Kasirarian dio Horma
1Iatonna rangimi to Kanaan, iamotu datunna Arad, tu untorroi tondok rampe Lo’na lu, kumua iatu to Israel unnola lalan Atarim, narariimi tu to Israel, narampai tu tau ba’tu pira-pira.
2Mangallonammi tu to Israel lako PUANG, sia ma’kada nakua: Iake Misorong nasangi te bangsa iate tama kuasangku, manassa la kusabu’i tu mintu’ tondokna butung pepayu.
3Natanannimi talinga PUANG tu to Israel, anNa sorongi tu to Kanaan; attu iato nasabu’imi tu tau iato mai sia kotana butung pepayu. Iamoto nasangai tau tu inan iato Horma.
Diona ula’ tambaga
4Ke’de’mi tu tau dio mai buntu Hor ma’palulako tasik Teberau nalilingi tu tondok Edom, anna massinurung tu bangsa iato dio lu lalan.
5Ma’kadami tu bangsa iato umbali Puang Matua sia Musa, nakua: Ma’apai misolangkanni lan mai tondok Mesir, angki la matemo lan padang pangallaran? Belanna tae’mo roti sia tae’mo uai sia iate kande kadake nabossa bangmokan.
6Naparampoimi PUANG ula’ keipo dio lu bangsa iato, natotokmi tu bangsa iato, anna buda tu to Israel mate.
7Saemi tu bangsa iato lako Musa anna ma’kada nakua: Kasalammokanni, belanna ma’kadamokan umbali PUANG sia umbalikomi; passambayangangkan lako PUANG, anNa patoyangi te mai ula’ dio mai kaleki. Napassambayangammi Musa tu tau iato.
8Ma’kadami tu PUANG lako Musa, Nakua: Garagako ula’ keipo, sia patoppo’i dao kayu sangbatang. Minda-minda mentiro langngan, ke mangkami natotok ula’, la tuo.
9Nagaragaimi Musa tu misa’ ula’ tambaga napatoppo’i dao kayu sangbatang; sia minda-minda, ke mangkami natotok ula’, anna mentiro langngan ula’ tambaga iato, manassa tuo.
Kalingkan ma’palulako padang Moab
10Ke’de’mi tu to Israel dio mai anna ma’tenda dio Obot.
11Ke’de’ pole’omi dio mai Obot, anna ma’tenda dio to’ padang daun lauanna Abarim, lan padang pangallaran, tu dio rampe matallona Moab, umpatu kadellekan allo.
12Indeto dio mai ke’de’omi, anna ma’tenda diong lombokna Zered.
13Indeto dio mai ke’de’omi, nama’tenda dio sambalinna lu Arnon, tu lolong dio padang pangallaran, tu tassu’ dio mai lili’na to Amori, belanna iatu Arnon passaparan kasiallaranna Moab na to Amori.
14Iamoto nadisa’bu’ lan sura’ diona pararinNa PUANG, nakua:
15iatu Waheb lan Sufa sia iatu mai lombok, sia Arnon, sia mennaa’na lombok, tu tiballa’ sae lako pa’tondokanna Ar sia umposissarean passaparanna Moab.
16Indeto dio mai ma’palulakoomi Beer. Iamote tu kalimbuang, tu mangkamo Napokada PUANG lako Musa diona a’ganna, kumua: Rampunni tu mai bangsa, angKu benni uai.
17Attu iato napopenanimi to Israel te penanian iate, kumua: Tidarrakmoko, e kalimbuang, penanianni umpasisonda-sonda pa’tendeng,
18iamotu kalimbuang nabo’bok tu mai datu, tu nalo’po’ tekken kapayunganna iamotu tekkenna to mala’bi’na bangsa iato. Ke’de’mi tu tau iato mai dio mai padang pangallaran lako Matana;
19dio mai Matana lu lako Nahaliel, nadio mai Nahaliel lu lako Bamot;
20nadio mai Bamot lu rokko lombok, tu diong padangna Moab, sikandappi’ bottona Pisga, tu untongloi padang talo.
Kasirarian unnea Sihon, datu Hesbon
21Nasuami to Israel tu sumbungan puduk lako Sihon, datunna to Amori,
22anna palakui kumua: Eloranna’ unnola lendu’ tondokmi. Tae’ angki sumepang unnola pa’lak sia pa’lak anggoro’, tae’ angki la unniru’ uai bubun, la tarru’ bangkan unnola batatta, sae lako kilendu’ina tu lili’mi.
23Apa tang naeloran Sihon tu to Israel unnola lendu’ lili’na, apa narampunora tu mintu’ surodadunna, anna ke’de’ umpessitammui Israel lan padang pangallaran, narampo dio Yahaz, pararimi unnea to Israel.
24Napa’dangi to Israel tu tau iato, anna taloi sia naala tu tondokna randuk dio mai Arnon sae lako Yabok, sae lako lili’na to Amon, belanna iatu passaparanna to Amon, matoto’ tongan.
25Naalami to Israel tu mintu’ kota iato sia napa’tondokki tu mintu’ kotana to Amori, iamotu Hesbon sola mintu’ lili’na.
26Belanna iatu Hesbon, iamo kotana Sihon, datu to Amori. Na iatu Sihon mangkamo urrarii datu Moab, iamotu datu dolo, sia narampa tu mintu’ tondokna, sae lako Arnon.
27Iamoto ma’kadami tu to untono’ sengo kada peada’, nakua: Malekomi lako Hesbon, la dibangun sia ditambakuku tu kotana Sihon!
28Belanna iatu api tassu’mo dio mai Hesbon, sia ma’lana-lana dio mai kota Sihon; anna kandei tu Ar-Moab, tu umparenta inan madaona Arnon.
29Upu’ allomu, e Moab; sanggangmoko pole’, e taunna Kamos! Ia napotete namallai tu anakna muane, na iatu anakna baine dadi to dirampana Sihon, datu to Amori.
30Kilaoimo pana tu tau iato; iatu Hesbon sanggangmo sisola Dibon, kisabu’i sae lako Nofah, tu landa’ sae lako Medeba.
Kasirarian unnea Og, datu Basan
31Susimoto tu to Israel torro lan tondok to Amori.
32Mangkato nasuami Musa tu tau lao umparessa buni Yaezer, natalomi tu lili’na, sia naula’ tu to Amori torro lan.
33Sepangmi to tau iato, anna ma’palulako Basan: malemi tu Og, datu Basan, umpessitammui, la ia la mintu’ taunna, la urrarii dio Edrei.
34Apa ma’kada tu PUANG lako Musa, Nakua: Da’ mukataku’i, belanna la Kusorong tu datu iato sola mintu’ taunna sia tondokna tama kuasammu sia la mupogau’ lako susitu mangka mupogau’ lako Sihon, datu to Amori, tu torro dio Hesbon.
35Natalomi tu datu iato sola anakna sia mintu’ taunna, natalo nasang, naurungan moi misa’ tau tang pakalamo lussu’; naalami tu tondokna napotondokki.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel