PUANG umpaombo’ Kalena dao buntu Saitun
1Manassa la sae misa’ alloNa PUANG, la dinii untaa-taai lan lu benteng tembo’mu tu pangrampa diala dio mai kalemu.
2Attu iato la Kurampun tu mintu’ bangsa urrarii Yerusalem; iatu mai kota la ditalo, iatu mai banua la dipangrampai sia iatu mai baine la diparuku digau’ sala. Sesena tu pa’tondokan la male dipali’, apa iatu torronapa tu to buda tae’ nala disabu’i lan mai kota iato.
3Attu iato la tassu’ tu PUANG, anNa sirari tu mintu’ bangsa iato susitu kapararianNa dolona, tonna allo kasirarian.
4Allo iato la mellese tu lette’Na dao buntu Saitun, tu dio tingayo Yerusalem rampe matallona; attu iato iatu buntu Saitun la tipa’dua ma’palulako rampe matallo sia lako rampe matampu’, dadi misa’ lombok tarru’ kapua, iatu sesena buntu iato menono’ ma’palurekke, na iatu sangsesena pole’o menono’ ma’palusau’.
5Attu iato la mallaikomi rokko lombok buntungKu, belanna iatu lombokna buntu iato la sumpu sae lako Azal, ondongpi la mallaikomi, susi kamallaiammi dio mai lino’ tonna linona Uzia, datu Yehuda. Sia iatu PUANG, Kapenombangku, la sae sola mintu’ to masero.
6Allo iate tae’mo nala den arrang mala’bi’ sia iatu uai tae’mo namakko;
7ondongpi iatu iannato la mennallo bangmo – tu kaissanan lako PUANG – tu tangia allo sia tangia bongi; apa ianna makaroenmo, la masero.
Diona kadatuanNa PUANG
8Allo ia dukato ba’tu pira-pira kalimbuang boba la lolong lan mai Yerusalem, sesena la lu lako tasik rampe matallo na iatu sesena la lu lako tasik rampe matampu’; moi anna pealloan, moi anna attu madingin la dadi susito.
9Sia PUANG la dadi datu lan mintu’ lino; allo iato la misa’ri tu PUANG sia iatu sanganNa la misa’ dukari.
10Iatu mintu’ padang tiku lao la dadi susi Padang marante randuk dio mai Geba sae lako Rimon, rampe lo’na lu Yerusalem; iatu kota iato la dipamatande sia la tontong dio inanna, randuk dio mai babangan Benyamin sae lako inan babangan dolo, sae lako babangan Tetuk, sia randuk dio mai menara Hananeel sae lako pa’parran anggoro’ datu.
11La natorroi tau tu kota iato, sia tae’mo ukungan pasabu’i, sangadinna iatu Yerusalem la torro marampa’.
12Inde sia tu kasanggangan tu la Napata’pa PUANG lako mintu’ bangsa, tu ullaoi Yerusalem: la Napapoppong Puang tu duku’na ke marassanpi bendan, sia la pu’pu’ tu matanna lan lo’ko’na, sia la poppong tu lilana lan sadangna.
13Ondongpi, allo iato la den kamarukkan kapua dio lu tau iato mai, tu Napaden PUANG, naurunganni pantan la undammak limanna solana, sia pantan la unnangka’ limanna unnea solana.
14Ondongpi, ia duka tu Yehuda la urrarii Yerusalem, na iatu iananna mintu’ bangsa tiku lao la dirampun, iamotu bulaan, salaka sia pakean tarru’ buda.
15Sia iatu mintu’ darang, bagala’, unta, keledai sia mintu’ patuoan, tu lan kaponan surodadu iato la narua kasanggangan susite kasanggangan iate.
16Mintu’ tu torronapa tu mintu’ bangsa, tu ullaoi Yerusalem, la male, ke taunoi menomba lako olona Datu, iamo tu PUANGna mintu’ ma’dandan maritik, sia la umpakaraya allo kapua pekalumban.
17Apa umba-umba tu suku dao kuli’na padang tae’ namale lako Yerusalem la menomba lako olona Datu, iamotu PUANGna mintu’ ma’dandan maritik, manassa tae’ nala sae uran lako kalena.
18Sia iake tae’i namale sia sae tu sukunna to Mesir, tu tae’ nato’doi uran, la sae duka tu kasanggangan, tu la Naparampo PUANG lako mintu’ bangsa, tu tae’ namale umpakaraya allo kapua pekalumban.
19La susimote tu ukunganna to Mesir sia mintu’ bangsa, tu tae’ namale umpakaraya allo kapua pekalumban.
20Allo iato la tisura’ dio lu mintu’ giring-giring darang susite nakua: Dipamaindanan PUANG, sia iatu mintu’ kurin lan banuanNa PUANG la susi pindan pa’pi’pikan dio tingayo inan pemalaran.
21Ondongpi mintu’ kurin lan Yerusalem sia lan Yehuda dipamaindanan PUANG, naurunganni mintu’ to memala’ ma’din sae sia la napantollo’i. Sia allo iato la tae’mo to Kanaan lan banuanNa PUANGna mintu’ ma’dandan maritik.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel