Alkitab Mobile SABDA
[VER] : [TORAJA]     [PL]  [PB] 
 <<  Imamat 6 >> 

1Ma’kadami tu PUANG lako Musa Nakua:

2Iake denni misa’ tau umpogau’ kasalan sia tang maruru’ lako PUANG sia messakka’ lako sangtondokna tu diona apa dipopenanna, ba’tu apa dipa’pentoean lako kalena, ba’tu apa narampa, ba’tu untoro’ apanna sangtondokna,

3ba’tu urruru apa pa’de, anna messakka’ sia umpalao sumpa tang tongan diona apa-apa, tu napogau’ tau, tu nanii umpogau’ kasalan,

4iake umpogau’i kasalan susito, sia iake denni sala, la napasule tu apa narampa, ba’tu apa natoro’, ba’tu iatu apa dipopenanna lako kalena, ba’tu iatu apa pa’de anna rurui,

5ba’tu apa-apa tu nanii umpalao sumpa tang tongan. La napasulean ganna’ tu sondana sia la narangngannipa pissan taa pellimanna; anna pasulei lako puangna, iamotu allo nanii umpemalaranni tu pemala’na belanna kasalan.

6La napemalaran lako PUANG tu misa’ domba laki tang tattan dio mai domba sia bembe’, dibutunganni angga’na, naposuru’ pangakuan sala tu la dibaa lako to minaa diposuru’ pangakuan kasalan.

7Napadenanni kadiseroian kasalan to minaa dio oloNa PUANG, namane dipagarri’ tu diona mintu’ apa naposala.

Diona pemala’ ditunu pu’pu’

8Ma’kadami tu PUANG lako Musa Nakua:

9Pasanni tu Harun sia anakna kumua: Inde sia tu atoranna pemala’ ditunu pu’pu’. Iatu pemala’ ditunu pu’pu’ la torro dao dapo’ api daona lu inan pemalaran situ’turan bongi sae lako melambi’na, sia api dao inan pemalaran iato la tontong dukku.

10Iatu to minaa ma’bayu lenang lanna lu sia masseppa lenang nasamboan kalena; anna angka’i tu au pemala’ ditunu pu’pu’, to ke purami nakande pu’pu’ api, dao inan pemalaran, anna bolloanni dio sa’de inan pemalaran.

11Mangkato la nalendokan tu pakeanna, anna ma’pakean senga’, anna baai tassu’ tu au iato lan mai to’ tenda lako misa’ inan masero.

12Na iatu api dao inan pemalaran iato la tontong dikampai, da napa’de; melambi’oi la natutungoi to minaa tu kayu dao, anna dao kayu iato la nanii umpasirundunanni tu pemala’ ditunu pu’pu’ sia dao pemala’ ditunu pu’pu’ la nanii untunui tu mintu’ lompo pemala’ kasalamaran.

13Dao inan pemalaran iato la tontong dikampai tu api, tae’ nama’din pa’de.

Diona kande dipemalaran

14Inde sia tu atoranna kande dipemalaran. La napemalaran anakna Harun dio oloNa PUANG dio tingayo inan pemalaran.

15Na misa’ to minaa la unnala ta’pung manisak sangka’pan dio mai kande dipemalaran sia dio mai minnakna, sia dio mai mintu’ dupa, tu dao kande dipemalaran, anna tunu nasangi dao inan pemalaran, la dipobau busarungngu’ sia la dipopemala’ pengkilalan dipemalaran lako PUANG.

16Iatu torronapa la nakande Harun sola anakna: la dikande butung pa’ranggina tang diragii dio inan maindan, dio tarampak Tenda Kasitammuan la nanii tau iato mai ungkandei.

17La ditunu tang diragii; iamo taana tau iato mai tu Kubenni dio mai tu mintu’ pemala’ pantunu lako Kaleku; iamoto tu tarru’ maindan, susitu suru’ pengkalossoran sia iatu suru’ pangakuan sala.

18Mintu’ anakna Harun tu muane ma’din ungkandei; iamote tu misa’ apa matontongan dipondokangkomi la misiosso’i tu diona pemala’ pantunu dipemalaran lako PUANG: minda-minda ungkaka’i la maindan.

19Ma’kadami tu PUANG lako Musa Nakua:

20Inde sia tu pemala’, tu sipatu napemalaran Harun sola mintu’ anakna lako PUANG to allo dinii untokkoi, iamotu pissan taa sangpulona epa ta’pung manisak dipokande dipemalaran, sangsese ke melambi’, sangsese ke makaroen.

21La dikarang diong pamuntu sola minna’, la mupennoloan, ke mangkami dipasigerok, dipokande dipemalaran sia la mupemalaran ditepu-tepu la dipobau busarungngu’ lako PUANG.

22Iatu to minaa, tu la ditokko dio mai mintu’ anakna la ussondai la umpogau’i tu iannate; iamote tu misa’ apa dipondok matontongan; la ditunu pu’pu’ dipemalaran lako PUANG.

23Iatu mintu’ kande dipemalaran napopemala’ to minaa la ditunu pu’pu’, tae’ nala dikande to.

Diona suru’ pengkalossoran

24Ma’kadami tu PUANG lako Musa Nakua:

25Pokadai lako Harun sia lako mintu’ anakna kumua: inde sia tu atoran suru’ pengkalossoran: dio inan dinii untunu pemala’ ditunu pu’pu’, inde dukato la dinii untunui tu suru’ pengkalossoran dio oloNa PUANG, iamoto tu tarru’ maindan.

26Iatu to minaa umpemalaran suru’ pengkalossoran la nakande: la nakande dio inan maindan, iamotu dio tarampak Tenda Kasitammuan.

27Iatu mintu’ apa ke naruai duku’ iato, la maindan, sia iake den rarana untibura’i pakean, la dibusukki dio to’inan maindan.

28Iatu kurin mangka dipantollo’i duku’ iato, la ditesse, apa iake ditollo’ lanni kurin tambaga, la disussui sia la dibasei lan to’ uai.

29Mintu’ to minaa tu muane la ungkandei tu pemala’ iato, iamoto tu tarru’ maindan.

30Apa iatu mintu’ suru’ pengkalossoran tu dibaa rarana tama Tenda Kasitammuan la umpaden pengkalossoran lan bilik maindan, tae’ nama’din dikande to; la ditunu pu’pu’ iato.



 <<  Imamat 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran