Penanianna Musa dio biring tasik Teberau
1Attu iato napenaniammi Musa sola to Israel tu nanian iate umpudi PUANG, nakua: La menanina’ umpudi PUANG, belanna matande tongan tu kamala’biranNa, Napembuangan tu darang sia to ussakei tama tasik.
2PUANGmo tu oto’na kamatotorangku sia oto’na pa’pudiangku, Nanii bu’tu kamakarimmanangku. Iamo Kapenombangku, Iamoto angku la umpangke’i, Iamo Kapenombanna ambe’ku, iamoto angku la umpudii.
3PUANGmo tu To lalong lan Kasirarian; PUANG, iamoto tu sanganNa.
4Mintu’ karetana Firaun sia mintu’ petoe kassa’na Napembuangan tama tasik; sia mintu’ lalong pa’tonno’na dao kareta dilammu’ tama tasik Teberau.
5Tau iato mai nasamboi tasik kalua’; sia butung to batu tallanmo rokko liku mandalan.
6O PUANG, mala’bi’ tu lima kananMi diona kamatotoran, O PUANG, lima kananMi unnisak-nisakki tu uali iato.
7Tete dio kamala’biran kapuaMi, amMi sanggangi tu mintu’ to pabali-bali lako kalemi; Mipalalomo tu kasengkean maparrangMi, anna mampu’i tu tau iato mai butung ta’pian.
8Diona angin sun dao mai illongMi anna dipopa’patuku-tuku tu uai; sia iatu uai saba’ tulangdan susi sapan, sia mintu’ bombang makko lan atena tasik.
9Ma’kadami tu uali, nakua: La mangula’na’, la kupellambi’i, la untaa-taana’ pangrampa; iatu penaangku la kupatosso lako tau iato mai sia la unnonokna’ la’bo’ku; limangku la ussanggangi tu tau iato mai.
10Apa Kamu umpa’pamurrusan penaanMi, anna samboi tasik tu tau iato mai; tallanmo tu tau iato mai butung tumarra rokko uai mongngo’.
11O, PUANG, iatu mintu’ deata mindara tu la ussitinti-batuangKomi, mindara tu susimMi, dipatarompo’ tete dio kamaindanan, metakuran tete dio penggauran kapudian, tu umpogau’ tanda kalle-kallean.
12Mane unnangka’Komi lima kananMi, naampello’mi kuli’na padang tu tau iato mai.
13Belanna kamaturu-turuamMi Misolanni te bangsa iate, tu Milendokan; Sia tete dio kamatotoramMi amMi paela’ mana’pai lako inan maindanMi.
14Napelelemi tu mai bangsa, anna sipa’parondoan; narampoimi kapa’pagegean tu pa’tondokan Filistin.
15Attu iato tirambanmi pangulunna Edom, narampoimi kapa’pagegean tu mintu’ to paa dio Moab, iatu pa’tondokan Kanaan sipa’parondo-rondoan.
16Narampoimi kamatakuran sia katirambanan tu tau iato mai, tang tilento ten to batu tete dio takia’ mawatangMi, anna tarru’ bang lumingka tu mintu’ taumMi, o PUANG, anna tarru’ bang lumingka tu mintu’ taumMi, tu Miappa’.
17Kamu ussolanni tama tu tau iato mai, amMi patunannangi dao buntu mana’Mi; o PUANG, dio inan Mipadadi kao’koramMi, dio inan maindan, tu Mipabendan, o Puang.
18Iatu PUANG ma’parenta tontong sae lakona.
19Iatonna saemo tu mintu’ darangna Firaun sola karetana sia pakkanarangna tama tasik, Napalolong sulemi PUANG tu uai tasik lako tau iato mai, apa iatu to Israel unnola karangkean lan tangnga tasik iato.
20Naalami Miryam, nabi baine, anak daranna Harun tu ganda’-ganda’, anna tassu’ tu mintu’ baine unturu’i, anna undedek ganda’-ganda’ sia ma’gellu’.
21Natindokmi Miryam tu penanianna tau iato mai, nakua: Menanimokomi umpudi PUANG, belanna matande tongan tu kamala’biranNa; Napembuangan tu darang sia to ussakei tama tasik.
To Israel ke’de’ dio mai tasik Teberau lako Elim
22Mangkato nasuami Musa tu to Israel ke’de’ dio mai tasik Teberau, anna male ma’palulako padang pangallaran Syur; lumingkami lan padang pangallaran tallung allo apa tae’ naappa’ uai.
23Rampomi tu tau iato mai lako Mara, apa iatu uai dio Mara tae’ nadiiru’ belanna mapai’, iamoto nasangai tau Mara.
24Attu iato sipa’nuku-nukuammi tu tau iato mai lako Musa, nakua: Apara la kiiru’?
25Meongli’mi tu Musa lako PUANG, Napadulluanni PUANG misa’ kayu, nabuangi tama uai iato, anna malino. Indemo to dio Nanii umpokadanni tu tau iato mai tu aluk Napondok sia atoran sia inde dukamoto Nanii untobai.
26Sia ma’kadapa tu Puang, Nakua: Iake muperangii tonganni tu kadanNa PUANG, Kapenombammu sia mupogau’ tu apa malambu’ dio oloNa sia mutananni talinga duammu tu mintu’ pepasanNa sia mukaritutui tu mintu’ apa Napondok, manassa mintu’ tu saki Kupata’pa lako to Mesir, moi misa’ tae’ la Kupata’pa lako kalemi, belanna Akumo PUANG, To ma’dampimmu!
27Rampomi tu tau iato mai lako Elim; inde to dio den sangpulo dua kalimbuang boba sia pitungpulo koroma, anna ma’tenda inde to sikandappi’ to’ uai.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel