Harun sola mintu’ anakna ditokko
1Ma’kadami tu PUANG lako Musa Nakua:
2Alami tu Harun sola tu mai anakna tu nasisolan, pakeanna, minna’ dipa’tokkoan, sapi laki tu diposuru’ pengkalossoran, tu da’dua domba laki sia baka nanii roti tang diragii,
3ammu tambai sirampun tu mintu’ kasirampunan dio to’ ba’ba Tenda Kasitammuan.
4Napogau’mi Musa susitu Napepasanan PUANG lako kalena, anna ditambai sirampun tu kasirampunan iato dio to’ ba’ba Tenda Kasitammuan.
5Ma’kadami tu Musa lako kasirampunan iato nakua: Iate apa dadi te, iamo apa Napepasanan PUANG la dipogau’.
6Nasuami Musa tu Harun sola tu mai anakna sae mengkareke’, nadio’i uai.
7Mangkato napapakeimi bayu lanna lu, naporii pepori aak, napapakei bayu lamba’, napapakei epo’ dio salian napadioi pepori epo’, anna porii.
8Mangkato napalakoimi pesambo ara’ sia napatamai pesambo ara’ tu Urim sia Tumim.
9Napassapui tu ulunna, anna palakoi dio tingayona passapu tu makota bulaan, iamotu makota maindan, susitu Napepasanan PUANG lako Musa.
10Naalami Musa tu minna’ dipa’minnakan, anna minna’i tu kema sia mintu’na lanna lu, anna pamaindanni.
11Iatu minna’ iato pempitu napa’pi’pikan inan pemalaran, sia naminna’i tu inan pemalaran sola mintu’ pareananna sia pembasean sola lette’na la umpamaindanni.
12Mangkato nabolloammi tu minna’ pa’tokkoan iato dao ulunna Harun sia natokko la umpamaindanni.
13Nasuami Musa tu mai anakna Harun sae mengkareke’, anna papakei bayu lanna lu, napori pepori aak sia natalii susitu Napepasanan PUANG lako Musa.
14Mangkato nasuami umpopengkareke’i tu sapi laki diposuru’ pengkalossoran, anna remme’i Harun sola tu mai anakna tu ulu sapi laki iato diposuru’ pengkalossoran.
15Natunumi anna otonni Musa tu rakka’na tama to’ rara, anna raranni tu tanduk inan pemalaran tiku lao sia naseroi dio mai kasalan tu inan pemalaran; iatu rara torronapa nabolloan diong to’ lette’ inan pemalaran; susimoto nanii umpamaindanni sia umpadenanni kadiseroian kasalan.
16Naalami tu mintu’ kampipi’na, balaan atena, tu bale’ke’na da’dua sola tu lompona dio, anna tunui Musa dao inan pemalaran.
17Apa iatu sapi laki sola balulangna, duku’na sia tai lanna tambuk barinni’na natunu pu’pu’ dio salian to’ tenda, susitu Napepasanan PUANG lako Musa.
18Mangkato napopengkareke’mi tu domba laki dipopemala’ ditunu pu’pu’, anna remme’i Harun sola tu mai anakna tu ulu domba laki iato;
19natunui, anna pa’pi’pikanni Musa inan pemalaran tiku lao tu rarana.
20Nata’tak-ta’takmi tu domba laki iato, anna tunui Musa tu ulunna, tu mintu’ pa’ta’takna sia iatu lompona.
21Apa iatu tambuk barinni’na sia gariginna nabasei, anna tunui Musa tu mintu’ domba laki dao inan pemalaran; iamoto tu misa’ pemala’ ditunu pu’pu’ dipobau busarungngu’, iamotu pemala’ pantunu, dipemalaran lako PUANG, susitu Napepasanan PUANG lako Musa.
22Napopengkareke’mi tu domba laki tu ma’penduanna, iamotu domba laki dipopemala’ pa’tokko naremme’i Harun sola tu mai anakna tu ulunna domba laki iato.
23Natunumi anna alai Musa tu rarana pira sia nasussui tu baba’ talinga kananna Harun, tu indo’ rakka’na lima kananna, sia indo’ rakka’na lentek kananna.
24Sia nasua mengkareke’ tu mai anakna Harun, anna sussui rara Musa tu baba’ talinga kananna, tu indo’ rakka’na lima kananna, sia indo’ rakka’na lentek kananna, na iatu rara torronapa napa’pi’pikan Musa inan pemalaran tiku lao.
25Naalami tu lompona, tu ikko’ malompona, mintu’ kampipi’na, balaan atena, tu bale’ke’na da’dua sola tu lompona dio sia tu pesese kananna.
26Sia lan mai baka nanii roti tang diragii tu dio oloNa PUANG, naala tu misa’ roti tang diragii, misa’ pa’ranggina tu dipasirau minna’ sia misa’ pa’ranggina manipi’, anna patoppo’i dao mintu’ lompo iato sia dao pesese kanan iato.
27Mintu’nato napatoppo’ dao limanna Harun sia dao limanna tu mai anakna, anna sorongi sia untarimai sule dipopemala’ disorong ditarima sule dio oloNa PUANG.
28Mangkato naala pole’omi Musa tu mintu’nato dao mai limanna tau iato mai, natunui dao inan pemalaran daona lu pemala’ ditunu pu’pu’; iamoto tu pemala’ pa’tokko, dipobau busarungngu’, iamotu pemala’ pantunu dipemalaran lako PUANG.
29Naalami Musa tu dada iato, anna sorongi sia untarimai sule, dipopemala’ disorong ditarima sule, dio oloNa PUANG; iamoto tu napotaa Musa dio mai domba laki dipa’tokkoan, susitu Napepasanan PUANG lako Musa.
30Sia naala Musa dio mai tu minna’ dipa’tokkoan sia dio mai tu rara dao inan pemalaran napa’pi’pikanni Harun sia pakeanna sia ia duka tu mai anakna sia pakeanna anakna; susimoto dinii umpamaindan Harun sia iatu mai pakeanna sia ia duka tu mai anakna sia pakeanna anakna.
31Ma’kadami tu Musa lako Harun sia lako tu mai anakna nakua: Tollo’i te duku’ iate dio to’ ba’ba Tenda Kasitammuan, inde to dio la minii ungkandei sola tu roti lan baka pemala’ pa’tokko, susitu Kupa’pepasanan kumua la nakande Harun sola tu mai anakna.
32Na iatu duku’ sia roti torronapa la mitunu mampu’.
33Tae’ mila mallai dio mai to’ ba’ba Tenda Kasitammuan lan pitung allo, sae lako ganna’na tu allo, iamotu allo dinii untokkokomi belanna lan pitung allo la dinii untokkokomi.
34Susitu dipogau’na allo iate, susi dukamoto mesua tu PUANG la umpogau’i tu allo undinna, la umpadenangkomi kadiseroian kasalan.
35La torrokomi dio to’ ba’ba Tenda Kasitammuan la allona la bonginna lan to pitung allo, sia la ungkaritutuikomi atoranNa PUANG, da mimate, belanna susimoto tu dipepasanan lako kaleku.
36Napogau’mi Harun sola tu mai anakna tu mintu’ apa Napepasanan PUANG nalopian Musa.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel