Alkitab Mobile SABDA
[VER] : [TORAJA]     [PL]  [PB] 
 <<  Imamat 14 >> 

1Ma’kadami tu PUANG lako Musa Nakua:

2Inde sia tu la dadi atoran lako to golenan ke allo kadipamaseroanna: la dipopentingayo lako to minaa,

3sia iatu to minaa la sun lako salianna to’ tenda. Iake natiroi to minaa kumua mondomo tu golen sia soro’mo dio mai to golenan,

4la napesuan to minaa unnala da’dua manuk-manuk masero sia kayu arasi’, bannang karamisi sia supa.

5Anna mesua to minaa urrere’i tu manuk-manuk misa’ daona lu kurin litak nanii uai kalimbuang.

6Mangkato la naala tu manuk-manuk misa’ tu tuonapa sia kayu arasi’, bannang karamisi sia supa anna otonni sola tu manuk-manuk tuopa tama rara manuk-manuk direre’ dao uai kalimbuang.

7Anna pi’pikki pempitu lako tu to la dipamasero dio mai golenna, sia napamasero, sia la narampanan tu manuk-manuk tuo mettia’ dio lu padang.

8Iatu to dipamasero la umbusukki pakeanna sia la ungku’ku’i mintu’ beluakna sola bulunna sia la mendio’ namane masero; mangkato namane ma’din tama inan to’ tenda, apa la torropa pitung allo dio salian tendana.

9Iake ma’pitung allomi la naku’ku’i tu mintu’ beluakna sia bulunna: iamotu dao ulunna, danggo’na sia kanning matanna; mintu’ beluakna sola bulunna la naku’ku’i, sia la nabusukki tu pakeanna sia la nadio’ tu kalena, anna masero.

10Ianna allo ma’pengkaruamo la unnala domba da’dua tu tae’ tattanna sia domba birang sangtaunmo tu tae’ tattanna sia tallung taan sangpulona epa ta’pung mani’sa’ dipasigerok minna’ la dipokande dipemalaran, sia misa’ logo minna’.

11Iatu to minaa tu umpamaseroi tu tau iato la umpopennoloi tu tau iato sola mintu’ pemala’ iato dio oloNa PUANG, dio to’ ba’ba Tenda Kasitammuan.

12La naala to minaa tu domba misa’, anna pemalaranni sola tu minna’ sanglogo, diposuru’ pangakuan sala, anna sorongi sia untarimai sule dipopemala’ disorong ditarima sule dio oloNa PUANG.

13La narere’ tu domba iato dio inan nanii tau urrere’ suru’ pengkalossoran sia iatu pemala’ ditunu pu’pu’, dio to’ inan maindan, belanna susi suru’ pengkalossoran susi dukamoto tu suru’ pangakuan sala, napotaa to minaa, iamoto tu tarru’ maindan.

14La naala to minaa pira tu rara suru’ pangakuan sala anna raranni baba’ talinga kananna to la dipamasero sia iatu indo’ rakka’ lima kananna sia iatu indo’ rakka’ lentek kananna.

15La naala dukato minaa pira dio mai tu minna’ sanglogo, anna bolloanni rokko pala’ kairinna.

16Anna otonni to minna’ tu rakka’ lima kananna rokko minna’ diong pala’ kairinna, anna pa’pi’pikanni pempitu tu minna’ iato dio oloNa PUANG.

17Iatu minna’ torropa diong pala’na la nasussuan to minaa tu baba’ talinga kananna to la dipamasero, sia iatu indo’ rakka’ lima kananna sia iatu indo’ rakka’ lentek kananna, daona lu rara suru’ pangakuan sala.

18Iatu minna’ torropa diong pala’na to minaa la napalangngan ulunna to la dipamasero; susimoto tu to minaa umpadenanni kadiseroian kasalan dio oloNa PUANG.

19Mangkato la napasakka’ to minaa tu suru’ pengkalossoran sia umpadenan kadiseroian kasalan to la dipamasero dio mai kamaruttakanna, namane urrere’i tu pemala’ ditunu pu’pu’.

20Iatu pemala’ ditunu pu’pu’ sia kande dipemalaran la napemalaran to minaa dao inan pemalaran. La napadenan kadiseroian kasalan to minaa, anna masero.

21Apa iake bongkoi tu tau iato sia tae’ napa’bela, nang la umpaden misa’ domba diposuru’ pangakuan sala, la dipopemala’ disorong sia ditarima sule la umpadenanni kadiseroian kasalan, sisola epa sangtaa sangpulona ta’pung mani’sa’ dipasigerok minna’ sia misa’ logo minna’.

22Sia bu’ku’ duka da’dua ba’tu anak dangan-dangan da’dua sitinaya pa’belanna, iatu misa’ la diposuru’ pengkalossoran na iatu misa’ la dipopemala’ ditunu pu’pu’.

23La napopangalukan kadipamaseroanna, ke allo ma’pengkarua, anna baai lako to minaa dio to’ ba’ba Tenda Kasitammuan dio oloNa PUANG.

24La naala to minaa tu domba diposuru’ pangakuan sala sia iatu minna’ sanglogo, anna to minaa ussorongi sia untarimai sule la dipopemala’ disorong ditarima sule dio oloNa PUANG.

25Mangkato la narere’ tu domba diposuru’ pangakuan sala, sia naala to minaa pira tu rara suru’ pangakuan sala, nararanni tu baba’ talinga kananna tu to la dipamasero, sia iatu indo’ rakka’ lima kananna sia iatu indo’ rakka’ lentek kananna.

26Iatu minna’ pira la nabolloan to minaa rokko pala’ kairinna.

27Mangkato rakka’ kanannami to minaa unnalai tu minna’ diong pala’ kairinna napa’pi’pikanni pempitu dio oloNa PUANG.

28Iatu minna’ pira diong pala’na to minaa, la nasussuan tu baba’ talinga kananna to la dipamasero sia iatu indo’ rakka’ lentek kananna dio to’ inan rara suru’ pangakuan sala.

29Iatu minna’ torropa diong pala’na to minaa la napalangngan ulunna to la dipadenan kadiseroian kasalan dio oloNa PUANG.

30Mangkato la umpasakka’ misa’ bu’ku’ ba’tu misa’ dangan-dangan, iamotu apa sitinaya pa’belanna;

31iatu apa sitinaya pa’belanna, iatu misa’ la naposuru’ pengkalossoran sia iatu misa’na la napopemala’ ditunu pu’pu’ sisola kande dipemalaran; anna to minaa la umpadenanni kadiseroian kasalan tu to la dipamasero dio oloNa PUANG.

32Iamote tu atoran lako to narua golen tu tang pa’bela umpaden apa, sitinayanna kadipamaseroanna.

33Ma’kadami tu PUANG lako Musa sola Harun Nakua:

34Iake tamakomi tondok Kanaan, tu la Kukamaseangkomi la mipomana’, angKu pasae golen tama misa’ banua lan tondok mana’mi,

35la sae tu puangna banua umpokadanni to minaa anna ma’kada nakua: Dio to’ banuangku den kutiro susito golen.

36La mesua to minaa ullo’bangi dolo tu banua iato, namane sae to minaa untiroi tu saki kapua iato, kumua da namaruttak nasang tu apa lan banua; mangkato namane sae to minaa untiroi.

37La natiro tu saki kapua iato; ianna payan, kumua den saki kapua dio to’ rinding banua iato susito to’tok bitti’ maido-ido ba’tu mararang-rarang, tu kanaan ditiro mandu mandalan na rinding,

38la tassu’ tu to minaa lan mai banua iato unnola ba’ba, anna tutu’i tu banua iato pitung allo.

39Ianna ma’pitung allomo sae poleomi tu to minaa; iake natiroi tu iannato sia payan kumua iatu saki kapua manglalla’ dio to’ rinding banua iato,

40la mesua to minaa ussu’be’i tu batu narua saki kapua iato, anna tibei lako misa’ inan maruttak dio salian tondok.

41Sia la mesua ungkarrukki tu lanna lu banua iato tiku lao, na iatu losso’ pitti’ nakarrukki tau la mesua umbaai lako salian tondok sia umbolloanni rokko misa’ inan maruttak.

42Mangkato la mesua unnala batu senga’ nasondanni tu batu disu’be’i sia unnala losso’ pitti’ senga’ nasapuranni tu banua iato.

43Apa iake den pole’i tu saki kapua lan banua iato, ke mangkami nasu’be’i tau tu batunna sia nakarrukki tu banua iato sia nasapu’ kapu’,

44anna sae to minaa, natiroi sia payan kumua iatu saki kapua iato manglalla’ lan banua, manassa den golen masang lan banua iato, iamoto namaruttak ia.

45La narondonni tau tu banua iato, iatu mai batunna, sia kayunna sia mintu’ losso’ pitti’na banua iato, la nabaa tau lan mai kota lako misa’ inan maruttak.

46Minda-minda tama banua iato lan allo dinii untutu’i, maruttak tu tau iato sae lako makaroen.

47Sia minda-minda mamma’ lan banua iato la umbusukki tamangkalena sia minda-minda kumande lan banua iato, la umbusukki duka tamangkalena.

48Apa iake saei tu to minaa natiroi, anna payan kumua iatu saki kapua tae’ namanglalla’ lan banua iato tonna mangkamo disapu’ kapu’, la napamanassa to minaa kumua maseromo, belanna pa’demo tu saki kapua iato.

49La naala tu da’dua manuk-manuk, kayu arasi’, bannang karamisi sia supa, kumua anna seroi tu banua iato dio mai sala.

50Iatu misa’ manuk-manuk la narere’ dao kurin litak nanii uai kalimbuang.

51Sia naala tu kayu arasi’, supa, bannang karamisi sia iatu manuk-manuk tuopa, anna otonni tama to’ rara manuk-manuk direre’, tu sisola uai kalimbuang, anna pempi’pikanni pempitu lako banua iato.

52Susimoto la naseroi tu banua iato dio mai sala tete dio rara manuk-manuk, uai kalimbuang, manuk-manuk tuo, kayu arasi’, supa sia bannang karamisi.

53Sia iatu manuk-manuk tuo la narampanan namale mentia’ lako padang dio salian tondok; susimoto nanii umpadenanni kadiseroian kasalan tu banua iato, anna masero.

54Iamote tu atoran diona ma’rupa-rupa golen, sia diona kele dao ulunna tau,

55sia golen dio tamangkale sia dio lu banua,

56sia kambang, sia kele sia pans-

57la umpatudui kumua attu apa namaruttak tu tau sia attu apa namasero sule; iamote tu atoran diona golen.



 <<  Imamat 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel