Alkitab Mobile SABDA
[VER] : [TORAJA]     [PL]  [PB] 
 <<  Hakim-hakim 8 >> 

Kaditaloanna to Midian sia kadipateianna datunna

1Ma’kadami tu to Efraim lako Gideon, nakua: Matumbari te penggaurammi lako kaleki, natae’ra mitambaikan tommi male urrarii to Midian? Nasarabaimi tu Gideon.

2Apa ma’kada tu Gideon lako nakua: Umbara susite penggaurangku, ke dipasitintii penggaurammi? Tang mandu meloraka tu peanggoro’ undinna Efraim na iatu peanggoro’na Abiezer.

3Nasorongmo Puang Matua tama limammi tu Oreb sola Zeeb, datunna to Midian; apa todara tu ma’din kupogau’ ke dipasitintii penggaurammi? Iatonna ma’kadamo susito, meremi tu kasengkeanna tau lako.

4Iatonna rampomo Gideon lako Yordan, lambanmi sola tu tau talluratu’ nasolan; moi namata’ka’ tongan, apa mangula’ duka.

5Ma’kadami lako to umpa’tondokki Sukot nakua: Benpi ba’tu pira-pira rotimmi te to undi urrundu’na’, belanna mata’ka tongan sia akumo undi unnula’i te Zebah sola Salmuna, datu to Midian.

6Apa ma’kada tu mintu’ arungna Sukot nakua: Denraka pala’ limanna Zebah sola Salmuna lan limammi totemo, angki la umbenri roti tu surodadummi?

7Ma’kadami tu Gideon nakua: Belanna kada iate, ianNa sorongi PUANG tu Zebah sia Salmuna tama limangku, manassa kubamba duri padang pangallaran sia a’da’ tu kalemi.

8Ke’de’mi inde to dio mai namale lako Pnuel, anna ma’kada duka susito lako to umpa’tondokki Pnuel, apa nabali tau iato susitu pebalinna to Sukot.

9Iamoto ma’kadami tu Gideon lako to umpa’tondokki Pnuel, nakua: Iangku sule marampa’ sia, manassa la kusanggang te menara iate.

10Attu iato diomo lu Karkor tu Zebah sola Salmuna sisola surodadunna, agi-agi den sangpulo lima sa’bu tau; iamotu mintu’ surodadu torropa dio mai mintu’ suku rampe matallo; na iatu dipateinna den saratu’ duangpulo sa’bu tu to manakkamo untakin pa’dang.

11Ma’palurekkemi tu Gideon urrundu’ lalanna to ma’tenda rampe matallona Nobah sola Yogbeha, anna taloi tu surodadu iato, tonna masaliomo tu tau iato mai.

12Mallaimi tu Zebah sola Salmuna, apa undi naula’; anna rampai tu da’dua datu to Midian, iamotu Zebah sola Salmuna sia napasisarak-sarak tu mintu’ surodadunna.

13Sulemi tu Gideon, anakna Yoas, dio mai inan kasirarian, unnola lombok dao tanete Heres.

14Natingkanmi tu misa’ pia muane dio mai to Sukot, anna kutanai, sia nasurasanni tu mintu’ arungna sia pekaamberanna Sukot, den pitungpulo mpitu tau.

15Malemi lako to Sukot, anna ma’kada, nakua: Tiromi indemo tu Zebah sola Salmuna, tu minii untellena’ mikua: Denraka pala’ limanna Zebah sola Salmuna lan limammi, angki la umbenri roti tu mai to mata’ka’mi?

16Naalami tu mintu’ pekaamberanna kota iato na iatu duri padang pangallaran sola a’da’ naadaranni tu to Sukot iate.

17Sia iatu menarana Pnuel nasanggang sia iatu mai muane lan lu kota napatei.

18Undinnato ma’kadami lako Zebah sola Salmuna, nakua: Umbamira tu to mangka mipatei dao Tabor? Mebalimi nakua: Susikomi, iatu pa’kaleanna, ke misa’oi susito misa’ anak datu.

19Ma’kadami tu Gideon nakua: Tau iato mai siulu’ku, sangindo’na’! La lelukraka tuoNa PUANG, iakemmi patuoi, manassa tae’ kupateikomi.

20Ma’kadami lako Yeter, anak pa’bunga’na nakua: Ke’de’ko ammu patei. Apa mataku’ tu pia muane iato sia tae’ nanonokki tu pa’dangna, belanna mangurapa.

21Attu iato ma’kadami Zebah sola Salmuna nakua: Kamu kalenamo ke’de’ untobokkanni, belanna susi taunna susi dukato tu kamatotoranna. Ke’de’mi tu Gideon, anna patei tu Zebah sola Salmuna sia naalai tu pareanan susito bulan ma’rangkapan lan mai baroko untana.

Penggauran undinna Gideon sia katampakanna katuoanna

22Ma’kadami tu to Israel lako Gideon nakua: Kamumo umpuangikan totemo la kamu la anakmi la ampomi, belanna kamumo urrampanangkan lan mai kuasanna to Midian.

23Mebalimi tu Gideon lako tau iato mai, nakua: Tangia aku la umpuangikomi sia tangia duka anakku, sangadinna PUANG Ia tu la umpuangikomi.

24Sia ma’kadapa tu Gideon lako tau iato mai, nakua: Misa’ri kupalaku lako kalemi: Pantankomi la umbenna’ simisa’ baba’ pangrampami; iatu tau iato mai ma’baba’ bulaan, belanna to Ismael.

25Ma’kadami tu tau iato mai, nakua: La kipa’bengan situang penaa sallo’ki. Naampa’mi tu misa’ bayu lamba’, anna pantan umbuangi rokko simisa’ baba’ dio mai pangrampana.

26Iatu timbanganna mintu’ baba’ bulaan den sangsa’bu pituratu’ sikele’ bulaan, senga’pi tu pareanan susito bulan ma’rangkapan, anting-anting sia pakean lango-lango makaseda, tu napakemo datu to Midian, sia senga’pa ia tu mintu’ rante lan baroko untana.

27Mintu’ to apa iato nagaragai Gideon misa’ epo’, anna palanni kotana Ofra. Iatu mintu’ to Israel memboko’mo namale umpa’deatai tu epo’; iamo dadi poya lako Gideon to sia lako mintu’ to lan banuanna.

28Susimoto tu to Israel umpatundukki tu to Midian sia tang nabelamo tu tau iato mai umbangunan ulunna. Attu iato tonna linona Gideon marampa’mi tu tondok lan patang pulo taunna.

29Sulemi tu Yerubaal, anakna Yoas, anna torro lan banuanna.

30Den pitungpulo tu anak dadianna Gideon, belanna buda tu bainena.

31Iatu baine gundi’na dio Sikhem umpadadianni misa’ muane, tu nasangai Abimelekh.

32Matemi tu Gideon, anakna Yoas, tonna sumpu matuamo, anna lamun-ni tau lan lamunanna Yoas, ambe’na dio Ofra, to Abiezer.

33Iatonna mate tu Gideon, memboko’mi tu to Israel umpengkaolai Baal sia umpodeata Baal-Berit;

34tae’mo nakilalai to Israel tu PUANG, Kapenombanna, tu mangkamo urrampanan tau iato mai lan mai limanna mintu’ ualinna tiku lao,

35sia tae’ napabala’i kamamasean tu to lan banuanna Yerubaal – Gideon sitinaya mintu’ kameloan tu na pogauran to Israel.



 <<  Hakim-hakim 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel