Iatu to minaa umparandukmo untoe pentoeanna
1Iatonna allo ma’pengkaruamo natambaimi Musa tu Harun sola tu mai anakna sia mintu’ pekaamberan to Israel sirampun.
2Ma’kadami lako Harun nakua: Alangko kalemu misa’ anak sapi iamotu misa’ sapi mangura, la diposuru’ pengkalossoran, sia misa’ domba laki la dipopemala’ ditunu pu’pu’, tu tae’ tattanna, ammu pennoloanni lako PUANG.
3Sia la mupokada lako mintu’ to Israel kumua: Alakomi misa’ bembe’ laki diposuru’ pengkalossoran, sia misa’ anak sapi sia misa’ domba tu sangtaunmo sia tae’ tattanna la dipopemala’ ditunu pu’pu’.
4Sia misa’ sapi sia misa’ domba la dipopemala’ kasalamaran, la dipemalaran dio oloNa PUANG, sola misa’ kande dipemalaran dipasigerok minna’, belanna allo iamote Nala sombo tu PUANG lako kalemi.
5Nabaami tau iato mai tu mintu’ apa napepasanan Musa sae lako to’ Tenda Kasitammuan, anna sae mengkareke’ tu mintu’ kasirampunan iato, sia bendan dio oloNa PUANG.
6Ma’kadami tu Musa nakua: Inde sia tu apa Napepasanan PUANG lako kalemi ammi pogau’i, kumua anna sombo tu kamala’biranNa PUANG lako kalemi.
7Ma’kadami tu Musa lako Harun nakua: Mengkareke’ko lako inan pemalaran sia parandanmi tu suru’ pengkalossorammu sia pemala’ ditunu pu’pu’mu sia padenanni kadiseroian kasalan tu kalemu sia bangsa iato; mangkato mumane umparandanni tu pemala’na bangsa iato, ammu padenanni kadiseroian kasalan susitu Napepasanan PUANG.
8Mengkareke’mi tu Harun lako to’ inan pemalaran, anna tunui tu anak sapi la naposuru’ pengkalossoran kalena.
9Nabaami anakna Harun tu rara iato lako anna otonni tu rakka’na tama to’ rara iato nararanni tu tanduk inan pemalaran; na iatu rara torronapa nabolloan lako to’ lette’ inan pemalaran.
10Apa iatu lompona sia iatu bale’ke’na sia iatu balaan atena suru’ pengkalossoran natunu dao inan pemalaran susitu Napepasanan PUANG lako Musa.
11Apa iatu duku’na sia balulangna natunu mampu’ dio lu salianna to’ tenda.
12Mangkato natunumi tu pemala’ ditunu pu’pu’, anna tadoanni anakna Harun tu rarana lako ambe’na, anna pi’pikki tu inan pemalaran tiku lao.
13Natadoan duka tu pemala’ ditunu pu’pu’, tu dita’tak-ta’tak sisola tu ulunna, anna tunu nasangi dao inan pemalaran.
14Nabaseimi tu tambuk barinni’na sola tu gariginna, anna tunui dao pemala’ ditunu pu’pu’ daona lu inan pemalaran.
15Mangkato napemalarammi tu pemala’na bangsa iato; naalai tu bembe’ laki la diposuru’ pengkalossoranna bangsa iato, anna tunui sia naparandanmo diposuru’ pengkalossoran, susito bunga’na dipogau’.
16Napemalarammi tu pemala’ ditunu pu’pu’, anna karangi situru’ tu atoranna.
17Mangkato mesuami umbaai tu kande dipemalaran, anna alai sangka’pan, anna tunui dao inan pemalaran napasituru’ tu pemala’ ditunu pu’pu’ melambi’.
18Natunu dukami tu sapi sia iatu domba laki la dipopemala’ kasalamaranna bangsa iato, anna anakna Harun untadoanni tu rara iato, anna pi’pikanni inan pemalaran tiku lao.
19Apa iatu mintu’ lompo sapi sia ikko’ malompona domba laki, sola tu kampipi’na sia iatu bale’ke’na sia iatu balaan atena,
20mintu’ te lompo tiira’mo napatoppo’ dao dada dita’tak-ta’tak, anna tunui tu mintu’ lompo iato dao inan pemalaran.
21Iatu dada dita’tak-ta’tak sia iatu pesese kanan nasorongi sia natarimai sule Harun dipopemala’ disorong ditarima sule dio oloNa PUANG, susitu mangka napepasanan Musa.
22Naangka’mi Harun tu limanna daona lu bangsa iato anna passakkei; mangkato mengkalaomi, tonna mangka umpemalaranni tu suru’ pengkalossoran, sia iatu pemala’ ditunu pu’pu’ sia pemala’ kasalamaran.
23Malemi tama Tenda Kasitammuan tu Musa sola Harun, anna tassu’ sule umpassakkei tu bangsa iato, anna sombo tu kamala’biranNa PUANG lako bangsa iato.
24Tassu’mi tu api dio mai oloNa PUANG ungkandei tu pemala’ ditunu pu’pu’ sia iatu mintu’ lompo tiira’na dao inan pemalaran; iatonna tiromi bangsa iato tu iannato, siarrakammi anna tukku sae rokko padang.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel