Kasalanna Yerusalem
1Rampomi tu kadanNa PUANG lako kaleku Nakua:
2Na iko, e ma’rupa tau, la mupaolairaka salu tu kota umpentombang rara? Parampoi lako tau iato mai tu mintu’ apa megallianna.
3Ma’kadako kumua: Inde sia tu kadanNa Puangta PUANG: E kota, tu umpatibollo rara lan tangngamu, naurungan nalambi’ attunna sia unggaragangko kalemu rapang-rapang dipodeata la urruttakkiko.
4Diona tu rara mangka mupatibollo munii sala sia diona tu rapang-rapang dipodeata mugaragai ammu maruttak; mupamareke’mo tu allomu sia mulambi’mo tu anggenna taunmu. Iamoto la Kupopendadiko tu apa natatta mintu’ bangsa sia iatu apa natelle mintu’ tondok.
5Iatu mintu’ to musikandappiran sia to musikambelan la natelle-telleko, e iko to kadake lele diona kamaruttakkammu sia nasitutu’i kamarukkan.
6Manassa iatu arungna to Israel pantan umpembelai la umpatibollo rara sabuda-budanna.
7Lan lu tangngamu dipamatuna tu mai indo’ sia ambe’; sia lan lu tangngamu dipakario-rio tu to sae, sia lan lu kotamu dibala’-bala’ tu pia biung sia baine balu.
8Mintu’ tu apa maindanKu mutapa’ sia allo katorroangKu mupamatuna.
9Lan lu tangngamu den tu to ma’palele beko umpembelai la umpatibollo rara sia iatu to lan kotamu umpogau’ pemala’ dao lu buntu; sia lan tangngamu nanii to ma’gau’ sala.
10Lan lu tangngamu den tau ungkambelangi kasirisanna ambe’na, iamotu sangampa’ indo’ porona; lan lu tangngamu den tau untoro’-buku baine, tu maruttak, belanna nalambi’ bulanna.
11Den misa’ umpogau’i tu apa megallian, belanna sangampa’ bainena solana; to senga’ tang ussanga siri’na menintunna baine belanna ma’gau’ sala sola; to senga’ poleo lan tangngamu untoro’-buku anak daranna, tu nasangamberan.
12Lan tangngamu den tu to ungkande pappe’ sia unneloranni tu tau umpatibollo rara; mupalaku tu denne’ sia musanta’ tu denne’ sia muperarai sia mupakario-rio tu padammu rupa tau, apa iatu Aku tae’mo mukilalaiNa’, kadanNa Puangta PUANG.
13Manassa ussala’paNa’ limangKu diona tu saro bu’tu kadake muala sia diona tu rara mangka dipatibollo lan tangngamu.
14La batta’raka penaammu sia la matoto’raka tu limammu, ke nalambi’i attu kadiparessammu? Akumo, PUANG, tu mangka umpokadai sia Aku la umpalanda’i tu iannato.
15La Kupatitale’komi dio lu mintu’ bangsa sia la Kupatisambo’komi dio lu mintu’ tondok, sia la Kulossokan nasang tu kamaruttakammi dio mai kalemi.
16Susimoto tu belanna penggaurammu kalena ammu dipamatuna dio pentirona mintu’ bangsa, ammu issanni, kumua akumo tu PUANG.
17Rampomi tu kadanNa PUANG lako kaleku Nakua:
18E ma’rupa tau, iatu to Israel susimo tu apa mentai lan dapo’; tau iato mai sola nasang tambaga, tumarra pute, bassi sia tumarra lotong lan dapo’ pa’kombongan; mentai salakamo tu tau iato mai.
19Iamoto, inde sia tu kadanNa Puangta PUANG Nakua: Belanna mentai nasangkomi lan dapo’, iamoto angKu la urrampunkomi tama Yerusalem.
20Susitu salaka, tambaga, bassi, tumarra lotong na tumarra pute dipasangrampunan lan dapo’ pa’kombongan, anna diongna lu dinii umpamurru’i api la umpalollo’i, susi dukamoto la Kupasangrampunangkomi tete dio kare’dekan ara’Ku sia la Kubuangkomi tama api kare’dekan ara’Ku sia la Kupalollo’komi.
21Tonganna la Kupasangrampunangkomi sia diongna lu kalemi la Kunii umpamurru’i api kare’dekan ara’Ku, ammi dipalollo’ lan dapo’ iato.
22Susitu salaka dipalollo’ lan dapo’ pa’kombongan, la susi dukakomi dipalollo’ lan api kare’dekan ara’Ku, ammi issanni, kumua Akumo, tu PUANG, umbarrakan kare’dekan ara’Ku lako kalemi.
23Rampomi tu kadanNa PUANG lako kaleku Nakua:
24E ma’rupa tau, ma’kadako lako tondok kumua: Ikomo misa’ padang tang marumpe sia tang nasakka’i uran tonna allo kasengkean.
25Iatu mai arung lan tondok iato susi misa’ singa ma’burrung, tu usserek pialanna; arung iato mai unnampello’ tau sia urrampa ianan ballo sia ianan masuli’, sia umpabuda baine balu lan tondok iato.
26Mintu’ to minaanna ullullu’ Sukaran alukKu sia urruttakki mintu’ apa maindanKu; tae’ napasisengaranni tu maindanna sia tang maindanna sia tae’ naadaranni tau tu diona kasisengaranna apa maruttak sia apa masero sia iatu allo katorroangKu natampunan mata; susimoto tu kadipamatunangKu dio lu tau iato mai.
27Mintu’ pangulunna tau iato mai susi bang guruk undaka’ bang pialanna, tu umpatibollo rara sia ussanggang tau, kumua anna mesaro kadake.
28Na iatu mintu’ nabinna ussapu’i kapu’ napomanamanni tau iato mai: natiro patiro mendeata ma’pakena sia ma’nubua’ buttok; nakua: Inde sia tu kadanNa Puangta PUANG, apa tae’ nama’kada tu PUANG.
29Iatu tau lan tondok ma’paruku sia mangrampa; umpandasa to bongko sia to mase-mase sia umpakario-rio to sae unnea katonganan.
30Kudaka’mo tu misa’ tau dio lu tau iato mai, tu la umpabendan rinding tembo’ sia la bendan ullapa’i tu lo’po’ rinding tembo’ iato, tu la napomelona tondok, naurungan tae’mo Kusanggangi, apa tae’ bang Kuappa’.
31Iamoto Kubarrakan kasengkeangKu lako tau iato mai; sia Kupapurai api kare’dekan ara’Ku; iatu gau’na Kupasule langngan botto ulunna, kadanNa Puangta PUANG.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel