PUANG la umbengan misa’ tanda, iamotu Imanuel
1Den pissan tonna linona Ahas, anakna Yotam, anakna Uzia, datu Yehuda, ke’de’mi tu Rezin, datu Aram sola Pekah, anakna Remalya, datu Israel, anna male langngan Yerusalem, la ullaoi tu tondok iato, apa tae’ nabelai natalo.
2Tonna pokadami tau lako to lan banuanna Daud kumua: Nasamboimo Aram tu Efraim, ma’bara-barami tu penaanna datu sola mintu’ to kambanna, butung to kayu lan pangala’ nairi’ angin.
3Ma’kadami tu PUANG lako Yesaya Nakua: Maleko sola anakmu muane Syear Yasyub umpessitammui Ahas lako saruran limbong iringna daona lu, lu lako lalan padang pamusoran sampin bulu domba,
4ammu kuanni kumua: Ma’penandakomi sia parapa’i tu penaammi; da mimataku’ sia da naranggang tu penaammi diona te da’dua lalotin merambu, iamora kare’dekanna kasengkeanna Rezin sola mintu’ to Aram sia anakna Remalya.
5Belanna nadakarangkomi kadake to Aram sola to Efraim na anakna Remalya nakua:
6Maikomi take’de’i tu to Yehuda anta patirambanni sia tarampai tu tondokna anna iatu anakna Tabeel tapatama datu dio.
7Apa susite tu kadanNa Puangta PUANG: Iatu iannato tae’ anna la dadi sia tae’ anna la lalo.
8Sangadinna iatu Damsyik la tontong napopennuluan tondok Aram na Rezin napokambuno kapayungan Damsyik; – annanpa pulona llima taunna anna disanggang tu Efraim, naurunganni tae’mo anna tulangdan misa’ bangsa tu tau iato mais-
9Sia iatu Samaria la tontong napopennuluan Efraim na Remalya napokambuno kapayungan Samaria. Iake tae’i ammi katappa’i, manassa tae’ ammi dipamarendeng.
10Napatarru’mi PUANG ma’kada lako Ahas, Nakua:
11Palakuko misa’ tanda lako PUANG. Kapenombammu, palakui tu tanda diong mai mangapi’na lino, ba’tu lu dao mai masuanggana.
12Mebalimi tu Ahas nakua: Mokana’ umpalakui, mokana’ ussandak PUANG.
13Nakuami: Perangiimi totemo, e kamu bati’na Daud! Misanga tang ganna’paraka ussara’i tau, ammi sara’i siapara Kapenombangku?
14Iamoto anNa PUANG kaleNa la umbenkomi tanda kumua: La ma’tambuk tu anak dara iato anna dadian misa’ pia muane, la nasangai Imanuel.
15Bumbungan pa’pamakko sola tani’ enoan nakande, ke naissanmi ussuale kadake anna alai tu maelona.
16Belanna iake tae’pi anna issanni te pia iate ussuale kadakena anna alai tu maelona, manassa la lo’bangmo tu tondokna da’dua datu mikataku’.
17Apa iatu kamu sia bangsami sia to lan banuanna ambe’mi la Naparampoi PUANG ba’tu pira-pira attu, tu tae’ bangpa anna den susinna temponna sisarak to Efraim tu to Yehuda, – lu dio mai datu Asyur.
18Allo iato la Natambai PUANG sae tu mintu’ kasisi’ dio messarakna salu Nil dio Mesir sia tabuan dio tondok Asyur.
19Mintu’i to la sae ta’pa ussamboi aa’ mi’lan sia lan lu to’ sapak batu, sia dio lu to’ duri, sia dio lu mintu’ to’ kauaianna.
20Allo ia dukato la Naku’ku’i PUANG piso peku’ku’ diindan dio mai sappia’ salu, iamotu datu Asyur, tu beluak sia mintu’ bulu lentek sae lako danggo’ la Naku’ku’i.
21Allo ia duka bangsiato, ke denni tau umpatuo misa’ anak sapi sia da’dua domba,
22tu belanna kamasekkaranna susunna, iamoto anna la ungkande bumbungan pa’pamakko; belanna minda-minda tu torropa lan tondok iato iamo la ungkande bumbungan pa’pamakko sola tani’ enoan.
23Sia la dadi dukato allo iato, kumua iato pa’lak nanii sangsa’bu garonto’ anggoro’ dolona, tu keangga’ sangsa’bu batunna salaka, la nanii duka tuo duri sia a’da’.
24Indeto la nanii tau male sibaa len tinaran sia pana, belanna makalima’na padang iato nanii tuo duri sola a’da’.
25Sia mintu’ buntu tu nabingkung tau dolona, tae’mo nalesei tau lako, belanna ungkataku’ duri sia a’da’, sangadinna la dipanglamba’i sapi sia la dipalullu’i domba.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel