Patiro mendeata tu diona a’pa’ olo’-olo’ lan tindona Daniel
1Iatonna taun pamulanna kadatuanna Belsazar, datu Babel, ma’tindomi tu Daniel sia natiro tu pentiro mendeata, tu bu’tu dio pentirona dao katindoanna. Nasura’mi tu tindo iato. Inde sia tu pamulanna tu kada iato.
2Ma’kadami tu Daniel nakua: Iatonna bongi kutiro lan patiro mendeata, songlo’ tu a’pa’ angin dao mai langi’ umpatigega’ tasik kapua;
3sia bu’tu diong mai tasik tu a’pa’ olo’-olo’ kapua, pantan sisengaran tu rupanna.
4Iatu bunga’na susi singa sia kepani’ susi langkan maega. Iatongku marassan umpenunui, dilampi’i tu pani’na, anna diangka’ diong mai padang nadipabendan umpellesean lentekna susi tolino, nadipatamai penaa tolino.
5Kutiromi tu misa’ olo’-olo’ senga’, tu ma’penduanna, susito misa’ beruang; bendanmi natumbiring sangpiak, ussamang tallu usuk lan to’ alla’ isinna; anna ma’kada tu tau ungkuanni: ke’de’ko kandei tu duku’ buda.
6Undinnato kutiro tu misa’ olo’-olo’ senga’ susi misa’ arimau bulu, a’pa’ tu pani’ manuk-manuk dao boko’na sia a’pa’ tu ulunna; disorongmi lako tu kaparentan.
7Undinnato kutiromi lan patiro mendeata tonna ibongi, kutiro misa’ olo’-olo’, tu ma’penna’pa’na, metakuran, mekarrangan bulu sia lendu’ matoto’na; sia iatu isi bassinna kapua: nakandemi sia nakaru’tukki tu mintu’ apa, na iatu sesanna nalullu’-lullu’ lentekna; sisengaran bang tu mintu’ olo’-olo’ dolonamo, sia sangpulo tu tandukna.
8Iatongku marassan umpenunui tu tanduk iato, ta’kala anna tuomo tu misa’ tanduk bitti’ lan alla’na, tu untumangi nadilampi’i tallu tanduk dio mai tanduk dolo; kutiro lan tanduk iato, nanii mata susi mata tolino sia puduk ussa’bu’ bang kada matampo.
9Iatongku marassan umpenunui, dipabendanmi tu ba’tu pira-pira isungan kapayungan. Nanii misa’ ToKaubanan; iatu tamangkaleNa mabusa susito ambun makko sia iatu beluakNa mapute susi bulu domba; api ma’lana-lana tu isungan kapayunganNa sia api dukku tu lentenanna.
10Sia misa’ salu api tikula’dak-la’dak, na lolong dio oloNa; massa’bu-sa’bu diala pessangsa’bu umpengkaolai sia sangpulo sa’bu-sa’bunna diala pessangpulo sa’bu bendan dio oloNa. Unnisungmi tu to ma’paolai salu anna bungka’i tu mintu’ sura’.
11Kupenunu tu diona gamaranna tanduk tu umpokada kada matampo; marassan bangsia kupenunu, ta’kala nadipateimo tu olo’-olo’ iato sia iatu kalena disanggang sia disorong la diballa api.
12Iatu olo’-olo’ torronapa dialai tu parentana anna diben kamalamberan sunga’ sae lako attunna sia allona.
13Tontongmi kupenunu lan patiro mendeata tonna ibongi sia kutiro den misa’ tu susi anak rampan dilino sae sola gaun dao langi’; anna male lako ToKaubanan sia dipopengkareke’ lako oloNa.
14Dikamaseimi kaparentan sia kadipangkeran sia kuasa kabarrealloan, anna mintu’ bangsa sangpetayanan sia ma’rupa-rupa basa mengkaola lako kalena. Iatu kaparentanna la tontong sae lakona, sia tang la pa’de len, sia iatu kadatuanna tang la sanggang len.
15Tigiang tu penaangku lan ba’tengku, te aku, Daniel, sia napatirambanna’ tu mintu’ patiro mendeata, tu bu’tu dio pentiroku.
16Kupengkareke’imi tu tau iato misa’, tu bendan inde to dio, angku kutanai manassana te mintu’na apa iate; ma’kadami lako kaleku sia napokadanna’ battuananna te mintu’ apa iate.
17Iatu olo’-olo’ kapua, a’pa’i iamotu a’pa’ datu la kendek diong mai padang.
18Mangkato iatu Tomaserona Puang Patodoranna la untarima kadatuan, sia la umpomana’ kadatuan tontong sae lakona, ondongpi matontongan tontong sae lakona.
19Moraimo’ la unnissanni manassana tu diona olo’-olo’ ma’penna’pa’na, tu sisengaran mintu’ solana, sia lendu’ ia metakuranna, ma’isi bassi, ma’kanuku tambaga, nakandemi sia nakaru’tukki tu mintu’ apa, na iatu sesanna nalullu’-lullu’ lentekna,
20sia diona sangpulo tanduk dao ulunna, na iatu senga’na misa’ tu tuo, tu untumangi anna lesok tu tanduk dolo tallu, na iatu tanduk iato kemata sia kepuduk ussa’bu’ bang kada matampo sia ditiro kapua na iatu solana.
21Kutiromi tu tanduk iato sirari to masero, anna patalo,
22sae lako saena tu To Kaubanan, anNa sanda tonganni tu to maserona Puang Patodoranna sia mengkareke’mo tu attunna, ke natarimami to masero tu kadatuan.
23Ma’kadami susite nakua: Iatu olo’-olo’ ma’penna’pa’na iamotu kadatuan ma’penna’pa’na, tu la den dao kuli’na padang sia la sisengaran mintu’ kadatuan senga’, sia iamo la umpepurai mintu’ issinna lino sia la nalullu’-lullu’ sia nanisak-nisak.
24Na iatu sangpulo tanduk battuananna: dio mai kadatuan iato la nanii bu’tu sangpulo datu, naundinna la bu’tu tu senga’na misa’, la sisengaran tu dolona, anna tallu datu la naputtai.
25Sia la ussa’bu’ ba’tu pira-pira kada umbali-bali Puang Patodoranna sia umpandasa to maserona Puang Patodoranna; sia undaka’ lalan la ussondai attu sia atoran, sia la disorong tu tau iato mai tama limanna lan misa’ attu sia ba’tu pirang-pirang attu na sangtangnga attu.
26Attu iato unnisungmi tu to ma’paolai salu, anna dialai tu parentana sia disanggangi sia disabu’i sae lako roto’na.
27Sia iatu kadatuan sia kuasa sia kataromposanna mintu’ kadatuan diong nasambo langi’ la dikamasean kombonganna tomaseroNa Puang Patodoranna; na iatu kadatuanNa iamo misa’ kadatuan tontong sae lakona, sia mintu’ to kuasa la umpengkaolai sia umperangii.
28Rampomo inde te tu kada iato. Iatu aku Daniel, mintu’ tu tangnga’ku umpamagiang tonganna’, naurunganni bali’ tu rupangku; sia mintu’ te kada iate kupalan penaangku.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel