sae lako kilendu’ina tu lili’mi.

18Apa mebali tu Edom lako nakua: Tae’ mila unnolai lendu’ te lili’ku, iammi olai la kutammuikomi pa’dang.

19Ma’kadami tu to Israel lako, nakua: La unnola batatta bangkan, sia iake unniru’kan uaimmi, aku la iatu patuoangku, manassa la kubaya’ tu allinna; tae’ra apa la kipogau’, sangadinna la tarru’ liu bangna’ lumingka.

20Apa ma’kada nakua: Tae’ mila unnolai lendu’. Tassu’mi tu Edom sola surodadu budanna sia to ma’pa’buno mawatang.

21Susimoto tu Edom tang unneloran to Israel unnola lendu’ lili’na, iamoto nasepangi to Israel tu lili’na.

Diona kamateanna Harun

22Ke’de’mi tu tau iato dio mai Kadesh, anna rampo lako buntu Hor tu mintu’ kasirampunanna to Israel.

23Ma’kadami tu PUANG lako Musa sola Harun dio lili’ tondok Edom sikandappi’ buntu Hor, Nakua:

24Iatu Harun la sisarak angin dipudukna sule lako nene’ to dolona, belanna tae’ na la tama tondok, tu Kukamasean to Israel, belanna mibali sola duakomi tu parentaKu dio to’ uainna Meriba.

25Solanni tu Harun sola Eleazar, anakna, ammi kendek sola langngan buntu Hor.

26Lendokanni tu pakeanna Harun, papakei tu Eleazar, anakna, namane sisarak angin dipudukna tu Harun sule lako nene’ to dolona, anna mate dio.

27Napogau’mi Musa susitu mangka Napepasanan PUANG, anna kendek langan buntu Hor dio pentirona mintu’ kasirampunan.

28Nalendokammi Musa tu pakeanna Harun, napapakeanni Eleazar, anakna. Attu iato matemi tu Harun dao botto tanete, namengkalao tu Musa sola Eleazar dao mai buntu iato.

29Iatonna tiromi mintu’ kasirampunan, kumua iatu Harun ka’tumo tu sunga’na, nabatingimi mintu’ to Israel tu Harun lan tallungpulo allona.



 <<  Bilangan 20 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran