Pangoki’ dio to’ rinding
1Iatu datu Belsazar umpadenan pa’maruasan sangsa’bu to ma’parentana; unniru’mi uai anggoro’ tu datu dio tingayona to sangsa’bu.
2Marassan mangiru’ anggoro’ tu Belsazar, mesuami umbaai sae tu pareanan bulaan sia salaka, tu nabaa Nebukadnezar, ambe’na lan mai Banua Kabusungan dio Yerusalem, anna iru’i datu sia mintu’ to paana sia bainena sia gundi’na.
3Nabaami tau sae tu mintu’ pareanan bulaan, tu dipatassu’mo dio mai Banua Kabusungan, banuanNa Kapenomban dio Yerusalem, anna iru’i datu sia mintu’ to ma’parentana, sia bainena sia gundi’na.
4Unniru’mi anggoro’ anna pudi-pudii tu mintu’ rapang-rapang dipodeata bulaan, salaka, tambaga, bassi sia batu.
5Ta’kala payanmi tu mai taruno lima tau, tu mangoki’ dio to’ rinding dikapu’i lan tongkonan layukna datu sitingoan to’ inan lampu, anna tiroi datu tu boko’ lima iato marassan mangoki’.
6Attu iato bali’mi tu rupanna datu sia iatu tangnga’na umpamagiang penaanna, sia langga’ tu aakna, na iatu guntu’na sigalatuan.
7Metambami tu datu umpekapuai gamaranna, mesua ussolanni sae tu to ma’basa-basa, sia to Kasdim sia to pakita-kita. Ma’ kadami tu datu lako mintu’ to paissan lan Babel, nakua: Minda-minda ma’din umbasai te pangoki’ iate sia umpokadanna’ tu battuananna, la dipakei tamangkale lango-lango, sia dipaluangi manik bulaan tu barokona, sia iamo la ma’parenta lan kadatuan untoe pangka’ ma’pentallun.
8Iatonna sae nasangmo tu mintu’ to paissanna datu, tae’ bang ungkullei umbasai tu pangoki’ iato sia umpokadanni datu tu battuananna.
9Lendu’mi magiangna tu datu Belsazar sia bali’ tu rupanna; sia mintu’ to ma’parentana tiramban nasang.
10Iatonna rangimi datu baine tu kadanna datu sia mintu’ to ma’parentana, tamami to’ inan pa’maruasan. Ma’kadami tu datu baine nakua: Namasakkemora tu datu sae lakona! Da naiatu tangnga’mi umpamagiangkomi, sia da nabali’ tu rupammi.
11Den misa’ tau lan parentami, natorroi penaa deata masero; na iatonna ambe’mipa iatu tau iato iatu penaanna, naniimo arrang sia tangnga’ kinaa sia kakinaan, susitu kakinaanna deata; iatu ambe’mi datu Nebukadnezar unnangka’i tu tau iato pangulu to paissan-issan, to ma’basa-basa, to Kasdim sia to pakita-kita, – susimoto tu ambe’mi, o datu.
12Belanna lan kalena tu penaa liu matarru’, kapaissanan sia kamanarangan ussembang tindo sia umpabu’tu rasia sia ungko’ka’i ponto bannang, iamotu lan kalena Daniel, tu naganti datu, iamotu Beltsazar, iamoto melo ke ditambai tu Daniel, naia la umpokadai tu battuanna.
13Attu iato nasolammi tau tu Daniel, lako datu. Ma’kadami tu datu lako Daniel nakua: Ikoraka Daniel, misa’ to Yehuda tu dipali’ tu nabaa datu, ambe’ku, dio mai Yehuda?
14Kurangimoko, kumua naniiko penaa deata sia iatu penaammu naniimo arrang sia kamatarrusan sia kakinaan kapua tongan.
15Saemo disolan umpennoloina’ tu to paissan sia tu to ma’basa-basa, dikua anna basai te pangoki’ iate sia napokadanna’ tu battuananna, apa tae’ naissanni umpokadai tu battuananna te kada iate.
16Apa kurangimoko kumua ma’dinko ussembang tindo sia ungko’ka’i ponto bannang; totemo iake muissanni umbasai te pangoki’ iate sia umpokadanna’ battuananna, la dipakeiko tamangkale lango-lango sia la dipaluangi manik bulaan tu barokomu sia la ma’parentako lan kadatuan untoe pangka’ ma’pentallun.
17Mebalimi tu Daniel lako datu nakua: Da’i bangmi to tu pa’kamaseammi, na iatu pamenganmi ben bangmi to senga’; moi tae’ tu apa, la kubasan duka datu te pangoki’ iate sia la kupokadangkomi tu battuananna.
18O datu, mangkamo Puang Matua, Patodoranna, ungkamasei kadatuan, kataromposan, kadipangkeran sia kamala’biran tu Nebukadnezar, ambe’mi.
19Na diona tu kuasa kapua Nakamaseanni Puang, anna mintu’ bangsa sia to sangpetayanan sia ma’rupa-rupa basana ma’parondo penaanna ungkataku’i, belanna minda-minda tu la napatei, manassa napatei, minda-minda tu la napatuo, manassa napatuo, minda-minda tu la napamatande, manassa napamatande, minda-minda tu la napamadiongan, manassa napamadiongan.
20Apa iatonna pamadaomo penaanna sia umpamakarra’ pa’inaanna, naurunganni matampo, iamoto nadisuale dio mai isungan kapayunganna, sia sisayurammo kamala’biranna.
21Ondongpi diali’ dio mai sangbilangan tolino, na iatu penaanna susimo tu penaa olo’-olo’, sia sangtorroammo keledai lampung sia dibenmo riu nakande susi sapi sia nasakka’imo ambun dao mai langi’ tu kalena sae lako naaku, kumua Puang Matua, Patodorannamo, ungkuasai kadatuanna tolino sia untokkoi tu la dadi datu tu minda-minda naala penaanNa.
22Apa kamu, Belsazar, anakna datu, tae’ mipamadiongan penaammi, moi ammi issanni te mintu’na te,
23sangadinna umbali-baliorokomi Puang dao suruga, belanna napatassu’ nabaa tau lan mai banua kabusunganNa lako olomi tu mintu’ pareanan, ammi iru’i uai anggoro’ sola to ma’parentami, bainemi sia gundi’mi sia umpangke’komi rapang-rapang dipodeata salaka, bulaan, tambaga, bassi, kayu sia batu, tu tae’ napatiro sia parangi sia tang paissan, apa iatu Puang Matua, untoe bannang penaammi sia umpasirundunanni tu mintu’ lalanmi, tae’ mipangke’I.
24Attu iato Nasuami tu misa’ boko’ lima ussura’i tu pangoki’ iate.
25Inde sia tu pangoki’ iato, nakua: Mene, mene, tekel ufarsin.
26Na inde sia tu battuananna tu kada iato, kumua iatu Mene, battuananna: Nabilangmo Kapenomban tu kadatuammi sia Napaupu’mo;
27Tekel, battuananna: Ditimbangkomi lan timbangan apa maringan maro’komi;
28Peres, battuananna: Dipokamo tu kadatuammi sia disorongmo lako to Media sia to Persia.
29Attu iato mesuami Belsazar umpakei tamangkale lango-lango tu Daniel sia napaluangi manik bulaan tu barokona, anna petambanni tau, kumua iamo la ma’parenta lan kadatuan untoe pangka’ ma’pentallun.
30Iatonna bongi ia bangsiamoto, napateimi tau tu Belsazar, datu to Kasdim.
Daniel lan lo’ko’ singa
31(6-1) Mangkato natarimami Darius, to Media, tu kadatuan, tonna annanmo pulona ndua taunna.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel