Bungkaran kada
1Inde sia tu kadanna Tomangada’, anakna muane Daud, datu dio Yerusalem.
Mintu’na apa lan te lino tae’ gai’na
2Tae’ liu gai’na, kadanna Tomangada’, tae’ liu gai’na! Mintu’na tae’ nasang gai’na!
3Apara sarona tu tolino lan mintu’ ra’ta’na, tu nakara’ta’i, lan naarrang matanna allo?
4Sangosso’ male, sangosso’ pole’o sae, apa iatu lino tontong bang tumanan.
5Iatu mataallo bu’tu sia lambun, sia seka-seka ma’dondo lako to’ inan nanii bu’tu.
6Iatu angin mangiri’ ma’palusau’, namane tibalik ma’palurekke, natontong male mengguririk, nasuleo dio pengguririkanna.
7Iatu mintu’ salu lolong tama tasik, apa tae’ naponno len tu tasik; iatu naninna salu lolong, inde dukato nanii tontong lolong.
8Iatu mintu’na apa mepamata’ka’, tang dikemba’ disa’bu’; iatu mata tang namoso mentiro sia iatu talinga tang naponnoi pa’peranginna.
9Iatu apa denmo dolona, ia dukato tu la den; sia iatu apa dipogau’mo, ia dukato tu la dipogau’; moi misa’ tae’ tu ba’runna lan naarrang matanna allo.
10Iake den misa’ apa tu napokada tau: Tiromi, iamote tu ba’ru – inang denmo ia dolo-dolona to na linota.
11Pa’demo tu kapengkilalan diona apa dolo, susi dukato tu apa undi tae’mo nala den tu kapengkilalan lako tu to undi.
Tae’ gai’na tu apa naanga’ Tomangada’
12Akumo tu Tomangada’ datunna to Israel dio Yerusalem;
13sia kupapatuimo penaangku la untuntun tonganni sia umparessai tu kakinaan lan mintu’ apa dadi nasambo langi’. Iamoto tu misa’ pengkarangan masussa Nasorong Puang Matua lako ma’rupa tau kumua anna mara’ta’ ungkarangi.
14Kupemarangamo tu mintu’ pengkarangan tu dikarang lan naarrang matanna allo, manassa mintu’nato tae’ gai’na sia susito unnula’ angin.
15Iatu apa kelok tae’ nakullei malolo, sia iatu apa kurang tang dikemba’ diia’.
16Sipa’kadamo’ kaleku kukua: Manassa kupakapuamo sia kupabudamo tu kakinaan losong na iatu mintu’ to dolo na aku tu umparenta Yerusalem; na iatu penaangku unnappa’mo kaseboanna kakinaan sia kapaissanan;
17susimoto kunii umpatu’tunni lan penaangku la untandai tu kakinaan sia kapaissanan sia kabagan sia katangpaissanan. Apa kutandaimo, kumua ia duka tu iannato susiki’ to unnula’ angin.
18Belanna kabudanna kakinaan nanii buda kamasussan, sia iake den tau urrangnganni kapaissananna, urrangnganni duka karossoanna.
<< Pengkhotbah 1 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel