Alkitab Mobile SABDA
[VER] : [TORAJA]     [PL]  [PB] 
 <<  Mazmur 74 >> 

To’doan uai mata diona kasangganganna Banua kabusungan

1Misa’ gelong bangunan ada’na Asaf. O Puang Matua, apa bannangna amMi tibemorakanni tontong sae lakona? Sia apa bannangna anna re’dekra tu ara’Mi lako mintu’ domba Miparibala?

2Kilalai tu kombongamMi, tu mangka Mipolean tempon dio mai, sia mangka Mipopentorro to makaka la Mipogarempong mana’, sia iatu buntu Sion, inan Minii torro.

3Umpatiangka’Komi bate lalanMi sae untiroi tu kasanggangan tang pasule-suleanna; a’a, mintu’ tu lanna inan maindan nasolang-solang uali.

4Mintu’ to unneaKomi melalla-lalla lan tangnga kombongamMi, sia umpabendan rapang-rapang napodeata la napotoding minanga.

5Iatu iannato takua to tau untadedangan uasena la umbela’ pangala’-ala’:

6Anna tesse-tesse nasangi tu mintu’ pareanan disura’, unnoong uase sia pepa’tong.

7Naballa api tu inan maindanMi, sia naruttakki tu banua nanii sangamMi sae lako padang.

8Nakua tu tau iato mai lan penaanna: Malekomi mai anta sabu’i nasangi tu mati’ tau! Naballa nasangmi tu banua passambayangan lako Puang Matua lan tana iate.

9Tae’mo tandaki kitiro, tae’ bangmo misa’ nabi, sia tae’ bangkan misa’ unnissanni, kumua ba’tu la sangapapa te iannate.

10O Puang Matua, sangapapakan la natelle tu mati’ to unneakan? Sia la tontong bangraka tu uali la untunai sangamMi?

11Ma’apari amMi kondoranni tu limamMi, iamotu lima kananMi? Benanni tu limamMi, amMi sabu’i tu tau iato mai.

12Apa iatu Puang Matua iamo Datungku tempon dio mai, tu umpabu’tu kadilendokan lan te lino.

13Diona kuasamMi amMi mangka umballak tasik, sia untesse ulunna mintu’ naga lan to’ uai.

14Mangkamo Minisak-nisak tu mintu’ ulunna Lewiatan, sia Miben olo’-olo’ dio lu padang pangallaran tu duku’na la napotuo.

15Kamumo umpabu’tu kalimbuang sia umpalolong uai salu, sia umpamarangke salu kapua.

16Kamumo ampunna tu masiang sia Kamumo tu ampunna bongi; Kamumo tu umpatorroi inanna tu arrang sama lele sola batunna kulla’.

17Kamumo mangka untori’ lili’ lino, sia Kamu dukamo umpondok pealloan sia attu kamadinginan.

18O PUANG, kilalai tu diona uali untelleKomi, sia bangsa tae’ pa’inaanna untunai sangamMi.

19Da Misorongi tu bannang penaanna bu’ku’Mi lako olo-olo’ masuru; sia da Mitontong bang ungkalupai tu taumMi tu dipandasa.

20Kilalai tu diona basse, belanna mintu’ inan mapattang lan lino nanii nasangmo inanna to ma’pandasa.

21Da’ maro’ anna sule masiri’ tu to dipakario-rio, sia iatu mintu’ to mandasa sia to mase-mase la umpudi sangamMi.

22Ke’de’Komi, o Puang Matua, amMi pasombo katonganamMi, kilalai umba nakua tu to baga ullangdoKomi kiallo-kiallo.

23Sia da Mitang ungkilalai tu arrakna ualimMi, belanna iatu angnga’na to umbaliKomi tontong bangmo kendek langngan.



 <<  Mazmur 74 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran