Yusuf dio banuanna Potifar sia diona kaditarungkuanna
1Iatu Yusuf nabaa tau lako Mesir, na iatu Potifar, parea mase’ponna Firaun, pangulu pekampa tongkonan layuk, iamo misa’ to Mesir mangka unnallii dio mai to Ismael, tu to umbaai rokko.
2Iatu Yusuf Narondong PUANG naurunganni maupa’ lan mintu’na sia torro mengkarang lah banuanna puangna, iamotu to Mesir.
3Iatonna tiroi puangna Narondong PUANG sia PUANG umpamaupa’i tu mintu’ napogau’na tete dio Yusuf,
4naporaimi tu Yusuf, nasuai umparakai sia nadullu umpoissan mintu’ barang apa nasorong lako Yusuf.
5Tonna mangka undullui la umpoissan apa lan banuanna sia mintu’ tu naampuinna, Napamasakkemi PUANG tu lanna banuanna to Mesir iato, belanna diona Yusuf, ondongpi Napamasakke PUANG tu mintu’ apa naampui la daona banua, la diona lu padang.
6Mintu’ tu naampuinna nasorong tama limanna Yusuf, naurunganni tae’mo na ia umpoissan lenni sangadinna ia mannamo tu kande nakande lu rokko. Iatu Yusuf melo pa’kaleanna sia melo tu pantarisanna.
7Denmi pissan tonna mangkamo tu mintu’nate mailu matami lako Yusuf tu bainena puangna nama’kada nakua: Tasangampa’.
8Apa noka tu Yusuf anna ma’kada lako bainena puangna nakua: Iatu puangku tae’mo angku sola umpoissanni tu mintu’ apa lan banua, sangadinna iatu mintu’ apa naampui mangkamo nasorong tama limangku.
9Ia duka ia tu ia lan te banua tae’ anna mandu madoan na aku sia mintu’ barang apa tae’ napasalian lako kaleku sangadinna kamu manna, belanna bainenakomi; ma’apai angku la umpogau’i te kakadakean kapua sia kasalan langngan Puang Matua!
10Moi nakuan bang tu Yusuf kiallo-kiallo tae’ duka naperangii la sangampa’ ba’tu la lako kalena.
11Denmi sangallo namale tu Yusuf tama banua la ungkarang pengkaranganna, na iatu mintu’ tau lan banua tae’ misa’ dioren nasolan.
12Nala’ka’imi baine iato tu bayu lamba’na nakuanni: Tasangampa’! Apa nalendokan Yusuf tu bayu lamba’na tu manda’ lan limanna baine iato, namallai sun.
13Iatonna tiromi tu baine iato natampemo Yusuf tu bayu lamba’na lan limanna sia mallaimo sun,
14natambaimi tu mintu’ tau lan banuanna nama’kada lako nakua: Tiromi, nabaangki’ sae te to Ibrani, la umpaningo-ningoiki’, belanna sae lako kaleku la ussangamparanna’, apa metambana’ umpekapuai gamarangku.
15Iatonna rangimi kupekapuai tu gamarangku metamba, natampemi tu bayu lamba’na dio to’ sa’deku namallai sun.
16Napadio bangmi to’ sa’dena tu bayu lamba’na Yusuf sae lako saena tu puangna.
17Napokadami lako tu mintu’na kada iato, nakua: Iate kaunan to Ibrani tu mubaangkan sae, sae lako kaleku umpaningoina’.
18Iatongku metamba umpekapuai gamarangku, natampemi tu bayu lamba’na dio to’ sa’deku anna mallai sun!
19Iatonna rangimi puangna Yusuf tu mintu’ kadanna bainena tu napokada lako, nakua: Susimoto tu penggauranna kaunanmu lako kaleku, re’dekmi tu ara’na.
20Naalami puangna tu Yusuf napatamai pa’tarungkuan tu dinii duka untarungku taunna datu tu dirante bassinna. Indemito tu Yusuf lan pa’tarungkuan.
21Apa Narondong PUANG tu Yusuf, anNa pa’kamaseanni sia Napabu’tu lan penaanna pangulu pa’tarungkuan tu kamamasean lako Yusuf, naurunganni naporai.
22Nasorongi pangulu pa’tarungkuan tama limanna Yusuf tu mintu’ to ditarungku, na iatu mintu’ apa la napogau’, naissanpi Yusuf.
23Tae’ napasalai bangi mata pangulu pa’tarungkuan tu apa napoissan Yusuf, belanna narondong PUANG sia iatu apa napogau’ Napamaupa’ duka PUANG.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel