Alkitab Mobile SABDA
[VER] : [TORAJA]     [PL]  [PB] 
 <<  Nehemia 12 >> 

Luntara’na to minaa sia to Lewi

1Inde sia tu mintu’ to minaa sia to Lewi, tu ke’de’ sola Zerubabel, anakna Sealtiel sia Yesua, iamotu Seraya, Yeremia, Ezra.

2Amarya, Malukh, Hatus,

3Sekhanya, Rehum, Meremot,

4Ido, Ginetoi, Abia,

5Miyamin, Maaja, Bilga,

6Semaya, Yoyarib, Yedaya,

7Salu, Amok, Hilkia na Yedaya, mintu’nate iamo pangulu tominaa sia mintu’ siulu’na tonna linona Yesua.

8Na iatu to Lewi, iamotu Yesua, Binui, Kadmiel, Serebya, Yehuda na Matanya. Tau iamote sola mintu’ siulu’na ullopian torroan to menani.

9Iatu Bakbukya na Uni, siulu’na tau iato mai bendan sitingoan menani lan kamenomban.

10Iatu Yesua undadian Yoyakim; Yoyakim undadian Elyasib; Elyasib undadian Yoyada;

11Yoyada undadian Yonatan; Yonatan undadian Yadua.

12Iatonna linona Yoyakim iami to minaa, tu pangulunna rapu: dio rapunna Seraya, iamotu Meraya; dio mai Yeremia, iamotu Hananya,

13dio mai Ezra, iamotu Mesulam; dio mai Amarya, iamotu Yohanan;

14dio mai Melikhu, iamotu Yonatan; dio mai Sebanya, iamotu Yusuf;

15dio mai Harim iamotu Adna; dio mai Merayot, iamotu Helkai;

16dio mai Ido, iamotu Zakharia; dio mai Gineton, iamotu Mesulam;

17dio mai Abia, iamotu Zikhri; dio mai Minyamin, dio mai Moaja, iamotu Piltai;

18dio mai Bilga; iamotu Samua; dio mai Semaya, iamotu Yonatan;

19dio mai Yoyarib, iamotu Matnai; dio mai Yedaya, iamotu Uzi;

20dio mai Salai, iamotu Kalai; dio mai Amok, iamotu Heber;

21dio mai Hilkia, iamotu Hasabya; dio mai Yedaya, iamotu Netaneel.

22Iatu to Lewi tonna linona Elyasib, Yoyada, Yohanan na Yadua, disura’ tu pangulu rapunna; na mintu’ to minaa tonna kadatuanna Darius, to Persia.

23Iatu bati’na Lewi, iamotu mintu’ pangulu rapu disura’mo lan sura’ ossoran, sae lako linona Yohanan, anakna Elyasib.

24Iatu pangulunna mintu’ to Lewi, iamo Hasabya, Serebya, na Yesua, anakna Kadmiel; iatu mintu’ siulu’na, tu bendan sitingoan, ma’dandanan siamping sisanglaoan, la umpakendek pa’pudi-pudian sia nanian pa’tendeng, situru’ tu pepasanna Daud, taunNa Puang Matua,

25iamotu Matanya, Bakbukya na Obaja. Iatu to ma’kampa babangan, iamotu Mesulam, Talmon na Akub, tu ungkampai bilik pa’palumpunan lan babangan.

26Mintu’nate sangbara’ linona Yoyakim, anakna Yesua, anakna Yozadak sia Nehemia, to maraa, sia Ezra, tominaa sia pandita sura’.

Rinding tembo’ Yerusalem dirara

27Iatonna dirara tu rinding tembo’ Yerusalem ditambaimi tu mintu’ to Lewi dio mai mintu’ inanna male lako Yerusalem, anna pogau’ pa’gauran mangrara sia umpopenani pa’pudi-pudian sia penanian napasiala taa’-taa’, dandi na katapi.

28Sirampunmi tu mintu’ to menani la dio mai lili’na Yerusalem, la dio mai mintu’ kampongna to Netofa,

29sia dio mai Bet-Gilgal sia padang nalili’ Geba sia Asmawet, belanna mintu’ to menani ma’tondokmo untikui Yerusalem.

30Usseroimi kalena tu mintu’ tominaa sia to Lewi, namane usseroi tu to buda, sia mintu’ babangan sia rinding tembo’.

31Mangkato kusuami tu mintu’ pangulu to Yehuda kendek langngan rinding tembo’ sia kupaduang torroan tu to menani, sia kusua male sumonglo’; sangtorroan ma’palulako kanan unnola tembo’, lu lako babangan Au.

32Undimi naturu’ Hosaya sia sesena pangulu to Yehuda;

33sia Azarya, Ezra na Mesulam;

34Yehuda, Benyamin, Semaya na Yeremia.

35Ba’tu pira-pira passikola to minaa tu umbaa tarompe’, iamotu Zakharia, anakna Yonatan, anakna Semaya, anakna Matanya, anakna Mikha, anakna Zakur, anakna Asaf;

36sia mintu’ siulu’na, iamotu Semaya, Azareel, Milalai, Gilalai, Maai, Netaneel, Yehuda na Hanani, umbaa oni-onianna Daud, taunNa Puang Matua. Na iatu Ezra, pandita sura’, male undoloanni.

37Iatonna lendu’mo dio to’ babangan Kalimbuang, kendekmi langngan unnola eran kotana Daud dio tingayona, tu nanii rinding tembo’ ma’palulangngan, ullendu’i tongkonan layukna Daud, nake’de’ tu tau iato mai sae lako babangan Uai dio rampe matallo.

38Iatu sangtorroan to menani tu ma’penduanna, tu male senga’ sitingoan tu misa’na sia undi kuturu’ sola tu sesena to buda, unnola rinding tembo’ ullendu’i menara Panglallangan sae lako rinding tembo’ kalua’;

39ullendu’i babangan Efraim, babangan Tua na babangan Bale sia ullendu’i menara Hananeel sia menara Mea sae lako babangan Domba; tadangmi tu tau iato mai dio babangan Tarungku.

40Iatu to menani duang torroan bendan lan banuanNa Puang Matua; ia duka tu aku sia sesena pangulu kusisolan,

41sia tominaa Elyakim, Maaseya, Minyamin, Mikhaya, Elyoënai, Zakharia, na Hananya umba tarompe’;

42sia iatu Maaseya, Semaya, Eleazar, Uzi, Yohanan, Malkia, Elam na Ezer. Iatu to menani umpa’perangian gamaranna naindoran Yizrahya.

43Allo iato napemalaran tau iato mai tu pemala’ buda; anna siparannu-rannuan, belanna Napaparannu tongan Puang Matua tu penaanna; ia duka tu mai baine sia iatu mai pia parannu-rannu, naurunganni iatu kaparannuanna tau lan Yerusalem mambela nanii karangian.

Atoran diona ungkampai pa’duruk

44Allo iato dipamanassami tu ba’tu pira-pira to ungkapalai bilik pa’palumpunan, tu nanii apa dirampun, iamotu pa’duruk, bunga’na bura padang sia patuoan na taa sangpulona mintu’ apa; na inde to dinii umpasirampunni tu pa’duruk dipamanassamo lan sukaran aluk, nadisorong lako to minaa sia to Lewi, sitinaya kakapuanna pa’lak sikandappi’ kota, belanna iatu to Yehuda umpoparannui tu to minaa sia to Lewi, tu umpogau’ kamenomban.

45Belanna nakaritutui tongan tu kapengkaolanna lako Kapenombanna sia kausseroianna mintu’ tau sia mintu’ barang apa; susi dukato tu to menani sia to ma’kampa babangan unturu’ pepasanna Daud sia Salomo, anakna muane.

46Belanna tempon diopa mai linona Daud sia Asaf naranduk den tu to menani sia nanian umpudi sia untendeng Puang Matua.

47Iatonna linona Zerubabel sia linona Nehemia iatu mintu’ to Israel ussorong pa’duruk lako to menani sia to ma’kampa babangan, pada tu parallunna kiallo-kiallo; sia nasorong tu pamengan maindan lako to Lewi, anna to Lewi ussorongi lako bati’na Harun.



 <<  Nehemia 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel