Diona garaganna inan pemalaran pantunuan
1Iatu inan pemalaran pantunuan, kayu simmin nagaragai limang siku tu lambe’na, na limang siku duka tu sangka’na, massulapa’ a’pa’, na tallung siku tu langka’na.
2Nagaragaimi tu tandukna dio to a’pa’ lentekna sia iatu tandukna dipasikande ditampa nakallasa’i tambaga.
3Nagaragaimi tu mintu’ pareanan inan pemalaran iato, iamotu mai kurinna sia pesanglena sia pindan pa’pi’pikanna sia petossokna sia peruayanna: iatu mintu’ pareanan iato tambaga nagaragai.
4Nagaragampa sala’bi’ susi dalla’ sae lako tangana diongna lu biringna.
5Napati’noranni komba a’pa’ tu a’pa’ tetuk sala’bi’, dinii unnulu pebulle.
6Iatu pebulle kayu simmin nagaragai anna kallasa’i tambaga.
7Naulumi tu pebulle tama to komba dio sa’dena inan pemalaran patomali, dinii umbullei; inan pemalaran iato lo’bang, papan nagaragai.
Diona garaganna pembasean
8Iatu pembasean tambaga nagaragai, na iatu lentekna tambaga duka, samminna baine untoe toean dio ba’ba tenda kasitammuan, tu digaragai.
Diona garaganna kulambu tarampak
9Nagaragaimi tu tarampakna; iatu rampe sau’na digaragan tenda lenang melo dikaridi’ saratu’ siku lambe’na;
10iatu lentongna duangpulo dilette’i tambaga duangpulo, na iatu mintu’ pekadangna lentong iato sia mintu’ tokeranna salaka digaraga.
11Rampe rekkena digaragan tenda saratu’ siku lambe’na; iatu lentongna duangpulo dilette’i tambaga duangpulo, na iatu mintu’ pekadangna lentong iato sia tokeranna salaka digaraga.
12Iatu rampe matampu’na digaragan tenda limangpulo siku lambe’na; iatu lentongna sangpulo dilette’i tambaga sangpulo, na iatu mintu’ pekadangna lentong iato sia mintu’ tokeranna salaka digaraga.
13Iatu rampe matallona digaragan duka tenda limangpulo siku lambe’na.
14Iatu sangsesena digaragan tenda sangpulo lima siku lambe’na situang lentongna tallu sia tallu lette’na.
15Iatu sangsesena – patomalinna ba’ba tarampak iato nanii tenda – digaragan tenda sangpulo lima siku lambe’na, situang lentong tallu sia tallu lette’na.
16Iatu mintu’ tenda untikui tarampak iato bannang lenang melo dikaridi’, digaragai.
17Mintu’ tu lette’ lentong iato tambaga digaraga, na iatu pekadangna na tokeranna salaka sia iatu kallasa’ sarongna salaka duka. Mintu’ lentong tarampak iato dipasikande ba’tu pira-pira tokeran salaka.
18Iatu kulambu ba’ba tarampak pa’tannun paruki’, bannang lango-lango sia lango-lango makaseda sia karamisi sia bannang lenang melo dikaridi’ tu digaragai; duangpulo siku lambe’na, na iatu langka’na pada bangsia sangka’na tu pa’tannun limang siku, sipatu tu mintu’ tendana tarampak iato.
19Iatu lentong a’pa’ sola tu lette’na a’pa’ tambaga digaragai; na iatu pekadangna sia sarongna daona lu sia tokeranna salaka.
20Iatu petangki’ kema sia petangki’ tarampak tiku lao tambaga digaragai.
Diona mintu’ ianan dipopareanan dio kema
21Iamote tu bilanganna tu mintu’ pareanan kema, iamotu kema kasa’bian tu napa’peiaran Musa lako to Lewi, napangului Itamar, anakna Harun, to minaa.
22Nagaragaimi Bezaleel, anakna Uri tu nadadian Hur, dio mai suku Yehuda tu mintu’ pareanan Napepasanan PUANG lako Musa.
23Iatu nasangayokan iamotu Aholiab anakna Ahisamakh dio mai suku Dan, to pande sia pande paliu sia manarang ma’tannun paruki’ dio mai bannang lango-lango sia lango-lango makaseda sia karamisi sia lenang melo.
24Mintu’na bulaan dipake dio tu pengkarangan ditoe unggaragai inan maindan, iamotu mintu’ bulaan pemala’ pangurrande disorong anna ditarima sule, timbanganna duangpulo ngkasera talenta pituratu’ ntallungpulo sikele’ pada timbanganna sikele’ masero.
25Iatu salakana mintu’ to diia’ lan kasirampunan iato, timbanganna saratu’ talenta sangsa’bu pituratu’ pitungpulo llima sikele’ pada timbanganna sikele’ masero.
26Misa’ tau misa’ beka, iamo sangtangnga sikele’, pada timbanganna sikele’ maindan, dio mai mintu’ to naala bilangan, tu siduangpulomo taun dadinna ba’tu la’bi; mintu’nato den annan ratu’ ntallu sa’bunna limaratu’ llimangpulo.
27Saratu’ talenta salaka dipati’noranni tu mintu’ lentek inan maindan sia iatu kulambu; saratu’ lentekna saratu’ talenta dipake, simisa’ lentek namisa’o talenta.
28Iatu sangsa’bu pituratu’ pitungpulo llima sikele’ nagaraga pekadang lentong, nakallasa’ salaka tu sarongna sia nagaragan tokeran.
29Iatu mintu’ tambaga pemala’ pangurrande disorong anna ditarima sule, timbanganna pitungpulo talenta duangsa’bu nna’pa’ratu’ sikele’.
30Iamoto tu digaragai mintu’ lentek ba’ba tenda kasitammuan, sia inan pemalaran tambaga sia sala’bi’ tambaga tu untikui sia mintu’ pareanan inan pemalaran.
31Sia mintu’ lentek tenda tarampak tu untikui sia mintu’ lentek ba’ba tarampak, sia iatu mai petangki’ kema sia mintu’ petangki’ tenda tarampak untikui.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel